অসম লাইভ ২৪ঃ শনিবাৰে মহানগৰীৰ প্ৰতীক্ষা হাস্পতালৰ সন্মুখত সংঘটিত হৈছে লোমহৰ্ষক হত্যাকাণ্ডৰ ঘটনা। গাড়ীৰ চাবিৰে ডিঙিত আক্ৰমণ কৰি দুৰ্বিত্তই হত্যা কৰিছে এজন পশু চিকিৎসকক। হত্যাৰ বলি হোৱা চিকিৎসক তথা ব্যৱসায়ীজন খঞ্জিত মেধি বুলি জানিব পৰা গৈছে।
নিশা সংঘটিত এই হত্যাকাণ্ডত জড়িত থকাৰ অভিযোগত দিছপুৰ আৰক্ষীয়ে সুভাষ বসুমতাৰী নামৰ এজন লোকক আটক কৰি আৰম্ভ কৰিছে তদন্ত। নিশা প্ৰায় ১০ বজাত প্ৰতীক্ষা হাস্পতালৰ সন্মুখত থকা ৭৭ ৰেষ্টুৰেন্টৰ মালিক আৰু এজন বন্ধুৰ সৈতে ৰেষ্টুৰেন্টখনত বহি থকা অৱস্থাতেই এই ঘটনা।
অভিযোগ অনুসৰি মাত্ৰ ৮ হাজাৰ টকাৰ বাবেই এই হত্যাকাণ্ডৰ ঘটনা সংঘটিত হৈছে। হত্যাৰ অভিযোগ উত্থাপিত হোৱা সুভাষ ৰেষ্টুৰেণ্টত কৰ্মৰত এজন কৰ্মচাৰী আছিল। ৰেষ্টুৰেণ্টত কাম কৰা সুভাষ বসুমতাৰীৰ মাতৃ ঊষা বসুমতাৰীয়ে খঞ্জিত মেধিৰ পৰা পাব লগা ৪ হাজাৰ টকাক লৈয়ে ঘটনাৰ আৰম্ভণি। টকাখিনি খোজাৰ সময়তে সুভাষৰ সৈতে বাক বিতণ্ডা হৈছিল ৰেষ্টুৰেন্টখনৰ মালিক খঞ্জিতৰ। আৰক্ষীৰ প্ৰাথমিক তদন্তত প্ৰকাশ পোৱা অনুসৰি, বাক বিতণ্ডাৰ মাজতেই সুভাষে খঞ্জিতক হত্যা কৰে। ইপিনে আৰক্ষীৰ তদন্তত সুভাষ ড্ৰাগছ আসক্ত আছিল বুলি জানিব পৰা গৈছে।
উল্লেখ্য যে, সমগ্ৰ হত্যাকাণ্ডক লৈ খঞ্জিতৰ পৰিয়ালে উত্থাপন কৰিছে বহুকেইটা বিস্ফোৰক অভিযোগ। পৰিয়ালৰ অভিযোগ অনুসৰি, খঞ্জিতক সুৰাপান কৰাই ৰেষ্টুৰেন্টখনত বন্ধু কেইজনে পৰিকল্পিতভাৱে হত্যা কৰিছে। ইয়াৰোপৰি খঞ্জিতৰ ব্যৱসায়ত বহু টকাৰ লেন দেন থকা বুলিও অভিযোগ উঠিছে। খঞ্জিতক প্ৰথমতে প্ৰতীক্ষা হাস্পতাললৈ নিয়া হৈছিল যদিও পিছত ছয়মাইলৰ GNRC হাস্পতাললৈ নিয়া হয়। GNRC-তেই চিকিৎসকে খঞ্জিতক মৃত বুলি ঘোষণা কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
