দিল্লীৰ যন্তৰ মন্তৰত প্ৰতিবাদৰ সময়ত ছাত্ৰ-ছাত্ৰীৰ ক্ষুধা নিবাৰণৰ বাবে খাদ্য-পানী যোগান ধৰি চৰ্চা লাভ কৰিছিল জুনেইদ মালিকে। কিন্তু পৰোপকাৰ কৰাৰ পিছতো চিন্তা বাঢ়িছে জুনেইদৰ পৰিয়ালৰ। কাৰণ তেওঁৰ খাদ্য বিতৰণৰ ভিডিঅ’ৰ বাবে নহয়, বৰং উত্তৰ প্ৰদেশ আৰক্ষীৰ (UP Police) পৰা অহা এখন “লাভ লেটাৰ”।
“লাভ লেটাৰ” শব্দটো সাধাৰণতে প্ৰেমপত্ৰ বুজাবলৈ ব্যৱহাৰ কৰা হয়। কিন্তু ছ’চিয়েল মিডিয়াৰ ভাষাত আৰক্ষী বা প্ৰশাসনৰ পৰা অহা আইনী জাননী, নোটিছ বা সমনক ব্যংগাত্মকভাৱে “লাভ লেটাৰ” বুলি প্ৰকাশ কৰিছে।
জুনেইদে দীৰ্ঘদিন ধৰি দৰিদ্ৰ, পদপথৰ লোক আৰু ক্ষুধাৰ্ত লোকসকলক খাদ্য যোগান ধৰি বহু মানুহৰ প্ৰশংসা লাভ কৰি আহিছিল। তেওঁৰ বিভিন্ন সেৱামূলক ভিডিঅ’ সামাজিক মাধ্যমত লাখ লাখ লোকে চায় আৰু শ্বেয়াৰ কৰে। বহুতে তেওঁক মানৱতাৰ এক উজ্জ্বল উদাহৰণ বুলি অভিহিত কৰে।
কিন্তু জনপ্ৰিয়তাৰ লগে লগে বিতৰ্কও বৃদ্ধি পাইছে জুনেইদৰ। অৱশ্যে নোটিছ লাভ কৰিলেই কোনো ব্যক্তি দোষী বুলি ধৰি ল’ব নোৱাৰি। এনে নোটিছ বহু সময়ত তথ্য বিচৰা, তদন্তত সহযোগিতা বিচৰা বা আইনী প্ৰক্ৰিয়াৰ অংশ হিচাপেও জাৰি কৰা হয়।
পৰিয়ালটোৰ অভিযোগ যে যোৱা কিছুদিনত আৰক্ষীয়ে তেওঁলোকৰ ঘৰলৈ গৈ তদন্ত কৰি পৰিয়ালটোৰ পৰা নথি-পত্ৰ দাবী কৰিছে। দেউতাকে কয়, “মোৰ ল’ৰাই একো বেয়া কাম কৰা নাই। তেওঁ ৰাইজৰ সেৱা কৰি আছে। সৰুৰে পৰাই মানুহক সহায় কৰি আহিছে। ২৩ জুলাইত প্ৰায় ৫ বজাত মুছুৰী আৰক্ষী আমাৰ ঘৰত উপস্থিত হৈছিল।” সেই দিনা আৰক্ষীয়ে ঘৰৰ নথি-পত্ৰ পৰীক্ষা কৰি জুনেইদৰ পিতৃ মুস্তাফাক সোধা-পোছাৰ বাবে থানালৈ লৈ যায়। তাতে তেওঁৰ আধাৰ কাৰ্ড, পেন কাৰ্ড, বেংকৰ পাছবুক, আৰু অন্যান্য নথি-পত্ৰৰ তথ্য বিচাৰিছিল।
পৰিয়ালটোৱে জনোৱা মতে, তেওঁলোকক প্ৰায় ১১ বজাত উভতাই পঠিওৱা হৈছিল। পিছদিনা ২৪ জুলাইত পুনৰ থানালৈ মাতি অনা হয় আৰু গোটেই দিনটো জেৰা কৰা হয়। দাবী কৰা হৈছে যে ২৪ জুলাইৰ পুৱা মীৰুটৰ জ্যেষ্ঠ ভনীয়েকৰ ঘৰত গৈ আৰক্ষীয়ে শহুৰেকক জেৰা কৰে। তেওঁৰ পিতৃয়ে কয়, “আমাৰ সমগ্ৰ পৰিয়ালটো খেতিৰ লগত জড়িত। জুনেইদে শেহতীয়াকৈ এল এল বি সম্পূৰ্ণ কৰিছে।
এই ঘটনাৰ প্ৰসংগত সামাজিক মাধ্যমত বিভিন্ন ধৰণৰ মতামত দেখা গৈছে। এচামে জুনেইদ ভাইৰ সমৰ্থনত মন্তব্য কৰিছে, আনহাতে আন এচামে সম্পূৰ্ণ তথ্য ওলাই অহালৈ অপেক্ষা কৰাৰ আহ্বান জনাইছে। বিশেষজ্ঞসকলে কয় যে কোনো ঘটনাৰ ক্ষেত্ৰত চৰ্চা বা গুজৱৰ ওপৰত নিৰ্ভৰ নকৰি চৰকাৰী তথ্য আৰু নিৰ্ভৰযোগ্য উৎসৰ ওপৰত বিশ্বাস কৰাটো অতি প্ৰয়োজন।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
