সমাপ্ত হ’ল দেশৰ অন্যতম জনপ্ৰিয় ৰিয়েলিটী শ্ব’ মাষ্টাৰচেফ ইণ্ডিয়াৰ ছিজন ৮। শুকুৰবাৰে অনুষ্ঠিত হোৱা ফিনালেত ঘোষণা কৰা হয় প্ৰায় আঠ সপ্তাহ চলা ৰন্ধন প্ৰতিযোগিতাখনৰ বিজয়ীৰ নাম। মাষ্টাৰচেফ ইণ্ডিয়াৰ ছিজন ৮ ৰ চূড়ান্ত বিজয়ীৰ খিতাপ দখল কৰিবলৈ সক্ষম হয় মহম্মদ আছিক।
কষ্ট, চেষ্টা আৰু একাগ্ৰতাই অৱশেষত হাঁহি বিৰিঙালে আছিকৰ মুখত। দেশৰ ভিন্ন প্ৰান্তৰ প্ৰতিযোগীসকলৰ লগত প্ৰতিদ্বন্দ্বিতা কৰি আছিকে জয় কৰিলে মাষ্টাৰচেফ ইণ্ডিয়াৰ ছিজন ৮ৰ খিতাপ। মাষ্টাৰচেফ ইণ্ডিয়াৰ ছিজন ৮ৰ বিচাৰক ৰণবীৰ ব্ৰাৰ, বিকাশ খান্ন আৰু পূজা ঢিংৰাই দক্ষতাৰ পৰীক্ষা কৰি মহম্মদ আছিকক বিজেতা ঘোষণা কৰে। আছিকৰ লগতে ফিনালেৰ আন দুগৰাকী প্ৰতিযোগী আছিল নাম্বী জেছিকা মাৰাক আৰু ৰুখছাৰ ছয়ীদ। নাম্বী জেছিকা মাৰাকে প্ৰথম ৰানাৰ আপ হোৱাৰ বিপৰীতে দ্বিতীয় ৰানাৰ আপত সন্তুষ্ট থাকিবলগীয়া হয় ৰুখছাৰ ছয়ীদে।
মাষ্টাৰচেফ ইণ্ডিয়াৰ ছিজন ৮ৰ বিজয়ী মহম্মদ আছিকে ট্ৰফীৰ লগতে লাভ কৰে ২৫ লাখ টকাৰ চেক। বিচাৰক ৰণবীৰ ব্ৰাৰে আছিকক শুভেচ্ছা জনাই সামাজিক মাধ্যমত এক পোষ্ট শ্বেয়াৰ কৰি লিখে, ‘প্ৰেৰণাদায়ক আৰম্ভণিৰ পৰা প্ৰত্যাহ্বানমূলক যাত্ৰাত আপুনি সাহসেৰে আগবাঢ়ি গ’ল। মাষ্টাৰচেফ হোৱাৰ অভিনন্দন আছিক।’
কৰ্ণাটকৰ মাংগালোৰৰ বাসিন্দা আছিকে মাষ্টাৰচেফলৈ অহাৰ পূৰ্বে নিজৰ গাঁৱত এখন জুচৰ দোকান চলাইছিল। ৰন্ধনত যথেষ্ট ৰাপ থকা মহম্মদ আছিকে মাষ্টাৰচেফলৈ অহাৰ মন বান্ধি লয়। আৰু নিজৰ চেষ্টা আৰু দক্ষতাৰ ফলত মাষ্টাৰচেফৰ খিতাপ দখল কৰিবলৈ সক্ষম হয়। উল্লেখযোগ্য যে, মাষ্টাৰচেফৰ ইয়াৰ পূৰ্বৰ ছিজনতো ভাগ লোৱা আছিক সফল হ’ব পৰা নাছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
