জন্মৰ পাছতেই জণ্ডিছৰ লক্ষণে দেখা দিয়ে বহু শিশুৰ৷ সদ্যোজাত শিশুৰ জণ্ডিছ ধৰা পৰিলে পিতৃ-মাতৃৰ মনতো আতংকই দেখা দিয়ে৷ শিশু বিশেষজ্ঞ চিকিৎসকে জনোৱা অনুসৰি নৱজাতক শিশুৰ শৰীৰত বিলিৰুবিনৰ মাত্ৰা বেছি থাকিলে জন্মৰ পাছতেই জণ্ডিছ হোৱাৰ সম্ভাৱনা থাকে৷ শিশুৰ শৰীৰ আৰু চকু হালধীয়া হৈ উঠে৷ অংগ প্ৰত্যঙ্গও দুৰ্বল হ’বলৈ ধৰে৷ সেয়ে এই সময়ত শিশুটিক নীলা পোহৰৰ তলত বিশেষ বক্সত সোমোৱাই ৰাখে চিকিৎসকে৷ সদ্যোজাতৰ জণ্ডিছ হোৱাৰ বহু কাৰণ আছে৷ চিকিৎসকৰ মতে শিশু এটি যিমানদিন মাতৃ গৰ্ভত থাকে সিমান দিন মাতৃৰ ধমনীৰ পৰাই অক্সিজেন পাই থাকে৷ মাতৃৰ শৰীৰৰ পৰাই গৰ্ভজাত শিশুৰ শৰীৰক অক্সিজেন প্ৰবাহিত হৈ থাকে৷ এই অক্সিজেন প্ৰবাহিত হয় লোহিত ৰক্তকণিকাৰে৷
শিশু ভূমিষ্ঠ হোৱাৰ পাছতেই শিশুটিৰ হাওঁফাওঁৱে নিজাকৈ কাম কৰা আৰম্ভ কৰে৷ তেতিয়াই অতিৰিক্ত লোহিত কণিকাসমূহ ভাঙিবলৈ আৰম্ভ কৰে৷ লোহিত কণিকা ভাঙিলে তাৰ পৰা বিলিৰুবিন নামৰ হালধীয়া ৰঙৰ এক ৰঞ্জক পদাৰ্থ বাহিৰ হয়৷ এই বিলিৰুবিনৰ মাত্ৰা বেছি হোৱাকেই জণ্ডিছ বুলি কোৱা হয়৷ লোহিত ৰক্তকণিকা ভাঙি যি বিলিৰুবিন বাহিৰ হয় সেয়া যকৃতৰ মাজেৰে পাৰ হয়৷ যকৃতে অতিৰিক্ত বিলিৰুবিন চাঁকি লয়, বাকীখিনি শৰীৰত বিয়পি পৰে৷ কিন্তু সদ্যোজাত শিশুৰ যকৃৎ পৈণত নহয় সেয়ে বিলিৰুবিণ ছেঁকিব নোৱাৰে৷ তেতিয়াই জণ্ডিছৰ লক্ষণে দেখা দিয়ে শিশুৰ৷
সময়ৰ পূৰ্বেই ভূমিষ্ঠ হৈছে যদি শিশুটো প্ৰিমেছিউৰ৷ শিশুৰ জণ্ডিছত আক্ৰান্ত হোৱাৰ আশংকা বেছি থাকে৷ মাতৃ আৰু সন্তানৰ তেজৰ গ্ৰুপ পৃথক পৃথক হ’লেও এনে হ’ব পাৰে৷ ধৰক মাতৃৰ তেজৰ গ্ৰুপ o+ আৰু শিশুটো যদি A+, B+হয় তেন্তে শিশুটি জণ্ডিছত আক্ৰান্ত হোৱাৰ আশংকা বাঢ়ে৷ মাতৃৰ যদি আৰএইছ নিগেটিভ তেজ হয় আৰু সন্তান যদি আৰএইছ পজিটিভ হয় তেন্তে শিশুটোৰ জণ্ডিছ ধৰা পৰে৷
কি কি লক্ষণে দেখা দিব শিশুটিৰ?
১. শিশুৰ ছাল, চকু হালধীয়া হৈ যাব৷
২. বিলিৰুবিনৰ মাত্ৰা সাধাৰণতে জন্মৰ ৩ৰ পৰা ৭ দিনৰ মাজত সকলোতকৈ বেছি হয়. তেতিয়াই এই সমস্যা বেছিকৈ লক্ষ্য কৰা যায়৷
৩. শিশুৰ চালত কোনো স্থানত লাহেকৈ চেপা মাৰিলে যদি সেই স্থান হালধীয়া হৈ পৰে তেন্তে বুজিব যে শিশুটি জণ্ডিছত আক্ৰান্ত হৈ পৰিছে৷
৪. হাতৰ তলুৱা, ভৰিৰ পতা হালধীয়া হ’লেও বুজিব যে শিশুটি জণ্ডিছত আক্ৰান্ত৷
৫. শিশুৰ প্ৰস্ৰাৱৰ ৰং মন কৰিব৷ যদি প্ৰস্ৰাৱ হালধীয়া ৰঙৰ হয় তেন্তে চিকিৎসকৰ পৰামৰ্শ মানি চলক৷
চিকিৎসকে জনোনা অনুসৰি প্ৰস্ৰাৱত হালধীয়া ৰং দেখিলে দ্ৰুত চিকিৎসা আৰম্ভ কৰক৷ জন্মৰ ৭ দিনৰ ভিতৰত জণ্ডিছ ধৰা পৰিলে বিশেষ ভয় নাথাকে৷ কিন্তু দেৰি হ’লেই শিশুৰ মস্তিষ্কত তাৰ প্ৰভাৱ পৰিবলৈ ধৰে৷ শৰীৰৰ ভিতৰত ৰক্তক্ষৰণ আৰম্ভ হৈ যায়৷ তেতিয়াই জণ্ডিছ কিন্তু ভয়ৰ কাৰণ হৈ উঠে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
