দুলীয়াজানৰ চন্দ্ৰকান্ত ভূঞাৰ পৰিয়ালৰ তিনিগৰাকী সদস্যৰ নৃশংস হত্যাকাণ্ডৰ ঘটনাই এতিয়া নতুন মোৰ লৈছে। হত্যাকাণ্ডৰ তদন্তৰ মাজতে পোহৰলৈ আহিছে কেতবোৰ নতুন তথ্য। বিশেষকৈ হত্যাকাণ্ড পোহৰলৈ অহাৰ পূৰ্বে চন্দ্ৰকান্ত ভূঞাৰ ঘৰৰ পৰা দুজন যুৱক ওলাই অহা প্ৰত্যক্ষ কৰিছিল এগৰাকী প্ৰতিবেশী মহিলাই। এই তথ্য পোহৰলৈ অহাৰ পিছতে ঘটনাটোক লৈ সৃষ্টি হৈছে নতুন ৰহস্যৰ।
প্ৰতিবেশী মহিলাগৰাকীয়ে জানিবলৈ দিয়া অনুসৰি, ষঠ পূজাৰ প্ৰসাদ দিবলৈ তেওঁ চন্দ্ৰকান্ত ভূঞাৰ ঘৰলৈ গৈছিল। কিন্তু সেই সময়তে ঘৰৰ ছিৰিৰে নামি আহি থকা দুজন যুৱকক প্ৰত্যক্ষ কৰে মহিলাগৰাকীয়ে। যুৱক দুজনৰ সৈতে কথা-বতৰা পাতোতে তেওঁলোকে ঘৰত চন্দ্ৰকান্ত ভূঞাৰ পৰিয়ালৰ কোনো লোক নাই বুলি মহিলাগৰাকীক জানিবলৈ দিয়ে। সেয়ে মহিলাগৰাকীয়ে প্ৰসাদ নিদিয়াকৈয়ে উভতি আহে।
আটাইতকৈ গুৰুত্বপূৰ্ণ কথাটো হ’ল, সেই দুজন যুৱকৰ ভিতৰত এজনৰ নাম আছিল ৰাজু। জানিব পৰা মতে, ৰাজু আছিল চন্দ্ৰকান্ত ভূঞাৰ আন এটা ঘৰৰ ভাড়াতীয়া। আনহাতে, ৰাজুৰ সৈতে থকা আনজন যুৱকক চিনাক্ত কৰিব পৰা নাছিল প্ৰতিবেশী মহিলাগৰাকীয়ে। অৰ্থাৎ হত্যাকাণ্ড সংঘটিত হোৱাৰ পূৰ্বে চন্দ্ৰকান্ত ভূঞাৰ ঘৰত ৰাজুৰ উপস্থিতিৰ তথ্যই এতিয়া তদন্তৰ ক্ষেত্ৰত বিশেষ তাৎপৰ্য বহন কৰিছে।
ইফালে, হত্যাকাণ্ডৰ ঘটনা পোহৰলৈ অহাৰ পিছৰে পৰা স্থানীয় লোকে ৰাজুক দেখা পোৱা নাই বুলি জানিব পৰা গৈছে। যাৰ ফলত ৰাজুৰ সন্ধান আৰু তেওঁৰ সৈতে থকা অচিনাকী যুৱকজনৰ পৰিচয়ক লৈও সৃষ্টি হৈছে বিভিন্ন প্ৰশ্নৰ। হত্যাকাণ্ড সংঘটিত হোৱাৰ পূৰ্বে ৰাজু কিয় চন্দ্ৰকান্ত ভূঞাৰ ঘৰলৈ গৈছিল? তেওঁৰ সৈতে থকা যুৱকজন কোন আছিল? সেই সময়ত ঘৰৰ ভিতৰত প্ৰকৃততে কি পৰিস্থিতিৰ সৃষ্টি হৈছিল? এই প্ৰশ্নসমূহৰ উত্তৰ এতিয়াও পোহৰলৈ অহা নাই।
উল্লেখ্য যে, ইয়াৰ পিছতে চন্দ্ৰকান্ত ভূঞাৰ ঘৰৰ ভিতৰত উদ্ধাৰ হৈছিল পৰিয়ালটোৰ তিনিগৰাকী সদস্যৰ মৃতদেহ। ঘৰৰ ভিতৰত ক্ষত-বিক্ষত অৱস্থাত উদ্ধাৰ হৈছিল চন্দ্ৰকান্ত ভূঞা, তেওঁৰ পত্নী এলিজা ভূঞা আৰু কন্যা নিহাৰিকা ভূঞাৰ মৃতদেহ। তিনিওগৰাকীৰ মৃতদেহ ঘৰৰ মজিয়াত পৰি থকা অৱস্থাত উদ্ধাৰ কৰা হৈছিল।
ঘটনাটো পোহৰলৈ অহাৰ পিছত ঘটনাস্থলীত উপস্থিত হোৱা নিহাৰিকা ভূঞাৰ এগৰাকী বান্ধৱীয়েও ঘৰৰ ভিতৰৰ পৰিস্থিতিৰ সন্দৰ্ভত কেতবোৰ তথ্য সদৰী কৰিছে। তেওঁৰ ভাষ্য অনুসৰি, ঘৰৰ ভিতৰত থকা আলমিৰাটো খোলা অৱস্থাত আছিল। আনকি আলমিৰাৰ ভিতৰত থকা কাপোৰ-কানিও বিশৃংখলভাৱে সিঁচৰতি হৈ আছিল। এই দৃশ্যই ঘৰৰ ভিতৰত কোনোবাই বস্তু-বাহানি লণ্ডভণ্ড কৰাৰ আশংকাৰ দিশটোও উত্থাপন কৰিছে।
এতিয়া সমগ্ৰ ঘটনাটোক লৈ কেইবাটাও গুৰুত্বপূৰ্ণ প্ৰশ্নৰ সৃষ্টি হৈছে। ৰাজু নামৰ যুৱকজন হত্যাকাণ্ডৰ পূৰ্বে চন্দ্ৰকান্ত ভূঞাৰ ঘৰলৈ কিয় গৈছিল? তেওঁৰ সৈতে অহা অচিনাকী যুৱকজন কোন? প্ৰতিবেশী মহিলাগৰাকীক পৰিয়ালৰ লোক ঘৰত নাই বুলি কিয় কৈছিল তেওঁলোকে? ঘৰৰ আলমিৰা আৰু কাপোৰ-কানি কোনে বিশৃংখল কৰিছিল?
এই সকলোবোৰ প্ৰশ্নৰ উত্তৰ তদন্তৰ পিছতহে স্পষ্ট হ’ব। অৱশ্যে প্ৰতিবেশী মহিলাগৰাকীৰ এই নতুন ভাষ্যই দুলীয়াজানৰ তিনিজনীয়া পৰিয়ালটোৰ হত্যাকাণ্ডৰ তদন্তত এক নতুন দিশ উন্মোচন কৰাৰ সম্ভাৱনা সৃষ্টি কৰিছে। ৰাজু আৰু তেওঁৰ সৈতে থকা অচিনাকী যুৱকজনৰ সন্ধান তথা তেওঁলোকৰ সৈতে হত্যাকাণ্ডৰ কোনো সম্পৰ্ক আছে নেকি, সেয়া এতিয়া তদন্তৰ গুৰুত্বপূৰ্ণ বিষয় হৈ পৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ

















