সংশোধন হোৱাৰ দিশে বিবাহ আইন, ৯ বছৰীয়া কন্যাক বিয়া কৰাব পাৰিব পুৰুষে
যি সময়ত সমগ্ৰ বিশ্বতে বাল্যবিবাহ অন্ত পেলোৱাৰ প্ৰচেষ্টা অব্যাহত আছে। বহুলাংশে সফলো হৈছে এই ক্ষেত্ৰত। ভাৰততো বৰ্তমানে হ্ৰাস পাইছে বাল্য বিবাহ। পাছে এই সকলোবোৰৰ বিপৰীতে এখন দেশে সংশোধন কৰিবলৈ ওলাইছে বিবাহ আইন। যি আইনৰ ফলত সেই দেশৰ পুৰুষে বিয়া কৰাব পাৰিব ৯বছৰীয়া কন্যাক।
সেই দেশখন হৈছে ইৰাক। দেশত বিবাহ আইন সংশোধন কৰিবলৈ সাজু হৈছে ইৰাক, যাৰ অধীনত ছোৱালীৰ বিবাহৰ বয়স মাত্ৰ ৯ বছৰলৈ হ্ৰাস কৰা হ’ব।
যদি ইৰাকত এই সংশোধনী গৃহীত হয়, তেন্তে কেৱল বিবাহৰ বয়স হ্ৰাস পোৱাই নহয়, মহিলাৰ বাবে বিবাহ বিচ্ছেদ, সন্তান আৰু সম্পত্তিৰ তত্ত্বাৱধানৰ দৰে বিশেষ অধিকাৰো নিষিদ্ধ কৰা হ’ব।
১৯৫৯ চনত প্ৰৱৰ্তন কৰা ১৮৮ নং আইনৰ অধীনত এই সংশোধনী কাৰ্যকৰী কৰাৰ ওপৰত গুৰুত্ব আৰোপ কৰা হৈছে। এই আইনখনক পশ্চিম এছিয়াৰ অন্যতম প্ৰগতিশীল আইন বুলি গণ্য কৰা হৈছিল।
ছিয়া দলৰ মিত্ৰজোঁটৰ নেতৃত্বত ইৰাক চৰকাৰে কয় যে এই সংশোধনী ইছলামিক শ্বৰীয়ত আইন অনুসৰি কৰা হৈছে আৰু ইয়াৰ লক্ষ্য হৈছে কণমানি ছোৱালীক সুৰক্ষা দিয়া।
বিশেষ কথাটো হ’ল ইৰাকৰ মহিলা গোটৰ অবিৰত বিৰোধিতা সত্ত্বেও ইৰাক চৰকাৰে ছোৱালীৰ সুৰক্ষাৰ দোহাই দি এই নিকৃষ্ট আইনখন গৃহীত কৰিব বিচাৰিছে।
ইউনিচেফৰ প্ৰতিবেদন অনুসৰি ইৰাকত পূৰ্বৰে পৰা বৰ্তমানেও বাল্যবিবাহৰ প্ৰচলন আছে। প্ৰায় ২৮ শতাংশ ছোৱালীয়ে ১৮ বছৰ বয়সত বিবাহপাশত আবদ্ধ হয়।
হিউমেন ৰাইটছ ৱাচে কয় যে এই সংশোধনীৰ ফলত কণমানি ছোৱালীৰ ওপৰত যৌন আৰু শাৰীৰিক হিংসাৰ আশংকা বৃদ্ধি পাব আৰু তেওঁলোকক শিক্ষা আৰু কৰ্মসংস্থাপনৰ সুবিধাৰ পৰা বঞ্চিত কৰা হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
