বৰ্তমান সময়ত মোবাইল অবিহনে জীৱনটো কল্পনা কৰা অসম্ভৱেই! মোবাইলবিহীন জীৱন আমাৰ বাবে কল্পনাতীত৷ যুগৰ হাতত ধৰি আগবাঢ়িছে বিজ্ঞান৷ বিজ্ঞানৰেই এক আৱিষ্কাৰ মোবাইল ফোন৷ আজিৰ পৰা প্ৰায় ৫০ বছৰমান পূৰ্বে মানুহে এজনৰ সৈতে আনজনৰ সংযোগ স্থাপন কৰিবলৈ চিঠি লিখিছিল৷ চিঠিৰ জৰিয়তেই সংযোগ স্থাপন কৰিছিল৷ চিঠিৰ উত্তৰ পাবলৈকে কেতিয়াবা মাহৰ পিছত মাহ ৰ’ব লগাও হৈছিল৷
মোবাইলৰ কৃপাতে আজি হাতৰ মুঠিতে উপলব্ধ সমগ্ৰ বিশ্ব। বিশ্বৰ যিকোনো প্ৰান্তত ঘটা ঘটনাৰ খবৰ লাভ কৰিবলৈ আমাক প্ৰয়োজন এতিয়া মাত্ৰ কেইটামান মুহূৰ্তৰ। সকলোক্ষেত্ৰতেই মোবাইলটোৰ ওপৰতে আমি নিৰ্ভৰশীল। কিন্তু এই অভূতপূৰ্ব সৃষ্টিক লৈয়ে আজি দুখ প্ৰকাশ কৰিছে মোবাইলৰ আবিস্কাৰক মাৰ্টিন কুপাৰে। নিজে সৃষ্টি কৰা সামগ্ৰীক লৈয়েই কিয় অসন্তুষ্ট বিজ্ঞানীজন?
১৯৭৩ চনৰ ৩ এপ্ৰিলৰ দিনটোতে বিজ্ঞানে লাভ কৰিছিল নতুন মাত্ৰা। প্ৰথমটো মোবাইল ফোন নিৰ্মাণ কৰি মাৰ্টিন কুপাৰে সমগ্ৰ বিশ্বতে সৃষ্টি কৰিছিল খলকনিৰ। পৰম্পৰাগত তাঁৰযুক্ত টেলিফোনৰ বিপৰীতে প্ৰথমটো ৱাৰলেচ ফোন নিৰ্মাণেৰে চমক সৃষ্টি কৰিছিল কুপাৰে। লাহে লাহে বৃদ্ধি পাবলৈ ধৰিলে মোবাইলৰ জনপ্ৰিয়তা। আমেৰিকা যুক্তৰাষ্ট্ৰৰ মটৰ’লা কোম্পানীত কৰ্মৰত মাৰ্টিন কুপাৰ আৰু জ’ন ফ্ৰাঞ্চিচ মিচেল নামৰ বিজ্ঞানীয়ে আৱিস্কাৰ কৰা মোবাইল ফোনটোয়ে কেইবাটাও ঢাপ পাৰহৈ আজি লাভ কৰিছে স্মাৰ্ট ফোনৰ স্তৰ।
পিছে এই স্মাৰ্ট ফোনে এতিয়া যেন সকলোৰে মাজত দুৰত্ব হ্ৰাস কৰাতকৈ দুৰত্ব বৃদ্ধি কৰাতহে অৰিহনা যোগাইছে। এনে এটা পৰ্যায় আহি পাইছে যে, দুজন মানুহে একেলগ হলেও কথা পতাতকৈ বেছি মোবাইলটোকহে গুৰুত্ব দিয়ে। বহুতে অভিযোগ কৰে যে, মোবাইল ফোনটোয়েই এতিয়া মানুহক এখন কল্পনাৰ পৃথিৱীক অগ্ৰাধিকাৰ দিয়াতহে সহায় কৰিছে। এনেবোৰ অভিযোগৰ বাবেই আৱিস্কাৰক কুপাৰে আজি নিজৰ সৃষ্টিক লৈ অনুশোচনা কৰিছে। আজি কিছুদিনৰ পূৰ্বে, এটা সাক্ষাত্কাৰত তেঁও দুখ প্ৰকাশ কৰি কয়, ‘জীৱন উপভোগ কৰিবলৈ হ’লে মোবাইল ফোনৰ ব্যৱহাৰ কমাই দিয়ক।’ উল্লেখ্য যে, দিনটোৰ ৫ শতাংশ সময়হে মোবাইল ব্যৱহাৰ কৰে আৱিস্কাৰক কুপাৰে। কিন্তু ইয়াৰ মাজতে দিনটোৰ অধিকাংশ সময়ে মবাইলত ব্যস্ত থাকে একাংশ লোকে। নৱপ্ৰজন্মৰ মাজত এই প্ৰৱণতা অত্যাধিক দেখিবলৈ পোৱা যায়। এনেবোৰ কাৰণতে আজি কুপাৰে কৈছে- যেতিয়া এজন ব্যক্তিয়ে মোবাইলত দৃষ্টি নিবদ্ধ কৰি ৰাস্তা পাৰ হবলৈ চেষ্টা কৰে, তেতিয়াই অন্তৰে হাহাকাৰ কৰি উঠে। মবাইল আবিস্কাৰৰ ৫০ বছৰৰ পূৰ্তিৰ প্ৰাকক্ষণত আৱিস্কাৰৰ এই মন্তব্যই এতিয়া সকলোকে এবাৰলৈ চিন্তা কৰিবলৈ বাধ্য কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
