আল-কায়দাৰ মুৰব্বী ওছামা বিন লাডেনে ২০০১ চনত আমেৰিকাত চলোৱা ৯/১১ৰ স*ন্ত্ৰাসবাদী আক্ৰমণৰ বহু আগতেই ভাৰতকো সম্ভাব্য লক্ষ্য হিচাপে বিবেচনা কৰিছিল। শেহতীয়াকৈ আমেৰিকাৰ কেন্দ্ৰীয় চোৰাংচোৱা সংস্থা CIA-এ প্ৰকাশ কৰা কেতবোৰ গোপন নথিৰ পৰা এই তথ্য পোহৰলৈ আহিছে। ১৯৯৮ চনৰ ২৮ আগষ্টত প্ৰস্তুত কৰা এখন CIA প্ৰতিবেদনত বিন লাডেনৰ ভাৰতকে ধৰি কেইবাখনো দেশত আক্ৰমণ চলোৱাৰ পৰিকল্পনাৰ কথা উল্লেখ কৰা হৈছে। অৱশ্যে নথিখনত ভাৰতৰ কোনখন চহৰ, কোনটো স্থান বা কেতিয়া আক্ৰমণ চলোৱাৰ পৰিকল্পনা আছিল, সেই বিষয়ে কোনো নিৰ্দিষ্ট তথ্য নাই।
CIAৰ নথি অনুসৰি, বিন লাডেনৰ নেটৱৰ্কে ভাৰতসহ কেইবাখনো দেশত আক্ৰমণ চলোৱাৰ পৰিকল্পনা কৰিছিল। সম্ভাব্য লক্ষ্যৰ তালিকাত ভাৰত, পাকিস্তান, ইজিপ্ত, কুৱেইট, ছৌদি আৰব, য়েমেন আৰু উগাণ্ডাৰ নাম উল্লেখ আছে। নাইজেৰিয়াৰ নামো সম্ভাব্য লক্ষ্য হিচাপে নথিখনত উল্লেখ কৰা হৈছে। কিন্তু ভাৰতক লৈ পৰিকল্পনাৰ অধিকাংশ তথ্য নথিখনত প্ৰকাশ কৰা হোৱা নাই। কোনো নিৰ্দিষ্ট চহৰ, চৰকাৰী কাৰ্যালয়, গুৰুত্বপূৰ্ণ অট্টালিকা বা আক্ৰমণৰ তাৰিখৰ কথাও উল্লেখ নাই। এই চৰ্চিত প্ৰতিবেদনখনৰ শিৰোনাম আছিল ‘Bin Laden’s Terrorist Network Still a Threat’ অৰ্থাৎ ‘বিন লাডেনৰ সন্ত্ৰা*সবাদী নেটৱৰ্ক এতিয়াও এক ভাবুকি’।
CIAৰ প্ৰকাশ কৰা নথিৰ কিছু অংশ এতিয়াও গোপন ৰখা হৈছে। তদুপৰি, এই তথ্যসমূহ কোনটো নিৰ্দিষ্ট চোৰাংচোৱা উৎসৰ পৰা লাভ কৰা হৈছিল, সেই বিষয়েও সম্পূৰ্ণ তথ্য প্ৰকাশ কৰা হোৱা নাই। নথিখনত উল্লেখ কৰা অনুসৰি, সেই সময়ত বিন লাডেনে বিশ্বৰ কমেও ৬০খন দেশত থকা সহযোগী আৰু অন্যান্য স*ন্ত্ৰাসবাদী সংগঠনৰ সহায়ত আক্ৰমণ সংঘটিত কৰাৰ ক্ষমতা ৰাখিছিল। আফগানিস্তানত আমেৰিকাৰ সামৰিক আক্ৰমণ চলি থকাৰ পিছতো বিন লাডেন আৰু তেওঁৰ সহযোগীসকলৰ মাজত যোগাযোগ অব্যাহত আছিল বুলি CIAৰ প্ৰতিবেদনখনত উল্লেখ কৰা হৈছে। আল-কায়দাই নিজৰ কিছুমান প্ৰশিক্ষণ শিবিৰ পুনৰ সক্ৰিয় কৰিছিল। আন কিছুমান শিবিৰ আকৌ নিৰাপদ স্থানলৈ স্থানান্তৰ কৰাৰ প্ৰক্ৰিয়া চলি আছিল।
CIAৰ প্ৰকাশিত নথিসমূহে দেখুৱাইছে যে ১৯৯৮ চনৰ পৰা ২০০১ চনলৈ আমেৰিকাৰ চোৰাংচোৱা সংস্থাসমূহে তেতিয়াৰ আমেৰিকান ৰাষ্ট্ৰপতিসকলক বিন লাডেন আৰু আল-কায়দাৰ পৰা আহিব পৰা সম্ভাব্য ভাবুকিৰ বিষয়ে একাধিকবাৰ সতৰ্ক কৰিছিল। এই নথিসমূহত তেতিয়াৰ ৰাষ্ট্ৰপতি বিল ক্লিণ্টনৰ কাৰ্যকালৰ পৰা আৰম্ভ কৰি জৰ্জ ডব্লিউ বুশ্বৰ ৰাষ্ট্ৰপতিত্বৰ আৰম্ভণিৰ সময়ছোৱাৰ তথ্যও আছে। অৰ্থাৎ, ২০০১ চনৰ ১১ ছেপ্টেম্বৰৰ আক্ৰমণৰ পূৰ্বেই আমেৰিকাৰ চোৰাংচোৱা সংস্থাই বিন লাডেন আৰু আল-কায়দাৰ পৰা আহিব পৰা ডাঙৰ আক্ৰমণৰ আশংকা সম্পৰ্কে তথ্য লাভ কৰিছিল।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
