অসম লাইভ২৪ঃ ফেছবুক, ইনষ্টাগ্ৰামৰ পাছতেই সামাজিক মাধ্যমত মেটাই মুকলি কৰিলে নতুন এপ ‘থ্ৰেডছ’৷ মেটাৰ চিইঅ’ মাৰ্ক জুকাৰবাৰ্গে জনোৱা অনুসৰি ‘থ্ৰেডছ’ সকলোৰে বাবেই মুকলি এটা প্লেটফৰ্ম হ’ব৷ থ্ৰেডছ মুকলিৰ লগে লগেই একাংশৰ মত, টুইটাৰক টক্কৰ দিবলৈকে থ্ৰেডছৰ জন্ম৷ নিয়মিতভাৱে যিসকলে টুইটাৰ ব্যৱহাৰ কৰে তেওঁলোক কিছু পৰিমানে অতিষ্ঠ হৈছে৷ টুইটাৰৰ সালসলনি, নতুন নতুন নিয়মক লৈ অতিষ্ঠ হৈছে বহু গ্ৰাহক৷ বহুতেই টুইটাৰ ব্যৱহাৰ কৰি বেয়া পোৱাও হৈছে৷ টুইটাৰক লৈ জনতা ক্ষোভিত হৈ থকাৰ মাজতেই মাৰ্ক জুকাৰবাৰ্গে জন্ম দিছে নতুন এটা প্লেটফৰ্ম৷
কি এই মেটা থ্ৰেডছ এপ?
মেটাৰ ইনষ্টাগ্ৰাম টিমেই থ্ৰেডছ এপ তৈয়াৰ কৰিছে৷ সেয়ে থ্ৰেডছ এপ ব্যৱহাৰ কৰিবলৈ হ’লে ইনষ্টাগ্ৰাম একাউণ্ট থকাটো প্ৰাথমিক চৰ্ত৷ এই এপত নিজা কোনো লেখা বা পোষ্ট শ্বেয়াৰ কৰাৰ ওপৰিও অইন ব্যৱহাৰকাৰীৰ সৈতে কথা পাতিবও পাৰিব৷ কিন্তু এই এপত কোনো লেখা দিবলৈ ৫০০ আখৰতকৈ বেছি লেখা দিব নোৱাৰিব৷ কেৱল লেখাই নহয়৷ বিভিন্ন লিংক, ফটো, ভিডিঅ’ও পোষ্ট কৰিব পাৰিব এই এপত৷ থ্ৰেডছ এপ যিহেতু ইনষ্টাগ্ৰাম লিংকৰ সৈতে যুক্ত সেয়ে মেটাৰ নিয়ম অনুসৰি থ্ৰেডছত শ্বেয়াৰ কৰা কোনো প’ষ্ট ব্যৱহাৰকাৰীয়ে ইনষ্টাগ্ৰামতো ষ্টৰী হিচাপে দিব পাৰিব৷ ইয়াৰোপৰি ফেছবুক ইনষ্টাগ্ৰামৰ দৰে ইয়াত বন্ধুত্ব স্থাপনৰ সুবিধা থাকিব৷ গুগল প্লে ষ্টৰ আৰু এপল’ প্লে ষ্টৰত গৈ এই এপ ব্যৱহাৰকাৰীয়ে ইনষ্টল কৰিব পাৰিব৷ থ্ৰেডছ এপ ডাইনল’ড কৰিবলৈ কোনো ধনৰ প্ৰয়োজন নাই৷
কেনেকৈ ব্যৱহাৰ কৰিব এই এপ?
এই এপ ব্যৱহাৰ কৰা খুবেই সহজ৷ ইনষ্টাগ্ৰামত একাউণ্ট নাথাকিলে পূৰ্বে এটা ইনষ্টাগ্ৰাম একাউণ্ট খোলক৷ থ্ৰেডছ ছাইন ইন কৰিবলৈ ইনষ্টাগ্ৰাম একাউণ্টৰ প্ৰয়োজন৷ থ্ৰেডছত কৰা পোষ্ট কোনে কোনে দেখিব বা চাব পাৰিব সেয়াও ব্যৱহাৰকাৰীগৰাকীয়ে নিজেই নিয়ন্ত্ৰণ কৰিব পাৰিব৷ কোনো ব্যক্তিক ইচ্ছা কৰিলে আনফ’ল বা ৰিপোৰ্ট আদিও কৰিব পাৰিব৷ ইনষ্টাগ্ৰাম একাউণ্ট বন্ধ কৰিলে কিন্তু থ্ৰেডছৰ একাউণ্টো বন্ধ হৈ পৰিব৷ থ্ৰেডছ এপ মুকলিৰ লগে লগেই প্ৰায় ৫০ লাখতকৈয়ো বেছি লোকে যোগদান কৰিছে৷ মুকলিৰ ৬ঘণ্টাৰ ভিতৰত কেইবাকোটি লোকে থ্ৰেডছত একাউণ্ট খোলা পৰিলক্ষিত হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
