অসম লাইভ২৪ঃ সংসদীয় এথিক্স কমিটিৰ ৰিপৰ্টত অৱশেষত ছিলমোহৰ পৰিল। লোকসভাৰ পৰা বহিষ্কাৰ কৰা হ’ল সাংসদ মহুৱা মৈত্ৰক। শুকুৰবাৰে লোকসভাত ধ্বনি ভোটত এই সিদ্ধান্ত গ্ৰহণ কৰা হয়। কেছ ফল কোৱাৰী বিতৰ্কত শেষ পৰ্যন্ত মহুৱাই হেৰুৱালে সাংসদ পদ। বিদেশী কৰ্পৰেট দুনীয়াৰ ডাঙৰ পদ এৰি ২০০৯ চনত ৰাজনীতিত প্ৰৱেশ কৰে মহুৱাই। প্ৰথমে যুৱ কংগ্ৰেছ। তাৰপাছতেই ২০১০ চনত তেওঁ যোগ দিয়ে তৃণমূল কংগ্ৰেছত। সাংসদ হোৱাৰ পূৰ্বে বিধায়কৰ গুৰুদায়িত্বও হৈছিল মহুৱা মৈত্ৰই।
২০১৬ চনত বিধানসভা নিৰ্বাচনত নদিয়াৰ কৰিমপুৰৰ প্ৰাৰ্থী হিচাপে মহুৱাক আগবঢ়াই দিছিল মমতা বেনাৰ্জীয়ে। দলনেত্ৰীক নিৰাশ নকৰিলে মহুৱাই। তাৰপাছতেই ২০১৯ চনত লোকসভা নিৰ্বাচনত কৃষ্ণনগৰৰ পৰা নিৰ্বাচনত জয়ী হৈ সাংসদ হয় মহুৱা। কৰ্পৰেট দুনীয়াক বাই বাই দি ৰাজনীতিত প্ৰৱেশ কৰা মহুৱাৰ সম্পত্তিয়েই তেওঁৰ ৰাজনৈতিক কেৰিয়াৰতো আঁচোৰ পেলালে। কিন্তু মহুৱা মৈত্ৰৰ মুঠ সম্পত্তিৰ পৰিমান কিমান জানেনে?
২০১৯ চনৰ নিৰ্বাচনত মনোনয়ন পত্ৰ দাখিল কৰোতে মহুৱাই তেওঁৰ সম্পত্তিৰ তালিকা দাখিল কৰিছিল। মহুৱাৰ কোটিকোটি টকাৰ সম্পত্তি থকাৰ কথা তেতিয়াও চৰ্চা হৈছিল। সেই সময়ত মহুৱাৰ মুঠ সম্পত্তি আছিল ২ কোটি ৬৪লাখ ৯৫ হাজাৰ ২৫০টকাৰ। ইয়াৰ মাজতেই নিৰ্বাচনী খৰচৰ বাবে এক ৰাষ্ট্ৰায়ত্ত বেংকৰ কৃষ্ণনগৰ শাখাত আছিল ৪৪হাজাৰ ৭৬৪ টকা। ইয়াৰোপৰি বিভিন্ন বেংকৰ ছেভিংছ একাউণ্ট, ফিক্সড ডিপোজিট, টাৰ্ম ডিপোজিটো আছে। এই সকলোবোৰৰ যদি মুঠ হিচাপ উলিওৱা হয় তেন্তে মহুৱাৰ মুঠ টকাৰ পৰিমান ১ কোটি ৪৪লাখ ৭৫ হাজাৰ ১১১ টকা। নিৰ্বাচনী হলফনামা অনুসৰি বিদেশী বেংকতো ধন আছে মহুৱাৰ।
এটা বিদেশী বেংকৰ ব্ৰিটেইনৰ লণ্ডল শাখাত থকা ধনৰ পৰিমান ভাৰতীয় মুদ্ৰাত ১ লাখ ৩০ হাজাৰ ৭৮২ টকা। তেওঁৰ হাতত থকা নগদ ধনৰ পৰিমান আছিল ৫হাজাৰ টকা। ধনৰ ওপৰিও মহুৱাৰ সম্পত্তিৰ তালিকাত আছে বিভিন্ন মুল্যৱান গহনা। ইয়াৰ ভিতৰত আছে ৩.২ কেৰেটৰ এটা হীৰাৰ আঙুঠি এই আঙুঠিৰ দাম ৭০ লাখ টকা। ১৫০ গ্ৰাম সোনৰ গহনাও আছে। ইয়াৰ দাম প্ৰায় ৫ লাখ টকা। ইয়াৰোপৰি ৰূপৰ ডিনাৰ চেট, ৰূপৰ চাহ খোৱা পাত্ৰসহ বিভিন্ন ৰূপৰ সামগ্ৰীও তেওঁৰ ঘৰত আছে। ৰূপৰ সকলো সামগ্ৰীৰ মিলি তেওঁৰ ঘৰত প্ৰায় ৫লাখ ৬৮ হাজাৰ টকাৰ ৰূপ আছে। অন্যান্য গহনা আছে প্ৰায় ৫লাখ টকাৰ।
এইসমূহৰ ওপৰিও মহুৱাৰ আছে শিল্প সংগ্ৰহৰ নিছা। সেইসমূহতো তেওঁ প্ৰচুৰ অৰ্থ ব্যয় কৰি আহিছে। ২০১৯ চনৰ হিচাপ অনুসৰি মহুৱাৰ হাতত আছে প্ৰায় ২৫ লাখ টকাৰ নামী দামী শিল্প। নিৰ্বাচনী হলফনামাত উল্লেখ থকামতে মহুৱাৰ আছে এখন স্কৰপিঅ’ বাহন। এই বাহন মহুৱাই ক্ৰয় কৰিছিল ২০১৬ চনৰ চেপ্টেম্বৰ মাহত। ২০১৯ চনত সেই বাহনৰ দাম আছিল ৯লাখ ৭হাজাৰ ৩৭৫ টকা। গাড়ী ক্ৰয়ৰ বাবে তেওঁ কিন্তু ঋণ লৈছিল। ২০১৯ চনৰ ৩১ মাৰ্চ পৰ্যন্ত তেওঁৰ মূৰত আছিল ৬লাখ ৭১ হাজাৰ ১৩৮ টকাৰ ঋণ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
