বিগত ৩৫ দিনতেই চাৰখাৰ গাজা! হামাছক শেষ কৰিবলৈ ইজৰাইলে টাৰ্গেট কৰি লৈছে নেকি স্বাস্থ্য ব্যৱস্থাক? WHOয়ে প্ৰকাশ কৰিছে ভয়ংকৰ খবৰ

অসম লাইভ২৪ঃ যুদ্ধ কমাৰ কোনো লক্ষণেই নাই। ইজৰাইল-হামাছ যুদ্ধৰ ৩৫ দিন সম্পূৰ্ণ হৈছে। গাজাত এতিয়াও অব্যাহত আছে ইজৰাইলী সেনাৰ আক্ৰমণ। যিমানেই দিন পাৰ হৈছে সিমানেই মৃতকৰ সংখ্যাও বৃদ্ধি হৈছে। পেলেষ্টাইনৰ গাজা চহৰ বিগত ৩৫ দিনতেই চাৰখাৰ। ইজৰাইল সেনাৰ আক্ৰমণত পিছুৱাই যোৱা নাই হামাছো। বুধবাৰেও গাজাত ব্যাপকভাৱে আক্ৰমণ চলাইছে ইজৰাইলী সেনাই। গাজা উপত্যকাৰ উত্তৰাঞ্চলৰ জাবালিয়া আশ্ৰয় শিবিৰ আৰু পশ্চিমাঞ্চলৰ ছাবৰাত বহু মানুহৰেই মৃত্যু হোৱাৰ খবৰ বিভিন্ন সংবাদমাধ্যমে প্ৰকাশো কৰিছে।

আল জাজিৰাৰ এক প্ৰতিবেদনত প্ৰকাশ কৰামতে, গাজাৰ সকলোতকৈ ডাঙৰ হাস্পতাল আল শেফাত বৃহস্পতিবাৰে গভীৰ নিশা ইজৰাইলী সেনাই আক্ৰমণ চলাইছে। হাস্পতালত আক্ৰমণ চলাইছে ইজৰাইলী সেনাই। এই আক্ৰমণত ৬জন লোক নিহত হোৱাৰ খবৰো প্ৰকাশ কৰিছে আলজাজিৰাই। মৃতকৰ সংখ্যা আৰু বৃদ্ধিও হ’ব পাৰে। পেলেষ্টাইন স্বাস্থ্য মন্ত্ৰণালয়ৰ তৰফৰ পৰা জনোৱা অনুসৰি হাজাৰ হাজাৰ মানুহে এই আল শেফা হাস্পতালত আশ্ৰয় লৈ আছিল। গাজাৰ পৰা আল জাজিৰাৰ এগৰাকী সাংবাদিকে এই সন্দৰ্ভত কয়, ‘ইজৰাইলে বিমানেৰে হাস্পতালৰ ওপৰত আক্ৰমণ চলাইছে। চহৰখনৰ চৌদিশে এতিয়া ইজৰাইলী টেংক দেখা গৈছে। বিগত তিনি দিন ধৰি গাজাৰ ৮খন হাস্পতালত ইজৰাইলে আক্ৰমণ চলাইছে। ৭ অক্টোবৰৰ পৰাই ইজৰাইলে পূৰ্ণগতিত আক্ৰমণ চলাইয়েই আছে। কাৰেণ্ট নাই, পানী নাই, ইন্ধন নাই যাৰবাবে গাজাৰ ১৮ খন হাস্পতাল বন্ধ কৰি দিবলৈ বাধ্য হৈছে।’ আনহাতে ইজৰাইলী প্রধানমন্ত্ৰী বেঞ্জামিন নেতানিয়াহুৱে যুদ্ধক লৈ দিয়া শেহতীয়া আপডেটত কৈছে ‘গাজা দখল কৰিবলৈ আমাৰ ইচ্ছা নাই। আমি কেৱল গাজাৰ সুন্দৰ ভৱিষ্যতহে বিচাৰো। সেয়ে গাজাক আমি সন্ত্ৰাসমুক্ত কৰি গাজাবাসীক এখন স্বাধীন আকাশ দিব খুজিছো।’

যুদ্ধৰ মাজতেই ভয়াৱহ খবৰ শ্বেয়াৰ কৰিছে বিশ্ব স্বাস্থ্য সংস্থাইয়ো। WHOৰ তৰফৰ পৰা দিয়া বিবৃত্তিত উল্লেখ কৰা অনুসৰি ভয়ংকৰ এই যুদ্ধৰ প্ৰভাৱ পৰিছে গাজাৰ মানুহৰ স্বাস্থ্যৰ ওপৰতো। স্বাস্থ্যৰ অৱনতি নিশ্চিত। যুদ্ধৰ মাজতেই মাৰাত্মক ৰোগো বিয়পি পৰাৰ আশংকা কৰা হৈছে। WHOয়ে প্ৰকাশ কৰা তথ্যমতে, গাজাত ২৩ লাখ মানুহে বসবাস কৰে। যুদ্ধ আৰম্ভ হোৱাৰ পৰাই বহুলোকে স্বাস্থ্যসেৱাৰ পৰা বঞ্চিত হৈছে। সুযোগ সুবিধা নাই বুলিয়েই এনেদৰে থাকিলে পৰিস্থিতি আৰু বেয়াৰ ফালেই যাব বুলিও জনাইছে কেইবাগৰাকীও চিকিৎসকে। গাজাত ডায়েৰিয়া, চিকেনপক্স আৰু শ্বাসপ্ৰশ্বাসজনিত ৰোগ বঢ়াৰো সম্ভাৱনা আছে। যিহেতু গাজাত পানীৰো অভাৱে দেখা দিছে সেয়ে বিশ্বৰ পৰা খুব কম সামগ্ৰীহে গাজালৈ আহিছে। যাৰফলত পানী আৰু খাদ্যৰ অভাৱত ভূগিছে সাধাৰণ জনতাই।