ইংলেণ্ডৰ কাউণ্টি চেম্পিয়নশ্বিপত নিজৰ বলিঙৰ যাদু দেখুৱালে ভাৰতীয় তাৰকা স্পিনাৰ কুলদ্বীপ যাদৱে। হেডিংলিত অনুষ্ঠিত ডিভিজন ৱানৰ মেচখনত কুলদ্বীপৰ দুৰ্দান্ত বলিঙৰ সন্মুখত সম্পূৰ্ণৰূপে ব্যৰ্থ হৈ পৰে এচেক্স। মাত্ৰ তিনিদিনতে ইয়ৰ্কশ্বায়াৰে এচেক্সক এটা ইনিংছ আৰু ১০৬ ৰানত পৰাস্ত কৰে। এই মেচখন কুলদ্বীপ যাদৱৰ বাবে বিশেষ হৈ পৰিছে। প্ৰথম শ্ৰেণীৰ ক্ৰিকেট কেৰিয়াৰত প্ৰথমবাৰৰ বাবে এখন মেচত ১০টা উইকেট দখল কৰাৰ কৃতিত্ব অৰ্জন কৰে চাইনামেন স্পীনাৰজনে। দুয়োটা ইনিংছ মিলাই কুলদ্বীপে মুঠ ১২০ ৰান খৰচ কৰি ১০টা উইকেট দখল কৰে। এয়া তেওঁৰ প্ৰথম শ্ৰেণীৰ কেৰিয়াৰৰ সৰ্বোত্তম বলিং প্ৰদৰ্শন।
মেচখনত প্ৰথমে বেটিং কৰি ইয়ৰ্কশ্বায়াৰে ৩৯০ ৰান সংগ্ৰহ কৰে। ইয়াৰ পিছত বল হাতত লৈ এচেক্সৰ বেটিং লাইনআপত খহনীয়া সৃষ্টি কৰে ইয়ৰ্কশ্বায়াৰৰ বলাৰসকলে। এচেক্সৰ প্ৰথম ইনিংছ মাত্ৰ ১৭১ ৰানতে সমাপ্ত হয়। ইয়ৰ্কশ্বায়াৰৰ বেগী বলাৰ জৰ্জ হিলে ১২ ৰানত ৩টা উইকেট দখল কৰে। আনহাতে কুলদ্বীপ যাদৱে ২০ অভাৰত ৭০ ৰান দি ৪টা উইকেট দখল কৰে। প্ৰথম ইনিংছত বৃহৎ অগ্ৰগতি লাভ কৰাৰ পিছত ইয়ৰ্কশ্বায়াৰে এচেক্সক ফ’ল’অ’ন কৰিবলৈ বাধ্য কৰে।
ফ’ল’অ’নৰ সন্মুখীন হোৱা এচেক্সৰ দ্বিতীয় ইনিংছৰ আৰম্ভণিও ভাল নহ’ল। জৰ্জ হিলে প্ৰথম ৯ অভাৰৰ ভিতৰতে ডিন এলগাৰ আৰু টম ৱেষ্টলীক পেভিলিয়নলৈ পঠিয়াই দিয়ে। ইয়াৰ পিছত বল হাতত লৈ কুলদ্বীপ যাদৱে আৰম্ভ কৰে স্পিনৰ যাদু। লান্সৰ ঠিক পূৰ্বে তেওঁ চাৰ্লি এলিছন আৰু মেট ক্ৰিচলীক আউট কৰে। হেট্ৰিকৰ সুযোগ সৃষ্টি হৈছিল যদিও সেয়া সম্পূৰ্ণ কৰিব নোৱাৰিলে কুলদ্বীপ। অৱশ্যে তাৰ পিছত কুলদ্বীপে থমকি ৰ’বলগীয়া নহ’ল। প্ৰথম শ্লীপত লুক বেংকেনষ্টেইনৰ কেচৰ জৰিয়তে আন এটা উইকেট লাভ কৰাৰ পিছত কুলদ্বীপ জৰ্জ বেল, জামান আখতাৰ আৰু ছেম কুককো আউট কৰে। এইদৰে দ্বিতীয় ইনিংছত কুলদ্বীপে ৬টা উইকেট দখল কৰি মেচখনত মুঠ ১০টা উইকেট সম্পূৰ্ণ কৰে।
এচেক্সৰ বিৰুদ্ধে এই বৃহৎ জয়ৰ ফলত ইয়ৰ্কশ্বায়াৰে ২২ পইণ্ট লাভ কৰিছে। ১২খন মেচত দলটোৰ এয়া চতুৰ্থ জয়। এই জয়ে ইয়ৰ্কশ্বায়াৰক পইণ্ট তালিকাৰ তলৰ চাৰিটা দলৰ পৰা যথেষ্ট সুৰক্ষিত অৱস্থাত ৰাখিছে। ফলত অহা ছিজনত কাউণ্টি চেম্পিয়নশ্বিপৰ ডিভিজন ৱানত ইয়ৰ্কশ্বায়াৰৰ স্থান প্ৰায় নিশ্চিত হোৱা বুলি ক’ব পাৰি। আনহাতে, এচেক্সৰ বাবে পৰিস্থিতি অধিক চিন্তাজনক হৈ পৰিছে। চলিত ছিজনত এয়া দলটোৰ ষষ্ঠ পৰাজয়। ফলত ৰেলিগেশ্যনৰ আশংকা অধিক বৃদ্ধি পাইছে। ইফালে, অহা সপ্তাহত হেডিংলিত ইয়ৰ্কশ্বায়াৰে খিতাপৰ অন্যতম দাবীদাৰ ছামাৰচেটৰ বিৰুদ্ধে খেলিব। সেই মেচখনতো কুলদ্বীপ যাদৱৰ স্পিন বলিং দলটোৰ বাবে অন্যতম ডাঙৰ অস্ত্ৰ হিচাপে পৰিগণিত হ’ব পাৰে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
