বৰপেটা চহৰৰ সমীপৱৰ্তী বাঁহমূৰা গাঁৱত সংঘটিত এক ঘটনাই অঞ্চলটোত চাঞ্চল্যৰ সৃষ্টি কৰিছে। অভিযোগ অনুসৰি, গাঁওখনত বসবাস কৰা এটা হিন্দু বাঙালী পৰিয়ালক একাংশ মিঞাই দলবদ্ধভাৱে আক্ৰমণ কৰে। মাটি খননত বাধা দিয়াক কেন্দ্ৰ কৰিয়েই এই আক্ৰমণৰ ঘটনা সংঘটিত হোৱা বুলি পৰিয়ালটোৱে অভিযোগ কৰিছে। অভিযোগ অনুসৰি, বাঁহমূৰা গাঁৱৰ বাসিন্দা বুদ্ধেশ্বৰ মজুমদাৰৰ পৰিয়ালৰ মাটিত মেচিনেৰে মাটি খনন কৰিবলৈ চেষ্টা কৰা হৈছিল। এই কামত বাধা দিয়াৰ পাছতে পৰিয়ালটোৰ ওপৰত আক্ৰমণ চলোৱা হয়। আক্ৰমণত বুদ্ধেশ্বৰ মজুমদাৰৰ লগতে গোবিন্দ মজুমদাৰ, শান্তি মজুমদাৰ আৰু ধনঞ্জয় মজুমদাৰ আহত হয় বুলি জানিব পৰা গৈছে।
পৰিয়ালটোৰ অভিযোগ অনুসৰি, মিঞা আক্ৰমণকাৰীসকলে তেওঁলোকক হ*ত্যা আৰু ঘৰ-দুৱাৰ জ্বলাই দিয়াৰ ভাবুকিও দিয়ে। ঘটনাৰ পাছৰে পৰা পৰিয়ালটোৱে নিজৰ মাটি-পথাৰলৈ যাবলৈও ভয় কৰা বুলি জানিব পৰা গৈছে। আনকি নিশাৰ ভাগত ওচৰৰ হিন্দু গাঁৱৰ একাংশ লোকে পৰিয়ালটোৰ ঘৰত পহৰা দিবলগীয়া পৰিস্থিতিৰ সৃষ্টি হৈছে বুলি পৰিয়ালটোৱে দাবী কৰিছে।
ঘটনাটোৰ সৈতে ৰাঙাপানী গাঁৱৰ ছহিদুল হক, মজনু, বাহাৰুল, ছাহানুৰ, জিন্নাতুল, আব্দুল জলিল আদিৰ নাম জড়িত থকাৰ অভিযোগ উত্থাপন হৈছে। প্ৰায় ১০ জনীয়া এটা মিঞাৰ দল আক্ৰমণত জড়িত আছিল বুলি পৰিয়ালটোৱে অভিযোগ কৰিছে। ইফালে, বাঁহমূৰা আৰু ৰাঙাপানী গাঁৱৰ মাজেৰে বৈ যোৱা চাউলখোৱা নদীৰ খহনীয়াৰ ফলত ইতিমধ্যে পৰিয়ালটোৰ বহু মাটি নদীত জাহ গৈছে। নদীৰ পাৰত মেচিনেৰে মাটি খনন কৰাৰ ফলত খহনীয়া অধিক বৃদ্ধি পাব পাৰে বুলি আশংকা কৰি পৰিয়ালটোৱে সংশ্লিষ্ট বিভাগক অভিযোগ দিছিল। সেই অভিযোগৰ পাছতেই তেওঁলোকৰ ওপৰত আক্ৰমণ আৰু ভাবুকি অহা বুলি পৰিয়ালটোৱে দাবী কৰিছে।
ঘটনাৰ পাছত আৰক্ষীয়ে তদন্ত আৰম্ভ কৰি অভিযুক্তসকলৰ বিৰুদ্ধে অভিযান চলায়। আৰক্ষীয়ে মেটেকাৰ মাজত লুকাই থকা অৱস্থাৰ পৰা ছহিদুল হক, আব্দুল জলিল আৰু হাছেম খান নামৰ তিনিজন মূল অভিযুক্তক গ্ৰেপ্তাৰ কৰা বুলি জানিব পৰা গৈছে। আন চাৰিজন অভিযুক্তৰ সন্ধানতো আৰক্ষীৰ অভিযান অব্যাহত আছে। ইতিমধ্যে আৰক্ষীৰ ওচৰত অভিযোগ দাখিল কৰাৰ পাছতো পৰিয়ালটোৱে নিৰাপত্তাহীনতাত ভুগি থকা বুলি দাবী কৰিছে। নিজৰ ঘৰ আৰু সম্পত্তি ৰক্ষা কৰাৰ লগতে জীৱন সুৰক্ষাৰ বাবে পৰিয়ালটোৱে মুখ্যমন্ত্ৰীৰ ওচৰতো সহায় বিচাৰিছে।
এতিয়া আৰক্ষীৰ তদন্তত ঘটনাটোৰ প্ৰকৃত কাৰণ কি আছিল, আক্ৰমণত কোন কোন লোক জড়িত আছিল আৰু মাটি খননৰ বিষয়টোৰ সৈতে ঘটনাটোৰ সম্পৰ্ক কিমান, সেয়া স্পষ্ট হ’ব। পৰিয়ালটোৱে দোষীসকলৰ বিৰুদ্ধে কঠোৰ ব্যৱস্থা গ্ৰহণ কৰি তেওঁলোকক নিৰাপত্তা প্ৰদানৰ দাবী জনাইছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
