ভাৰতীয় বংশোদ্ভূত মহাকাশচাৰী সুনীতা উইলিয়ামছৰ স্বাস্থ্যৰ অৱনতি৷ ভাৱিব নোৱাৰাকৈ কমিছে সুনীতা ওজন৷ বিগত কেইটামাহৰ ভিতৰতেই সুনীতাৰ ওজন অভাৱনীয় হাৰত হ্ৰাস হোৱাৰ বাবে এইবাৰ চিন্তাত পৰিছে নাছাও৷ তাক লৈ নাছাৰ ভিতৰচৰাতো সৃষ্টি হৈছে দুঃচিন্তাৰ৷
সম্প্ৰতি এখন ছবি নাছাই প্ৰকাশ কৰিছে৷ যি ছবি সামাজিক মাধ্যমত ভাইৰেল হৈছে৷ ছবিত দেখা গৈছে, মহাকাশচাৰী বেৰি বুচ উইলমোৰৰ সৈতে কথা পাতি আছে সুনীতা উইলিয়ামছে৷ খাদ্য তৈয়াৰ কৰি আছে উইলমোৱে৷ কাষতে বহি আছে সুনীতা৷ কিন্তু সুনীতাৰ চেহেৰা দেখিয়েই আতংকিত হৈছে নাছাৰ বিজ্ঞানী৷ কেইবামাহৰ ভিতৰত সুনীতাৰ ওজন ব্যাপক হাৰত কমিছে৷ ওজন কমিছে উইলমোৰো৷ কিন্তু সুনীতাৰ শৰীৰৰ মাৰাত্মক অৱনতি ঘটিছে৷ কেইবা কিঃগ্ৰাঃলৈ কমিছে তেওঁৰ শৰীৰৰ ওজন৷
নাছাৰ এগৰাকী বিজ্ঞানীয়ে জনাইছে যে সুনীতাৰ ছবি দেখি তেওঁলোক সকলো আচৰিত হৈছে৷ তেওঁৰ স্বাস্থ্যৰ যত্ন লোৱাটো এতিয়া প্ৰধান কথা৷ সুনীতাই যেতিয়া মহাকাশলৈ উৰা মাৰিছিল তেতিয়া তেওঁৰ ওজন আছিল ৬৩.৫০০ কিঃগ্ৰাঃ৷ দীৰ্ঘ সময় ধৰি মহাকাশত থকাৰ বাবে উচ্চ কেলৰিযুক্ত খাদ্য খাবলৈ পোৱা নাই৷ উচ্চ কেলৰিযুক্ত খাদ্য খালেই স্বাস্থ্য আকৌ পূৰ্বৰ দৰে হৈ পৰিব৷ মহাকাশ কেন্দ্ৰত এতিয়াও ৪মাহৰ খাদ্য মজুত আছে৷
উল্লেখ্য যে চলিত বছৰৰ জুন মাহত আন্তৰ্জাতিক স্পেচ ষ্টেচনলৈ গৈছে সুনীতা উইলিয়ামছ আৰু বুচ উইলমোৰ৷ নাছাৰ বোয়িং ক্ৰু ফ্লাইট টেষ্টৰ অংশ হিচাপে তেঁওলোক তালৈ গৈছে৷ কিন্তু তাত গৈয়েই অৰ্নিদিষ্ট কালৰ বাবে ফঁচি গৈছে তেওঁলোক৷ প্ৰায় ১৫০দিনতকৈ অধিক সময় তেওঁলোক তাতেই আছে৷ নাছাই জনাইছে যে ৮মাহ পাছত অৰ্থাৎ আগন্তুক ফেব্ৰুৱাৰীত তেওঁলোকক পৃথিৱীলৈ উভতাই অনা হ’ব৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
