নৰসংহাৰৰ ঘটনা সংঘটিত কৰা ঘনকান্ত গগৈক লৈ আৰক্ষীৰ তদন্তত এটাৰ পিছত আনটো নতুন তথ্য পোহৰলৈ আহিছে। আৰক্ষীৰ সূত্ৰ অনুসৰি, লকআপত থকা অৱস্থাত ঘনকান্তৰ আচৰণক লৈও চৰ্চা চলিছে। অভিযোগ অনুসৰি, তেওঁক খাবলৈ দিলেও খাদ্য গ্ৰহণ নকৰে আৰু আৰক্ষীয়ে প্ৰশ্ন সুধিলেও স্পষ্টকৈ উত্তৰ নিদিয়ে। আনকি কেতিয়াবা কথা পাহৰি যোৱাৰ দৰে আচৰণ কৰা বুলিও জানিব পৰা গৈছে। তেওঁৰ এই আচৰণে তদন্তকাৰী আৰক্ষীক সমস্যাত পেলাইছে। আৰক্ষীৰ সন্দেহ, তদন্তৰ সময়ত বিভ্ৰান্তিৰ সৃষ্টি কৰিবলৈ ঘনকান্তই এনে আচৰণ কৰিছে নেকি, সেই দিশটোও পৰীক্ষা কৰা হৈছে।
ভাড়াঘৰৰ পৰা উদ্ধাৰ একাধিক নথি-পত্ৰ
ইফালে, সাউকুচিৰ ভাড়াঘৰৰ কোঠাত আৰক্ষীয়ে অভিযান চলাই একাধিক গুৰুত্বপূৰ্ণ নথি-পত্ৰ উদ্ধাৰ কৰিছে। তদন্তকাৰী দলে উদ্ধাৰ কৰা নথিসমূহৰ ভিতৰত বিভিন্ন ঋণ আৰু লীজত লোৱা ব্যৱসায়ৰ সৈতে জড়িত কাগজ-পত্ৰও আছে বুলি জানিব পৰা গৈছে। এই নথিসমূহ পৰীক্ষা কৰি ঘনকান্তৰ আৰ্থিক লেনদেন আৰু ব্যৱসায়িক কাম-কাজৰ বিষয়ে অধিক তথ্য লাভৰ চেষ্টা চলাইছে আৰক্ষীয়ে।
আনহাতে, ঘনকান্তৰ বিলাসী বাহনখনৰ চাবি এতিয়াও উদ্ধাৰ কৰিব পৰা নাই তদন্তকাৰী দলে। ভাড়াঘৰত অভিযান চলোৱাৰ সময়তো চাবিৰ সন্ধান লাভ কৰা নগ’ল। বাহনখনৰ চাবি ক’ত আছে, সেই বিষয়তো ঘনকান্তই আৰক্ষীক স্পষ্ট তথ্য দিয়া নাই বুলি অভিযোগ উঠিছে।
চাবি উদ্ধাৰ কৰিব নোৱাৰাৰ ফলত বাহনখন ভাড়াঘৰৰ পৰা উলিয়াই অনাৰ ক্ষেত্ৰতো সমস্যাৰ সৃষ্টি হৈছে। সেয়ে প্ৰয়োজন হ’লে ক্ৰেণৰ সহায়ত বাহনখন টানি উলিয়াই অনাৰ ব্যৱস্থা কৰিব আৰক্ষীয়ে। ইফালে, ঘনকান্তই ব্যৱহাৰ কৰা কেমেৰা সংস্থাপিত চশমাযোৰ ফৰেনচিক পৰীক্ষাৰ বাবে প্ৰেৰণ কৰা হৈছে। চশমাযোৰৰ পৰা কোনো গুৰুত্বপূৰ্ণ তথ্য লাভ কৰিব পাৰি নেকি, সেই দিশত গুৰুত্ব দিছে তদন্তকাৰী দলে।
পত্নীকো কৰিছিল প্ৰৱঞ্চনা
ঘনকান্তৰ প্ৰৱঞ্চনাৰ অলেখ অসংখ্য কাহিনীবোৰ শুনিলে যিকোনো সাধাৰণ মানুহেই স্তম্ভিত হৈ পৰিব। বহু লোকক দিবলগীয়া ধন আদায় নিদিয়া, ঋণত বাহন লৈ পৰিশোধ নকৰা কাহিনীবোৰতো বাদেই ঘনকান্তই কন্যাৰ শিক্ষাৰ নামতো কৰিছিল প্ৰৱঞ্চনা। কেৱল সেয়াই নহয় ঘাতক ঘনকান্তৰ ভয়ংকৰ প্ৰৱঞ্চনাৰ বলি হৈছিল পত্নীও। এবাৰ-দুবাৰ নহয় ৩ বাৰকৈ বিৱাহপাশত আৱদ্ধ হৈছিল ঘাতক ঘনকান্ত। নগালেণ্ড, ডিব্ৰুগড় আৰু শিৱসাগৰৰ জীয়ৰীৰ সৈতে বিৱাশপাশত আৱদ্ধ হৈছিল প্ৰৱঞ্চকজন।
