ৰাজ্য চৰকাৰৰ মন্ত্ৰী, বিধানসভাৰ অধ্যক্ষ, বিধায়ক আৰু জ্যেষ্ঠ বিষয়াসকলৰ বাবে চৰকাৰী বাহন ক্ৰয়ৰ সৰ্বোচ্চ সীমা নিৰ্ধাৰণ কৰিছে। নতুন নিৰ্দেশনা অনুসৰি মন্ত্ৰী, বিধানসভাৰ অধ্যক্ষ আৰু জ্যেষ্ঠ বিষয়াসকলৰ বাবে বাহন ক্ৰয়ৰ ক্ষেত্ৰত সৰ্বোচ্চ সীমা ২৬ লাখ টকা নিৰ্ধাৰণ কৰিছে ৰাজ্য চৰকাৰে। আনহাতে, আন বিধায়কসকলে ১৫ লাখ টকাতকৈ অধিক মূল্যৰ বাহন ক্ৰয় কৰিব নোৱাৰিব। এই সন্দৰ্ভত চৰকাৰে নতুন অধিসূচনা জাৰি কৰিছে। চৰকাৰী বাহন ক্ৰয়ৰ ক্ষেত্ৰত এই অধিসূচনা জাৰি কৰিছে তামিলনাডুৰ জোছেফ বিজয়ৰ চৰকাৰে।
তামিলনাডু বিধানসভাৰ সদস্যসকলৰ ভ্ৰমণ ভাট্টা সম্পৰ্কীয় নিয়ম সংশোধন কৰাৰ অংশ হিচাপে এই নতুন ব্যৱস্থা গ্ৰহণ কৰা হৈছে। অধিসূচনাখনত বাহন ক্ৰয়ৰ মূল্য, ক্ৰয়ৰ পদ্ধতি, মালিকীস্বত্ব আৰু কাৰ্যকাল শেষ হোৱাৰ পিছত বাহন ঘূৰাই দিয়াৰ নিয়মসমূহ স্পষ্ট কৰা হৈছে।
মন্ত্ৰীৰ বাবে ২৬ লাখ, বিধায়কৰ বাবে ১৫ লাখ টকা
নতুন নিয়ম অনুসৰি, মন্ত্ৰীসকলৰ লগতে বিধানসভাৰ অধ্যক্ষ, উপাধ্যক্ষ, বিৰোধী দলৰ নেতা আৰু চৰকাৰী মুখ্য হুইপে ২৬ লাখ টকা পৰ্যন্ত মূল্যৰ চৰকাৰী বাহন লাভ কৰিব পাৰিব। আনহাতে, বাকী বিধায়কসকলৰ বাবে বাহন ক্ৰয়ৰ সৰ্বোচ্চ সীমা ১৫ লাখ টকা নিৰ্ধাৰণ কৰা হৈছে। এই নিৰ্ধাৰিত মূল্যৰ ভিতৰত বাহনখনৰ এক্স-শ্ব’ৰুম মূল্য, কৰ, পঞ্জীয়ন মাচুল আৰু মটৰ বীমাৰ প্ৰিমিয়ামকে ধৰি ক্ৰয়ৰ সৈতে জড়িত সকলো খৰচ অন্তৰ্ভুক্ত থাকিব। অৰ্থাৎ, এই খৰচসমূহৰ বাবে নিৰ্ধাৰিত সীমাৰ বাহিৰত অতিৰিক্ত ধন পৃথকে দিয়া নহ’ব। চৰকাৰী অধিসূচনা অনুসৰি, বাহন ক্ৰয়ৰ বাবে নিৰ্ধাৰণ কৰা এই আৰ্থিক সীমা প্ৰতি বছৰে ৫ শতাংশকৈ বৃদ্ধি কৰা হ’ব। ইয়াৰ ফলত সময়ৰ লগে লগে বাহন ক্ৰয়ৰ অনুমোদিত ব্যয় বৃদ্ধি কৰাৰ ব্যৱস্থা থাকিব।
কেনেদৰে ক্ৰয় কৰা হ’ব বাহন?
