তিৰুপতি বালাজীৰ পাছত পুনৰ আন এক জনপ্ৰিয় মন্দিৰৰ প্ৰসাদক লৈ বিতৰ্ক
অন্ধ্ৰপ্ৰদেশৰ তিৰুপতী বালাজী মন্দিৰৰ প্ৰসাদত পশু চৰ্বিযুক্ত ঘিউৰ ব্যৱহাৰ পোহৰলৈ অহাৰ পৰাই কেৱল তাতেই নহয় সমগ্ৰ দেশতে চৰ্চা চলি আছে এই বিষয়ত। হিন্দু সংগঠন আৰু সন্তসকলে অভিযুক্তৰ বিৰুদ্ধে কঠোৰ ব্যৱস্থা গ্ৰহণৰ দাবী অহৰহ। বিষয়টোৰ তদন্তৰ বাবে মুখ্যমন্ত্ৰী চন্দ্ৰবাবু নাইডুৱে এছ আই টি গঠন কৰিছে।
আনহাতে তিৰুপতি বালাজী মন্দিৰত শুদ্ধিকৰণৰ প্ৰক্ৰিয়া চলি আছে যদিও এই সকলোবোৰৰ মাজতে প্ৰসাদক লৈ বিতৰ্ক বন্ধ হোৱা নাই। এতিয়া এই বিষয়টো অন্ধ্ৰ প্ৰদেশৰ পৰা গৈ অন্য ৰাজ্যৰ মন্দিৰৰ প্ৰসাদ পাইছেগৈ। এইবাৰ উত্তৰ প্ৰদেশৰ বিশ্ববিখ্যাত বাংকে বিহাৰী মন্দিৰৰ প্ৰসাদক লৈও আৰম্ভ হৈছে বিতৰ্ক। বৃন্দাবনত নিম্নমানৰ খোয়া ব্যৱহাৰ কৰি প্ৰসাদ বনোৱাৰ অভিযোগ।
আটাইতকৈ ডাঙৰ কথাটো হ’ল বাংকে বিহাৰী মন্দিৰত প্ৰসাদ হিচাপে আগবঢ়োৱা পেৰাত মিশ্ৰণ সন্দৰ্ভত অভিযোগ উত্থাপন সমাজবাদী পাৰ্টিৰ সাংসদ ডিম্পল যাদৱৰ। প্ৰতিদিনে প্ৰায় ৫০ হাজাৰ ভক্তই বাংকে বিহাৰীৰ দৰবাৰত প্ৰণাম কৰিবলৈ মথুৰা বৃন্দাবনত উপস্থিত হয়। ১৬২ বছৰীয়া এই মন্দিৰত কেৱল দেশৰ পৰাই নহয় বহিঃৰাজ্যৰ পৰাও ভগৱান শ্ৰীকৃষ্ণৰ আশীৰ্বাদ বিচাৰি পৰ্যটক আহে। আৰু মথুৰা বৃন্দাবনৰ ভূমিত ভৰি দিয়া কোনো ভক্তই তাৰ পৰা পেৰাৰ প্ৰসাদ নখোৱাকৈ উভতি নাহে, কিন্তু এই পেৰাতো অখাদ্য মিলোৱাৰ খবৰ পোৱাৰ পিছত ভক্তসকলৰ মনত বহু প্ৰশ্ন উদয় হৈছে।
কেৱল এয়াই নহয়, বিজেপি নেতা তথা প্ৰাক্তন সাংসদ ব্রিজ ভূষণ সিঙেও প্ৰশ্ন উত্থাপন কৰিছে এই ভেজাল বিতৰ্কত। তেওঁ কৈছে যে উত্তৰপ্ৰদেশৰ চুক-কোণত উপলব্ধ ঘিউ পৰীক্ষা কৰিব লাগে। আনহাতে, মথুৰাত পোৱা পেৰাবোৰৰ ওপৰত প্ৰশ্ন উত্থাপন হোৱা দেখি ভাৰতীয় জনতা পাৰ্টিয়ে ৰাইজ আৰু বিৰোধী দলসমূহক বিভ্ৰান্তি বিয়পাই নিদিবলৈ অনুৰোধ জনাইছে।
অৱশ্যে সতৰ্কতামূলক ব্যৱস্থা হিচাপে মথুৰাৰ পেৰাৰ গুণাগুণ পৰীক্ষা আৰম্ভ কৰা হৈছে। ইউ পিৰ খাদ্য সুৰক্ষা আৰু ঔষধ প্ৰশাসনে মথুৰা, বৃন্দাবন আৰু গোবৰ্ধনৰ মন্দিৰৰ পৰা প্ৰসাদৰ ১৩টা নমুনা সংগ্ৰহ কৰি ১৫ দিনৰ পিছত তেওঁলোকৰ পৰীক্ষাৰ প্ৰতিবেদন আহিব বুলি জানিবলৈ দিয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
