অসম লাইভ২৪ঃ নিউ ইয়েৰ জাপানৰ বাবে মুঠেও হেপ্পী নহয়। প্রথম দিনৰ আৰম্ভণিয়েই হৈছে ভয়ংকৰ ভূমিকম্পৰে। ১ জানুৱাৰী পুৱাই জাপান কঁপি উঠিল বিধ্বংসী ভূমিকম্পৰে। ৰিখটাৰ স্কেলত যাৰ মাত্ৰা ৭.৬ ৰিখটাৰ স্কেল। ইতিমধ্যেই জাৰি কৰা হৈছে চুনামীৰ সতৰ্কতাও। বিভিন্ন সূত্ৰৰ খবৰ অনুসৰি দেশৰ পশ্চিম প্ৰান্তত এই কম্পন অনুভূত গৈছে। সমগ্ৰ উত্তৰ পশ্চিম এলেকাজুৰি এই এলাৰ্ট জাৰি কৰিছে জাপান চৰকাৰে। ইতিমধ্যেই জাপানৰ কেইবাখনো চহৰত পাঁচ মিটাৰ উচ্চতালৈ সাগৰৰ ঢৌ উঠিছে। তীব্ৰ আতংকই বিৰাজ কৰিছে এতিয়া জাপানৰ বাসিন্দাসকলৰ মাজত। আতংকিত বহুলোকেই নিজৰ অট্টালিকাৰ পৰা ৰাস্তালৈকো ওলাই আহিছে।
ভূমিকম্পৰ ক্ষয়ক্ষতি
জাপানৰ চৰকাৰী সংবাদমাধ্যমৰ সূত্ৰই জনোৱা অনুসৰি ভূমিকম্পৰ কম্পন অনুভূত হৈছে ৰাজধানী চহৰ টকিঅ’তো। কাণ্টো এলেকাতো প্ৰৱল কম্পন অনুভূত হৈছে। একাধিক লোক হতাহতি হোৱাৰ আশংকাও ব্যক্ত কৰিছে জাপান চৰকাৰে। অৱশ্য বৰ্তমানলৈ চৰকাৰীভাৱে আহত নিহতৰ কোনো তালিকা প্ৰকাশ কৰা হোৱা নাই।
জাপানৰ দুৰ্যোগ ব্যৱস্থাপনা বিভাগৰ তৰফৰ পৰা জাৰি কৰা সতৰ্কতা অনুসৰি পশ্চিম প্ৰান্তৰ সমুদ্ৰ উপকূলবৰ্তী চহৰসমূহত চুনামী অহাৰো সম্ভাৱনা আছে। ইছিকাওৱা, নিগাতা আৰু তোয়ামাতত এলাৰ্ট জাৰি কৰা হৈছে। চুনামীৰ সতৰ্কতা জাৰি হোৱাৰ পাছতেই জাপানৰ কেন্দ্ৰীয় সচিবে দেশৰ মানুহক নিৰাপদ স্থানলৈ যাবলৈ পৰামৰ্শ দিছে। এই ভয়ংকৰ ভূমিকম্পত অৱশ্যে জাপানৰ শিখা নিউক্লিয়াৰ প্লেণ্টৰ কোনো ক্ষতি হোৱা নাই বুলি জনাইছে নিউক্লিয়েৰ ৰেগুলেশ্ব্যন অথৰিটিয়ে। ইতিমধ্যেই একাধিক ডাঙৰ ডাঙৰ ৰাস্তাত যান বাহনৰ চলাচল বন্ধ কৰি দিছে প্ৰশাসনে। ওয়াজিমা, ইছিকাওৱা চহৰৰ বহু ৰাস্তা অৱশ্যে খহি পৰিছে। ভূমিকম্পৰ এপিচেণ্টাৰৰ পৰা ৩০০ কিঃমিঃ দূৰলৈকে চুনামীৰ ঢৌ অহাৰ সম্ভাৱনা ব্যক্ত কৰিছে জাপান দুৰ্যোগ ব্যৱস্থাপনা বিভাগে। জাপানৰ বিদ্যুত বিভাগে জনোৱা অনুসৰি জাপানৰ প্ৰায় ৩৬ হাজাৰতকৈ অধিক বাসগৃহত ভূমিকম্পৰ পাছতেই বিদ্যুত সংযোগ ব্যাহত হৈছে। জাপানৰ এই বৃহৎ ভূমিকম্পৰ পাছতেই চুনামীৰ সতৰ্কতা জাৰি কৰা হৈছে ৰাছিয়া আৰু কোৰিয়াতো।
কিয় জাপানত ঘনাই ভূমিকম্প আৰু ছুনামী আহে?
প্ৰশান্ত মহাসাগৰীয় ৰিং অফ ফায়াৰৰ কাৰণে টেকটনিক প্লেটত বাৰে বাৰে ঘৰ্ষণ হয়। সেয়ে জাপানত ঘনাই ভূমিকম্প আহে। ২০১১ চনৰ ১১ মাৰ্চত ৰিখটাৰ স্কেলত ৯ মাত্ৰাৰ এটা ভয়াৱহ ভূমিকম্প আহিছিল। উত্তৰ পূব সমুদ্ৰ উপকূলবৰ্তী এলেকা নিশ্চিহ্ন হৈ পৰিছিল এই ভূমিকম্পত। জাপানৰ হংসু দ্বীপ মানচিত্ৰৰ পৰাই নোহোৱা হৈ গৈছিল। জাপানৰ ইতিহাসত সেয়াই আছিল সকলোতকৈ বিধ্বংসী ভূমিকম্প। ইয়াৰপাছতেই এটাৰ পাছত আনটো ছুনামী আহিছে জাপানত। সেইবাৰৰ ছুনামীতেই প্ৰায় ১৮ হাজাৰৰো অধিক লোকে প্ৰাণ হেৰুৱাইছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
