নতুনকৈ বিয়া হৈছিল৷ নৱদম্পতি হানিমুনলৈ যোৱাটোও খুবেই স্বাভাৱিক৷ সেইধৰণেই উত্তৰপ্ৰদেশৰ মহাৰাজগঞ্জৰ বাসিন্দা নৱদম্পতিহালো হানিমুনলৈ গৈছিল৷ ডেষ্টিনেছন আছিল গোৱা৷ কিন্তু তালৈ গৈয়েই জীৱনে ল’লে নতুন পথ৷ শেষপৰ্যন্ত হানিমুন আধাতে সামৰি নৱবিবাহিতা বোৱাৰীগৰাকী পালেগৈ নিজা ঘৰ৷ তাৰপিছতেই এতিয়া থানালৈ আহযাহ দৰাপক্ষৰ৷ কিন্তু ঘটনা কি?
বিগত ১২ ফেব্ৰুৱাৰীত হিন্দু ৰীতি মানি চিকিৎসক ৰত্নেছ গুপ্তৰ সৈতে বিবাহবন্ধনত আৱদ্ধ হৈছিল যুৱতীগৰাকী৷ জীৱনৰ বহু আকাংক্ষা লৈ শহুৰৰ ঘৰত ভৰি দিছিল যুৱতীগৰাকীয়ে৷ কিন্তু সংসাৰৰ আৰম্ভণিতেই ছন্দপতন৷ শহুৰৰ ঘৰৰ পৰা ন বোৱাৰীৰ ওপৰত চলিল শাৰীৰিক মানসিক নিৰ্যাতন৷ সমস্যা সমাধানৰ বাবে শহুৰৰ ঘৰলৈ গৈ সমস্যাৰ মিমাংসা কৰি আহে ন বোৱাৰীৰ পিতৃ মাতৃয়ে৷ কিন্তু তাৰপিছতো শহুৰৰ ঘৰৰ পৰা চলি থাকিল নিৰ্যাতন৷
ইয়াৰপাছতেই বিগত ১৯ ফেব্ৰুৱাৰীত স্বামী স্ত্ৰী দুয়ো গোৱালৈ হানিমুনৰ বাবে যায়৷ ইয়াৰপাছতেই ঘটনাই লয় অন্য ৰূপ৷ বোৱাৰীৰ অভিযোগ যে, তেওঁৰ স্বামীয়ে মাজনিশা হোটেলত তেওঁৰ ওপৰত শাৰীৰিক নিৰ্যাতন চলোৱাৰ ওপৰিও শ্বাসৰোধ কৰি হত্যা কৰাৰ চেষ্টা কৰিছিল৷
পৰিস্থিতি সম্পৰ্কে পৰিয়ালৰ লোকক জনোৱাৰ পাছতেই নিৰ্যাতিতাৰ পিতৃ মাতৃয়ে কন্যাক উভতি আহিবলৈ বিমানৰ ব্যৱস্থা কৰে৷ বিগত ২২ ফেব্ৰুৱাৰীত তেওঁলোকে কন্যাক ঘৰলৈ উভতাই নিয়ে৷ আৰু উভতাই নিয়াৰ পাছতেই নিৰ্যাতিতা বোৱাৰীগৰাকীয়ে তেওঁৰ স্বামী আৰু পৰিয়ালৰ লোকৰ বিৰুদ্ধে অভিযোগ দাখিল কৰিছে৷ আৰক্ষীয়ে এই সন্দৰ্ভত জনাইছে যে বোৱাৰীগৰাকীৰ অভিযোগৰ ভিত্তিত মাৰধৰ, যৌতুক আৰু হত্যাৰ চেষ্টাসহ একাধিক ধাৰাত গোচৰ ৰুজু কৰা হৈছে৷ তদন্তও চলিছে৷ পৰবৰ্তী আইনী ব্যৱস্থাও অচিৰেই গ্ৰহণ কৰিব আৰক্ষীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
