অসম লাইভ২৪ঃ সময়ৰ বহু আগতেই জন্ম হৈছিল নৱজাতকটো৷ মাত্ৰ ২৪ সপ্তাহতেই জন্ম পোৱা শিশুটিৰ জন্মৰ সময়ত ওজন আছিল মাত্ৰ ৪০০ গ্ৰাম৷ এটা গাখীৰৰ পেকেটতকৈও ওজন কম শিশুটিৰ৷ চিকিৎসকে কৈছিল শিশুটি জীয়াই থকাৰ আশা তেনেই ক্ষীণ৷ চিকিৎসকে জনোৱা অনুসৰি মাত্ৰ ০.৫ শতাংশহে শিশুটি জীয়াই থাকিব বুলি আশা আছে৷ কিন্তু বিধিয়ে বিচাৰিলে মৃত্যুৱে কাৰোৱেই কাষ চাপিব নোৱাৰে৷ শিশুটি জীয়াই আছে৷ চিকিৎসা বিজ্ঞানৰ হিচাপ ভুল প্ৰমানিত কৰি ক্ৰমাৎ ডাঙৰ হৈছে শিৱন্যা নামৰ শিশুটি৷
২০২২ চনৰ ২১ মে’ত জন্মলাভ কৰিছিল শিৱন্যাই৷ পুনেৰ সূৰ্য মাদাৰ এণ্ড চাইল্ড কেয়াৰ হাস্পতালত চিকিৎসাধীন হৈ আছে শিৱন্যা৷ চিকিৎসালয়খনৰে শিশু বিশেষজ্ঞ শচীন শ্বাহে দিয়া মন্তব্যত কয় যে শিৱন্যাই ভাৰতত জন্মলাভ কৰা আটাইতকৈ ক্ষুদ্ৰতম নৱজাতক৷ জন্মৰ পাছচ ৯৪ দিন শিশুটিক আইছিইউতেই ৰখা হৈছিল৷ আগষ্টৰ ২৩ তাৰিখে শিৱন্যাক আইচিইউ ৰ পৰা বাহিৰলৈ ওলিয়াই অনা হৈছে৷ আইচিইউৰ পৰা বাহিৰলৈ অনাৰ সময়ত শিশুটিৰ ওজন হৈছিল ২১৩০ গ্ৰাম৷ চিকিৎসকে ওজনৰ প্ৰসংগত কয় যে, এটা ৩৭ ৰ পৰা ৪০ সপ্তাহৰ নৱজাতকৰ স্বাভাৱিক ওজন হয় ২৫০০ গ্ৰাম৷ আইচিইউ ৰ পৰা ওলিয়াই অনাৰ পাছতো শিশুটিৰ ওজন স্বাভাৱিক নহ’লেও কিছু পৰিমানে স্বাভাৱিক শিশুৰ সৈতে মিল আহিছে৷
ইপিনে শিশুটিৰ পিতৃয়ে জনোৱা অনুসৰি জন্মৰ প্ৰায় ৭ মাহ পাছত বৰ্তমান শিৱন্যাৰ ওজন প্ৰায় ৪.৫ কিলোগ্ৰাম৷ বৰ্তমান শিৱন্যাৰ খোৱাবোৱা স্বাবাৱিক শিশুৰ দৰেই৷ পিতৃ-মাতৃয়েও বৰ্তমান শিৱন্যাক লৈ আশাবাদী৷ চিকিৎসা বিজ্ঞানকো বাৰে বাৰে ধন্যবাদ জনাইছে শিৱন্যাৰ পিতৃ-মাতৃয়ে কিয়নো দেশত প্ৰথমবাৰৰ বাবে ইমান কম ওজনৰ নৱজাতকত প্ৰাণৰক্ষা কৰাৰ নজিৰ নাই৷ শিৱন্যা তাৰে মাজত ব্যতিক্ৰম৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
