এছিয়া কাপত ভাৰতীয় দলৰ সফলতা, বাংলাদেশক শোচনীয়ভাৱে পৰাজিত কৰি ফাইনেলত উপনীত
মহিলা এছিয়া কাপৰ ছেমি ফাইনেল খেলত আজি ভাৰতে বাংলাদেশক শোচনীয়ভাৱে পৰাস্ত কৰে। খেলখনত টিম ইণ্ডিয়াই দহটা উইকেটত জয়লাভ কৰি ফাইনেলত প্ৰৱেশ কৰে। প্ৰথমে বেটিং কৰি বাংলাদেশে ২০ অভাৰত ৮টা উইকেট হেৰুৱাই মাত্ৰ ৮০ ৰান সংগ্ৰহ কৰিবলৈ সক্ষম হয়।
ভাৰতে পাছত বেটিং কৰি মাত্ৰ ১১ অভাৰতে এটাও উইকেট নেহেৰুৱাকৈ বাংলাদেশে বান্ধি দিয়া টাৰ্গেট অনায়াসে পাৰ কৰি খেলখনত জয় হোৱাৰ লগতে ফাইনেলত উপনীত হয়।
৮১ ৰানৰ লক্ষ্যৰে টিম ইণ্ডিয়াই এক সুন্দৰ আৰম্ভণি কৰিছিল খেলখনত। মাত্ৰ ১১ অভাৰতে এই স্ক’ৰ লাভ কৰে ছেফালী আৰু স্মৃতি মান্ধনাই। শ্বেফালী ভাৰ্মাই ২৮টা বলত ২৬ ৰান সংগ্ৰহ কৰে। আনহাতে স্মৃতি মান্ধনাই ৩৯টা বলত ৫৫ ৰান সংগ্ৰহ কৰে। স্মৃতি মান্ধনাই নিজৰ ইনিংছত ৯ চাৰি আৰু ১ ছয় কোবাই।
এছিয়া কাপত এই পৰ্যন্ত অপৰাজিত হৈ আছে ভাৰতীয় মহিলা দল। প্ৰতিযোগিতাখনৰ আৰম্ভণিতে নেপাল, পাকিস্তান আৰু বাংলাদেশক পৰাস্ত কৰিছিল। ভাৰতে পুনৰবাৰ ছেমি ফাইনেলত বাংলাদেশক পৰাস্ত কৰি ফাইনেলত প্ৰৱেশ কৰিছে। এই মেচখনত উজ্জ্বল প্ৰদৰ্শন কৰা ৰেনুকা ঠাকুৰ সিঙে লাভ কৰে মেন অৱ দ্য মেচৰ বঁটা।
প্ৰথমে বেটিং কৰিবলৈ অহা বাংলাদেশৰ মহিলা দলটোৰ বাবে সেয়া আছিল এক দুঃস্বপ্ন। ৩৫ ৰানৰ ভিতৰতে পেভিলিয়নলৈ ঘূৰি যাবলগীয়া হয় প্ৰায় সম্পূৰ্ণ দলটো। নিগাৰৰ বাহিৰে বাংলাদেশৰ কোনো বেটছমেনে বিশেষ একো কৰিব নোৱাৰে আৰু সমগ্ৰ দলটো ৮০ ৰানতে সীমাবদ্ধ হৈ পৰে।
বাংলাদেশৰ হৈ সৰ্বাধিক ৰান সংগ্ৰহ কৰে নিগাৰ চুলতানাই। তেওঁ ৫১টা বলত ৩২ ৰানৰ ইনিংছ খেলিছিল। তাৰ বাহিৰে সম্পূৰ্ণ দল বিফল হয়।
টিম ইণ্ডিয়াৰ হৈ ৰেনুকাই ৪ অভাৰত ১০ ৰান খৰচ কৰি ৩টা উইকেট দখল কৰে। যাৰ ফলত টি-২০ ইণ্টাৰনেশ্যনেলত ৫০টা উইকেট সম্পূৰ্ণ কৰে। খেল খনত ৰেনুকাৰ বাহিৰে ৰাধা যাদৱেও ১৪ ৰান খৰচ কৰি ৩টা উইকেট দখল কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
