বিমান আক্ৰমণৰ ভয়ংকৰ খবৰ, প্ৰাণ হেৰুৱালে ৪৫ গৰাকীয়ে, ৭৬ আহত, নিহতৰ সংখ্যা বৃদ্ধিৰ আশংকা
ইজৰাইল আৰু লেবাননৰ মাজত বৰ্তমানৰ সংঘাত অধিক বৃদ্ধি পাইছে। এই সন্দৰ্ভত লেবাননৰ স্বাস্থ্য মন্ত্ৰালয়ে জনাইছে যে ২৯ ছেপ্টেম্বৰ দেওবাৰে ইজৰাইল সেনাই দুটা ভিন্ন অঞ্চলত দ্ৰুত বিমান আক্ৰমণ চলাইছিল, য’ত কমেও ৪৫ জন লোক নিহত হৈছিল আৰু ৭৬ জন আহত হৈছিল।
তথ্য অনুসৰি লেবাননৰ দক্ষিণৰ আইন আল-ডেলব গাঁও আৰু পূব লেবাননৰ বেকা উপত্যকাৰ বালবেক-হাৰ্মেল অঞ্চলত এই আক্ৰমণ সংঘটিত হয়। য’ত আইন আল ডেলবত ২৪ জন লোকৰ মৃত্যু হোৱাৰ লগতে ২৯ জন লোক আহত হয়। বালবেক-হাৰ্মেলত থকাৰ সময়তে কমেও ২১ জন লোকৰ মৃত্যু হোৱাৰ লগতে ৪৭ জন লোক আহত হয়।
শেহতীয়াকৈ ইজৰাইলৰ তীব্ৰ বোমাবৰ্ষণৰ বাবে হাজাৰ হাজাৰ লেবাননৰ নাগৰিকে ঘৰ এৰি আন ঠাইলৈ পলায়ন কৰিবলগীয়া হৈছে। বিমান আক্ৰমণত ধ্বংস হৈছে অট্টালিকা। বৃহৎ আন্তঃগাঁথনি ধ্বংস হৈছে।
উল্লেখ্য যে, ইজৰাইলে হিজবুল্লাহৰ সন্ত্ৰাসবাদীক নিৰ্মূল কৰিবলৈ এই আক্ৰমণ চলাইছে। শেহতীয়াকৈ হাছান নছৰল্লাহক হত্যা কৰাৰ পিছত ইজৰাইলৰ মনোবল শিখৰত উপনীত হৈছে। দেশৰ প্ৰধানমন্ত্ৰী বেঞ্জামিন নেত্যানাহুৱে কোনো মূল্যৰ বিনিময়ত এই আক্ৰমণ বন্ধ কৰিবলৈ যোৱা নাই বুলি স্পষ্ট কৰি দিছে।
এতিয়ালৈকে ইজৰাইলৰ বিমান আক্ৰমণত শ শ লোকে প্ৰাণ হেৰুৱাইছে, আনহাতে হাজাৰ হাজাৰ লোক আহত হৈছে। পৰিসংখ্যা অনুসৰি লেবাননত এতিয়ালৈকে মুঠ ১৬৪০ জন লোকৰ মৃত্যু হৈছে, য’ত ১০৪ জন শিশু আৰু ১৯৪ গৰাকী মহিলাও আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
