ব্ৰিটিছসকলৰ কিছুমান কাণ্ড-কাৰখানাই প্ৰায়ে সমগ্ৰ বিশ্বত চৰ্চা লাভ কৰে। এসময়ত সমগ্ৰ বিশ্বৰ প্ৰায় আধা অংশতে ৰাজত্ব কৰা ব্ৰিটিছসকলৰ শৌৰ্য-বীৰ্যৰ প্ৰতীক লণ্ডনৰ প্ৰধানমন্ত্ৰীৰ চৰকাৰী বাসভৱনৰ 10 Downing Streetৰ এটা আমোদজনক ঘটনা বা নিয়মে আপোনাকো আমোদ দিব। প্ৰধানমন্ত্ৰীৰ চৰকাৰী বাসভৱনত এন্দুৰক নিয়ন্ত্ৰণ কৰিবলৈ তেওঁলোকে নিযুক্তি দিছে এটা মেকুৰীক। অৱশ্যে এয়া আজিৰ কথা নহয়, প্ৰায় ১৫ বছৰ পূৰ্বেই এন্দুৰক নিয়ন্ত্ৰণ কৰাৰ বাবে এটা মেকুৰীক দিয়া হৈছিল নিযুক্তি আৰু সেই মেকুৰীটোৰ নাম হৈছে ‘লেৰী দ্য কেট’। ‘লেৰী দ্য কেট’ হৈছে বিশ্বৰ আটাইতকৈ বিখ্যাত চৰকাৰীভাৱে নিযুক্তি পোৱা জন্তুসমূহৰ ভিতৰত অন্যতম। ‘লেৰী দ্য কেট’-এ ব্ৰিটেইনৰ প্ৰধানমন্ত্ৰীৰ চৰকাৰী বাসভৱন 10 Downing Streetত বাস কৰে আৰু ‘Chief Mouser to the Cabinet Office’হিচাপে কাৰ্যনিৰ্বাহ কৰে। ২০১১ চনৰ পৰা ‘লেৰী দ্য কেট’-এ এই পদত কাৰ্যনিৰ্বাহ কৰি আছে আৰু বিগত ১০ বছৰত ৬গৰাকীকৈ ব্ৰিটিছ প্ৰধানমন্ত্ৰীৰ শপত গ্ৰহণ আৰু পদত্যাগৰ ঘটনাৰ সৈতেও সাক্ষী হৈ আছে। সম্প্ৰতি ব্ৰিটেইনত ‘লেৰী দ্য কেট’ একপ্ৰকাৰ ৰাষ্ট্ৰীয় প্ৰতীকত পৰিণত হৈছে। ‘লেৰী দ্য কেট’ প্ৰকৃততে এটা মেকুৰী যাৰ কাম হৈছে ব্ৰিটেইনৰ প্ৰধানমন্ত্ৰীৰ চৰকাৰী বাসভৱনত এন্দুৰ ধৰা বা নিয়ন্ত্ৰণ কৰাৰ বাবে নিযুক্তি দিয়া হৈছিল।
Chief Mouser পদত নিযুক্তিপ্ৰাপ্ত মেকুৰী
লেৰী হৈছে প্ৰথম মেকুৰী যাক আনুষ্ঠানিকভাৱে ‘Chief Mouser to the Cabinet Office’ উপাধি দিয়া হৈছিল। তেওঁৰ মূল দায়িত্বসমূহ হৈছে— চৰকাৰী ভৱনত এন্দুৰ নিয়ন্ত্ৰণ কৰা, চৰকাৰী ভৱনলৈ অহা আমন্ত্ৰিত অতিথিসকলক স্বাগতম জনোৱা। ব্ৰিটেইনৰ ৬গৰাকীকৈ প্ৰধানমন্ত্ৰীৰ হৈ কাম কৰাৰ অভিজ্ঞতা অৰ্জন কৰিছে লেৰীয়ে। লেৰীয়ে ডেভিড কেমৰুন, থেৰেছা মে, বৰিছ জনশ্যন, লিজ ট্ৰাছ, ঋষি চুনক আৰু কেইৰ ষ্টাৰ্মাৰৰ অধীনত ১০ ডাউনিং ষ্ট্ৰীটত কাম কৰিছে।
জন্ম আৰু প্ৰাৰম্ভিক জীৱন
লেৰীৰ জন্ম কেতিয়া হৈছিল ইয়াৰ কোনো আনুষ্ঠানিক তথ্য নাই যদিও প্ৰায় ২০০৭ চনত ইংলেণ্ডৰ কোনো অঞ্চলত হোৱা বুলি ধাৰণা কৰা হয়। এটা সময়ত লৰীক কোনো ব্ৰিটিছ ভদ্ৰলোকে পথৰ পৰা উদ্ধাৰ কৰি Battersea Dogs & Cats Home নামৰ পশু উদ্ধাৰ কেন্দ্ৰলৈ নিয়ে আৰু তাতেই লৰীৰ যত্ন লোৱা হৈছিল। ২০১১ চনত ব্ৰিটিছ চৰকাৰে ১০ ডাউনিং ষ্ট্ৰীটত এন্দুৰৰ সমস্যাৰ বাবে এটা দক্ষ মেকুৰী বিচাৰি বিজ্ঞাপন দিছিল। চিকাৰ কৰাৰ বিচক্ষণতা আৰু এন্দুৰ ধৰাৰ ক্ষমতালৈ লক্ষ্য কৰি লৰীক শতাধিক মেকুৰীৰ ভিতৰৰ পৰা বাছনি কৰা হয়। ২০১১ৰ ১৫ ফেব্ৰুৱাৰীত লৰীক ১০ ডাউনিং ষ্ট্ৰীটত আনুষ্ঠানিকভাৱে নিযুক্তি দিয়া হয়।
লেৰী এতিয়া কেৱল এটা মেকুৰীয়েই নহয়; ব্ৰিটিছ ৰাজনীতিৰ এক সাংস্কৃতিক প্ৰতীকত পৰিণত হৈছে। লৰীৰ ফটো সম্বলিত কেলেণ্ডাৰ, মগ, স্মাৰক সামগ্ৰী আদি লণ্ডনৰ বিভিন্ন দোকানত চ’ৰা দামত বিক্ৰী হয়।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
