NB NEWSৰ বাতৰিৰ প্ৰভাৱ, অৱশেষত এমাহৰ মূৰত বাধ্য হ’ল হাবিলদাৰ খগেন বৰ্মনৰ হত্যাৰ গোচৰ ৰুজু কৰিবলৈ
NB NEWS ৰ বাতৰিৰ প্ৰভাৱ। অৱশেষত ধাৰাবাহিক বাতৰি প্ৰচাৰত হেচাত পৰি গীতানগৰ আৰক্ষীয়ে জালুকবাৰী থানাৰ যান বাহন শাখাৰ হাবিলদাৰ খগেন বৰ্মনৰ হত্যাৰ গোচৰ ৰুজু কৰিবলৈ বাধ্য হয়।
আৰক্ষীয়ে থানাত দুই অবৈধ প্ৰেমিক প্ৰেমিকাৰ বিৰুদ্ধে ভাৰতীয় দণ্ড বিধিৰ ১২০(B)/৩০২ ধাৰাৰ অধীনত থানত ১২৩/২৪ নম্বৰত এটা গোচৰ ৰুজু কৰি তদন্ত আৰম্ভ কৰিছে। বিগত এমাহৰ মূৰত আৰক্ষীয়ে হত্যাৰ গোচৰ ৰুজু কৰে।
এমাহ পূৰ্বে সংঘটিত হৈছিল এক হত্যাৰ গোচৰ, পত্নীৰ পৰকীয়া প্ৰেমৰ পৰিণতিত প্ৰাণ হেৰুৱাইছিল এগৰাকী হাবিলদাৰে। অভিযোগ অনুসৰি পত্নী আৰু প্ৰেমিকে মিলি হত্যা কৰিছিল জালুকবাৰী থানাৰ যান বাহন শাখাৰ হাবিলদাৰ খগেন বৰ্মনক।
বিগত মাহৰ ২ মে’ তাৰিখে সংঘটিত হৈছিল সেই ঘটনা। মহানগৰীৰ গীতানগৰৰ অম্বিকাগিৰি নগৰত এটা ভাৰাঘৰত ৰহস্য জনক অৱস্থাত জালুকবাৰী থানাৰ হাবিলদাৰ খগেন বৰ্মনৰ মৃতদেহ উদ্ধাৰ হৈছিল।
এই সংক্ৰান্তত আৰক্ষী জোৱান জনৰ ভাতৃ নবীন বৰ্মনে মৃত খগেন বৰ্মনৰ পত্নী মামণি পাঠক আৰু অবৈধ প্ৰেমিক ফাৰিদ আহমেদে হত্যা কৰা বুলি অভিযোগ তুলি গীতানগৰ আৰক্ষী থানত এজাহাৰ দাখিল কৰিছিল।
ভাতৃ নবীন বৰ্মনৰ অভিযোগ অনুসৰি মূলত অবৈধ প্ৰেম আৰু ঋণৰ প্ৰায় ২০ লাখ টকা লেনদেনৰ বাবে এই হত্যাকাণ্ড সংঘটিত হৈছে।
দুবাৰকৈ এজাহাৰ দাখিল কৰিছিল, তৎস্বতেও আৰক্ষীয়ে গোচৰ পঞ্জীয়ন কৰা নাছিল বিগত এমাহে ধৰি। শেহতীয়াকৈ পৰিয়ালটোৱে সংবাদ মাধ্যমৰ কাষ চপাৰ পিছতহে আৰক্ষীয়ে গোচৰ ৰুজু কৰিবলৈ বাধ্য হয়।
মন কৰিবলগীয়া বিষয় যে, মৃত খগেন বৰ্মনৰ মৰণোত্তৰ পৰীক্ষাৰ প্ৰতিবেদনত ভৰি , বুকু আদিত আঘাতৰ চিন লগতে বুকুৰ কামি হাড় ভঙা বুলি ধৰা পৰিছে। এতিয়া গীতানগৰ আৰক্ষীৰ অধিক তদন্তৰ পিছতহে পোহৰলৈ আহিব ঘটনাৰ প্ৰকৃত কাৰণ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
