অসম লাইভ ২৪ঃ প্ৰেমত ঘূৰে ভূমণ্ডল, প্ৰেমত ফুলে শতদল। প্ৰকৃত প্ৰেম দুৰন্ত, ইয়াৰ নিজস্ব গতিক বাধা দিয়াৰ ক্ষমতা কাৰো হাতত নাথাকে। কিন্তু কেতিয়াবা প্ৰেমৰ সেই গতিয়ে বিপদত পেলাই বহু প্ৰেমিক পক্ষীক। তেনে এটি ঘটনা ঘটিছে ঝাৰখণ্ডত। যত প্ৰেমিকে চুক্তি কৰিবলগীয়া হৈছে পত্নী আৰু গাৰ্লফ্ৰেইণ্ডৰ সৈতে। চুক্তি মতে ৩ দিন পত্নীৰ সৈতে, ৩ গাৰ্লফ্ৰেইণ্ডৰ সৈতে আৰু ১ দিন নিজৰ ইচ্ছামতে থাকিব লাগিব প্ৰেমিকে। ঘটনা অনুসৰি ৰাঁচীৰ ৰাজেশ নামৰ এজন লোকে নিজৰ সন্তান আৰু পত্নীক এৰি নিজকে অবিবাহিত বুলি কৈ এগৰাকী যুৱতীক প্ৰেমৰ জালত আবদ্ধ কৰে। পিছৰ পৰ্যায়ত যুৱতীগৰাকী লৈ পলায়ন কৰে। ঘটনাৰ খবৰ পাই পত্নীয়ে থানাত গোচৰ দিয়ে। ইপিনে যুৱতীৰ পৰিয়ালেও থানাত তেওঁলোকৰ কন্যাক অপহৰণৰ গোচৰ দিয়ে। অভিযোগ লাভ কৰি আৰক্ষীয়ে দুয়োকে ধৰি থানালৈ লৈ আহে। থানাৰ ভিতৰতে আৰম্ভ হয় ৰাজেশৰ পত্নী-গাৰ্লফ্ৰেইণ্ডৰ দুৰ্ঘোৰ কাজিয়া। উপায়ন্তৰ হৈ আৰক্ষীয়ে সম্পন্ন কৰে এক বুজাবুজিৰ লিখিত চুক্তি। চুক্তি অনুসৰি সপ্তাহটোত ৰাজেশে পত্নীৰ লগত থাকিব লাগিব ৩ দিন আৰু গাৰ্লফ্ৰেইণ্ডৰ লগত থাকিব লাগিব ৩ দিন। আৰু বাকী থকা ১ দিন নিজৰ ইচ্ছামতে থাকিব পাৰিব ৰাজেশে। পত্নী-গাৰ্লফ্ৰেইণ্ডেও মানি লৈছিল সেই চুক্তি। কিন্তু তেওঁলোকৰ এই চুক্তি বেছি দিন নিটিকিল। ৩ দিন, ৩ দিন থকা চুক্তি পালন কৰা অসফল হয় ৰাজেশ। তাৰ পাছতে গাৰ্লফ্ৰেইণ্ডে ৰাজেশৰ বিৰুদ্ধে বিয়াৰ প্ৰলোভনেৰে যৌন শোষণৰ অভিযোগ আনি আৰক্ষীৰ কাষ চাপে। এতিয়া ন্যায়ালয়ে ৰাজেশৰ বিৰুদ্ধে গ্ৰেপ্তাৰী পৰোৱানা জাৰি কৰিছে। আৰক্ষীয়ে ৰাজেশক গ্ৰেপ্তাৰৰ চেষ্টা চলাই আছে যদিও ৰাজেশ পলাতক। এয়াও প্ৰেম…
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