নতুন নিয়ম অনুসৰি, বাহন ক্ৰয়ৰ বাবে কেন্দ্ৰীয় চৰকাৰৰ চৰকাৰী ই-মাৰ্কেটপ্লেচ (GeM) পৰ্টেল ব্যৱহাৰ কৰা হ’ব। মন্ত্ৰীসকলৰ বাবে নিৰ্ধাৰিত বাহন তামিলনাডু চৰকাৰে নিজৰ নামত ক্ৰয় কৰিব। আনহাতে, বিধানসভাৰ অধ্যক্ষ, উপাধ্যক্ষ, বিৰোধী দলৰ নেতা, মুখ্য হুইপ আৰু আন বিধায়কসকলৰ বাবে বাহন ক্ৰয়ৰ প্ৰক্ৰিয়া বিধানসভা সচিবালয়ৰ জৰিয়তে সম্পন্ন কৰা হ’ব। ইয়াৰ উপৰি, নতুন নিয়মৰ অধীনত ক্ৰয় কৰা সকলো বাহনে ভাৰতৰ বি এছ-৬ (BS-VI) নিৰ্গমন মান পূৰণ কৰিব লাগিব।
নতুন অধিসূচনাত চৰকাৰী বাহনৰ মালিকীস্বত্ব আৰু ব্যৱহাৰ সম্পৰ্কেও নিৰ্দিষ্ট নিয়ম উল্লেখ কৰা হৈছে। মন্ত্ৰীসকলে পদত্যাগ কৰিলে, তেওঁলোকৰ কাৰ্যকাল শেষ হ’লে অথবা অযোগ্যতাকে ধৰি আন কোনো কাৰণত পদত নাথাকিলে চৰকাৰক আবণ্টিত বাহনখন ঘূৰাই দিব লাগিব। বিধানসভাৰ অধ্যক্ষ আৰু আন যোগ্য বিষয়াসকলৰ ক্ষেত্ৰতো একেধৰণৰ নিয়ম প্ৰযোজ্য হ’ব। আনহাতে, সাধাৰণ বিধায়কসকলে নিজৰ বাহনৰ ৰক্ষণাবেক্ষণ, মেৰামতি, ইন্ধন আৰু চালকৰ খৰচ নিৰ্ধাৰিত বাহন ভাট্টাৰ পৰাই বহন কৰিব লাগিব।
এই সংশোধিত নিয়মসমূহৰ সন্দৰ্ভত তামিলনাডু চৰকাৰৰ ৰাজহুৱা বিভাগৰ সম্পাদক ই সুন্দৰাৱল্লীয়ে চৰকাৰী নিৰ্দেশ জাৰি কৰিছে। নতুন ব্যৱস্থাৰ জৰিয়তে বিভিন্ন শ্ৰেণীৰ জনপ্ৰতিনিধিৰ বাবে বাহন ক্ৰয়ৰ আৰ্থিক সীমা, ক্ৰয়ৰ প্ৰক্ৰিয়া আৰু প্ৰশাসনিক দায়িত্ব নিৰ্দিষ্ট কৰা হৈছে। লগতে, চৰকাৰী বাহনৰ ব্যৱহাৰ আৰু মালিকীস্বত্ব সংশ্লিষ্ট পদত অধিষ্ঠিত হৈ থকাৰ চৰ্তৰ সৈতে সংযুক্ত কৰা হৈছে। নতুন নিয়মসমূহে চৰকাৰী বাহন ক্ৰয়ৰ ক্ষেত্ৰত ব্যয়ৰ সীমা নিৰ্ধাৰণ কৰাৰ লগতে বাহনৰ নিয়মীয়া ব্যৱহাৰ আৰু ৰক্ষণাবেক্ষণৰ দায়িত্বও স্পষ্ট কৰি দিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
