পাঁচশ টকাৰ হাজিৰা পালেই আৰক্ষীৰ দৰে দায়িত্ব পালন কৰিব পাৰি নেকি? সাধাৰণ লোকক আৰক্ষীৰ তালাচী চকীত নিয়োজিত কৰাৰ অনুমতি কোনে দিলে? আৰক্ষীৰ পোছাক পৰিধান নকৰাকৈ পথত বাহন ৰখাই তালাচী চলোৱা এই লোকসকল প্ৰকৃততে কোন? কাছাৰৰ বালাচৰা টোলগেটৰ এক দৃশ্যই এতিয়া এনে বহু গুৰুত্বপূৰ্ণ প্ৰশ্নৰ উত্থাপন কৰিছে।
বৰখলা আৰক্ষী থানাৰ অন্তৰ্গত বালাচৰা চেকগেটত আৰক্ষীৰ নাকা চেকিঙৰ কামত নিয়োজিত হৈ আছে তিনিজনকৈ সাধাৰণ লোক। অভিযোগ অনুসৰি, এই লোককেইজনে প্ৰতিদিনে শ্বিফ্টিং পদ্ধতিৰে আৰক্ষীৰ দৰে দায়িত্ব পালন কৰি আহিছে। আচৰিত কথাটো হ’ল, এই কামৰ বিনিময়ত প্ৰতিজন লোকে লাভ কৰে পাঁচশ টকাৰ হাজিৰা। আৰক্ষীয়ে যিদৰে বাহন ৰখাবলৈ সংকেত দিয়ে, ঠিক সেইদৰেই এই সাধাৰণ লোককেইজনেও পথত চলাচল কৰা বাহন ৰখাই নাকা চেকিঙৰ কাম কৰি থকা দেখা গৈছে।
কেমেৰাৰ সন্মুখত লোককেইজনে দাবী কৰে যে বৰখলা আৰক্ষীয়েই তেওঁলোকক এই কামত নিয়োজিত কৰিছে। এই দাবীয়ে এতিয়া সমগ্ৰ ঘটনাটোক অধিক ৰহস্যজনক কৰি তুলিছে। প্ৰশ্ন উঠিছে, আৰক্ষীৰ নাকা চেকিঙৰ দৰে এক গুৰুত্বপূৰ্ণ দায়িত্বত সাধাৰণ লোকক নিয়োজিত কৰাৰ অনুমতি কোনে প্ৰদান কৰিলে? আৰক্ষীৰ লোকৰ অভাৱৰ বাবেই যদি এনে ব্যৱস্থা গ্ৰহণ কৰা হৈছে, তেন্তে চৰকাৰীভাৱে আৰক্ষীৰ কনিষ্টবল অথবা বেটেলিয়ন নিয়োগ কৰাৰ পৰিৱৰ্তে অস্থায়ী শ্ৰমিকৰ দ্বাৰা নাকা চেকিঙৰ কাম কৰোৱাটো কিমানদূৰ গ্ৰহণযোগ্য?
ইফালে, এই চেকগেটক লৈ আন এক গুৰুতৰ অভিযোগো উত্থাপন হৈছে। অভিযোগ অনুসৰি, এই শ্ৰমিকসকলৰ জৰিয়তে চিণ্ডিকেটৰ বাহন পাৰ কৰোৱা হয়। কেঁচা তামোলকে ধৰি বিভিন্ন সামগ্ৰী কোনো বাধা নোহোৱাকৈ চেকগেট পাৰ হৈ যোৱাৰ অভিযোগ কৰিছে একাংশই। অৱশ্যে, এই অভিযোগসমূহৰ সত্যতা আনুষ্ঠানিক তদন্তৰ জৰিয়তেহে নিশ্চিত কৰিব পৰা যাব।
আৰক্ষীৰ চকুৰ সন্মুখতে যদি এনে কাৰ্যকলাপ চলি আছে, তেন্তে এতিয়ালৈকে কিয় গ্ৰহণ কৰা হোৱা নাই কঠোৰ ব্যৱস্থা? আৰক্ষীৰ নামত সাধাৰণ লোকক নিয়োজিত কৰি কোনে চলাইছে এই ব্যৱস্থা? এই সমগ্ৰ ঘটনাই কাছাৰ আৰক্ষীৰ কৰ্তব্যনিষ্ঠা, দায়িত্ববোধ আৰু তদাৰকী ব্যৱস্থাক লৈ প্ৰশ্নৰ সৃষ্টি কৰিছে।
বিশেষকৈ কাছাৰ আৰক্ষীলৈ ৰাইজৰ প্ৰশ্ন—বালাচৰা চেকগেটত সাধাৰণ লোকৰ দ্বাৰা নাকা চেকিঙৰ বিষয়টো আৰক্ষী প্ৰশাসনৰ জ্ঞাত নে? যদি জ্ঞাত, তেন্তে এনে ব্যৱস্থা কেনেকৈ চলি আছে? আৰু যদি আৰক্ষী প্ৰশাসন এই বিষয়ে অজ্ঞাত, তেন্তে অধীনস্থ চেকগেটসমূহত কেনেদৰে চলিছে তদাৰকী?
পাঁচশ টকাৰ হাজিৰাত আৰক্ষীৰ দায়িত্ব পালন, নে আৰক্ষীৰ নামত গঢ় লৈ উঠিছে কোনো বৃহৎ দালাল চক্ৰ? বালাচৰা চেকগেটৰ এই ঘটনাই এতিয়া বহু গুৰুতৰ প্ৰশ্নৰ অৱতাৰণা কৰিছে। সমগ্ৰ বিষয়টোৰ নিৰপেক্ষ তদন্ত কৰি প্ৰকৃত সত্য পোহৰলৈ অনাৰ লগতে দোষীসকলৰ বিৰুদ্ধে কঠোৰ ব্যৱস্থা গ্ৰহণৰ দাবী উঠিছে। আৰক্ষীৰ দায়িত্ব আৰক্ষীয়েই পালন কৰিব লাগে, নে পাঁচশ টকাৰ হাজিৰাত নিয়োজিত সাধাৰণ লোকৰ হাতত অৰ্পণ কৰা হৈছে এই গুৰুত্বপূৰ্ণ দায়িত্ব? এতিয়া সকলোৰে দৃষ্টি আৰক্ষী প্ৰশাসনৰ পৰৱৰ্তী পদক্ষেপৰ ওপৰত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