ঘনকান্তৰ পত্নী জোনমণি গগৈক তলব
এই ঘটনাৰ তদন্তৰ মাজতে ঘনকান্তৰ পত্নী জোনমণি গগৈক লৈও নতুন তথ্য পোহৰলৈ আহিছে। প্ৰাপ্ত তথ্য অনুসৰি, ঘটনা সংঘটিত হোৱাৰ নিশাই জোনমণিয়ে গুৱাহাটী এৰি গৈছিল। প্ৰায় তিনিদিনৰ পিছত ডিব্ৰুগড় আৰক্ষীয়ে তেওঁৰ সন্ধান লাভ কৰিছে বুলি জানিব পৰা গৈছে। ঘটনাৰ তদন্তৰ স্বাৰ্থত বিশেষ তদন্তকাৰী দল (SIT)-এ জোনমণি গগৈক সোধা-পোছাৰ বাবে তলব কৰিব পাৰে। ঘনকান্তৰ বিলাসী বাহনখনৰ চাবি তেওঁৰ পত্নীয়ে লগত লৈ যোৱাৰ কথাও চৰ্চালৈ আহিছে। অৱশ্যে এই সন্দৰ্ভত তদন্তকাৰী আৰক্ষীয়ে কি তথ্য লাভ কৰিছে, সেয়া স্পষ্ট হ’বলৈ বাকী। আনহাতে, ঘনকান্তৰ ভাড়াঘৰৰ পৰা পি*ষ্টলটোৰ অনুজ্ঞাপত্ৰ উদ্ধাৰ কৰিব পৰা নাই আৰক্ষীয়ে। পি*ষ্টলটোৰ অনুজ্ঞাপত্ৰ ক’ত আছে, সেই বিষয়টোও তদন্তৰ আওতালৈ আহিছে।
ঘনকান্তই খুলিছিল ‘GK NEWS’ নামৰ প’ৰ্টেল
ইফালে, ঘনকান্ত গগৈৰ সৈতে জড়িত আন এটা বিষয়ো পোহৰলৈ আহিছে। আৰক্ষীয়ে লাভ কৰা তথ্য অনুসৰি, ঘনকান্তই নিজৰ নামত ‘GK NEWS’ নামেৰে এটা নিউজ প’ৰ্টেল খুলিছিল। অভিযোগ অনুসৰি, প’ৰ্টেলটোত একাংশ কৰ্মচাৰীক কামত নিয়োগ কৰা হৈছিল যদিও তেওঁলোকক দৰমহা আদায় দিয়া হোৱা নাছিল। পিছত প’ৰ্টেলটো আধাতে বন্ধ কৰি ঘনকান্তই আঁতৰি যোৱাৰ অভিযোগো উত্থাপন হৈছে। প’ৰ্টেলটো খোলাৰ পিছতে ঘনকান্তই নিজৰ বাহনত ‘PRESS’ বুলি লিখি লৈছিল বুলিও জানিব পৰা গৈছে। এই নতুন তথ্যই তেওঁৰ পূৰ্বৰ ব্যৱসায়িক কাম-কাজ আৰু কৰ্মচাৰীৰ সৈতে থকা সম্পৰ্কক লৈও প্ৰশ্নৰ সৃষ্টি কৰিছে।
বৰ্তমান ঘনকান্ত গগৈৰ বিৰুদ্ধে উত্থাপিত অভিযোগসমূহৰ তদন্ত অব্যাহত আছে। ভাড়াঘৰৰ পৰা উদ্ধাৰ হোৱা নথি-পত্ৰ, কেমেৰা সংস্থাপিত চশমা, পিষ্টলৰ অনুজ্ঞাপত্ৰ আৰু বিলাসী বাহনখনৰ চাবিৰ সন্ধানৰ জৰিয়তে আৰক্ষীয়ে ঘটনাটোৰ সৈতে জড়িত অধিক তথ্য উদ্ধাৰৰ চেষ্টা চলাইছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
