জম্মু-কাশ্মীৰৰ মুখ্যমন্ত্ৰী হ’ব ওমৰ আব্দুল্লা, ঘোষণা ফাৰুক আব্দুল্লাৰ
ৰাষ্ট্ৰীয় সন্মিলনৰ নেতা ওমৰ আব্দুল্লা জম্মু-কাশ্মীৰৰ মুখ্যমন্ত্ৰী হ’ব বুলি ঘোষণা কৰিলে ৰাষ্ট্ৰীয় সন্মিলনৰ মুৰব্বী ফাৰুক আব্দুল্লাই। কেন্দ্ৰীয় শাসিত অঞ্চলৰ বিধানসভা নিৰ্বাচনত জয়ৰ দিশে আগবাঢ়িছে জম্মু-কাশ্মীৰৰ ৰাষ্ট্ৰীয় সন্মিলন।
১০ বছৰৰ পাছত জম্মু-কাশ্মীৰৰ প্ৰথমটো বিধানসভা নিৰ্বাচনত কংগ্ৰেছ-এনচি মিত্ৰজোঁটে জয়ী হ’ব বুলি স্পষ্ট হৈ পৰাৰ পিছতে ফাৰুক আব্দুল্লাই এই ঘোষণা কৰে।
লগতে ফাৰুক আব্দুলাই কয় যে,- আমি আল্লাহৰ ওচৰত প্ৰাৰ্থনা কৰোঁ যাতে আমি জনতাৰ আশা অনুসৰি কাম কৰি থাকিব পাৰো। ইয়াত এতিয়া ‘পুলিচৰ শাসন’ নহয় জনশাসন হ’ব৷ আমি নিৰীহ লোকক জেলৰ পৰা মুকলি কৰি দিবলৈ চেষ্টা কৰিম। সংবাদ মাধ্যম মুক্ত হৈ থাকিব। হিন্দু আৰু মুছলমানৰ মাজত আমি বিশ্বাস গঢ়ি তুলিব লাগিব।
ফাৰুক আব্দুল্লাই আৰু কয় যে “মানুহে নিজৰ আদেশ দিছে। ৫ আগষ্টত লোৱা সিদ্ধান্ত (৩৭০ অনুচ্ছেদ বাতিল) তেওঁলোকে যে মানি নলয়, সেই কথা তেওঁলোকে প্ৰমাণ কৰিছে।”
বিশেষ মৰ্যাদা বাতিল হোৱাৰ পাছত কেন্দ্ৰীয় শাসিত অঞ্চলত পৰিণত হোৱা জম্মু-কাশ্মীৰৰ ৰাজ্যিক স্থান ঘূৰাই অনাৰ বাবে ৰাষ্ট্ৰীয় সন্মিলনৰ যুঁজত মিত্ৰজোঁটৰ অংশীদাৰসকলে সহায় কৰিব বুলিও আশা প্ৰকাশ কৰে প্ৰাক্তন মুখ্যমন্ত্ৰীগৰাকীয়ে।
ইয়াৰ পূৰ্বে ২০০৯ চনৰ পৰা ২০১৫ চনলৈকে মুখ্যমন্ত্ৰী হিচাপে কাৰ্যনিৰ্বাহ কৰিছিল ওমৰ আব্দুল্লাই। এতিয়া পুনৰ মুখ্যমন্ত্ৰী হোৱাৰ দিশে। মুঠ ৯০খন আসনৰ ভিতৰত ৫২খন আসন লাভ ৰাষ্ট্ৰীয় সন্মিলনৰ, আনহাতে বিজেপিয়ে ২৭খন আসনত আগবাঢ়ি আছে। ৰাজ্যখনত কংগ্ৰেছে কেৱল মাত্ৰ ৬ খন আসন লাভ কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
