টীম ইণ্ডিয়াৰ মুখ্য প্ৰশিক্ষক গৌতম গম্ভীৰৰ BCCIৰ ওপৰত প্ৰভাৱ লাহে লাহে কমি আহিছে। কেইবাটাও ৰাষ্ট্ৰীয় সংবাদ মাধ্যমৰ বাতৰি অনুসৰি এবছৰৰ পূৰ্বে গম্ভীৰৰ আধিপত্য আৰু বৰ্তমানৰ প্ৰভাৱৰ মাজত বহুখিনি পাৰ্থক্য আহি পৰিছে। ব’ৰ্ডৰ একাংশ বিষয়াৰ লগতে ড্ৰেছিং ৰুমৰ ভিতৰতো খেলুৱৈৰ মাজত গম্ভীৰক লৈ অসন্তুষ্টি দেখা গৈছে, যাৰ বাবে এতিয়া গম্ভীৰে প্ৰশিক্ষক পদো হেৰুওৱাৰ উপক্ৰম হৈছে।
প্ৰতিবেদন অনুসৰি BCCIৰ একাংশ শীৰ্ষ বিষয়াৰ মতে দলটোৰ পৰাজয়ৰ পিছত মুখ্য প্ৰশিক্ষক গম্ভীৰে প্ৰায়ে খেলুৱৈ, চেণ্টাৰ অব এক্সেলেন্স বা সহকাৰী প্ৰশিক্ষকসকল দোষাৰোপ কৰি আহিছে। প্ৰশিক্ষকৰ এই মনোভাৱৰ বাবে ড্ৰেছিং ৰুমৰ ভিতৰতো বিভিন্ন বিসংগতি, মতানৈক্যৰ খবৰ সময়ে সময়ে ওলাই থাকে। নিৰ্ভৰযোগ্য সূত্ৰ অনুসৰি সম্প্ৰতি একাংশ জ্যেষ্ঠ খেলুৱৈয়ে গম্ভীৰৰ প্ৰশিক্ষণৰ শৈলীক লৈ অনানুষ্ঠানিকভাৱে ব’ৰ্ডৰ সদস্যৰ আগত নিজৰ অসন্তুষ্টি প্ৰকাশ কৰিছে।
BCCI-এ প্ৰথমে গম্ভীৰক তেওঁৰ পছন্দৰ সহকাৰী প্ৰশিক্ষক নিৰ্বাচন কৰা আৰু সিদ্ধান্ত লোৱাৰ সম্পূৰ্ণ স্বাধীনতা দিছিল যদিও বহু ব’ৰ্ডৰ সদস্যৰ মতে গম্ভীৰে এই কৰ্তৃত্ব ফলপ্ৰসূভাৱে ব্যৱহাৰ কৰাত ব্যৰ্থ হৈছে। প্ৰথমে টীম ইণ্ডিয়াত ৰূপান্তৰ বা পৰিৱৰ্তনৰ কথাক নুই কৰা গম্ভীৰে এতিয়া এই পৰাজয়ৰ বাবে পৰিৱৰ্তনকেই দোষাৰোপ কৰিছে, যাৰ ফলত তেওঁৰ ওপৰত ব’ৰ্ডৰ আস্থা ক্ৰমাগতভাৱে হ্ৰাস পাইছে।
শ্ৰীলংকা ভ্ৰমণে গম্ভীৰৰ ভৱিষ্যত নিৰ্ণয় কৰিব
আয়াৰলেণ্ড আৰু ইংলেণ্ডৰ নিৰাশাজনক ভ্ৰমণ আৰু টেষ্ট ফৰ্মেটত বিগত দুবছৰৰ পৰা টীম ইণ্ডিয়াৰ দুৰ্বল প্ৰদৰ্শনৰ পিছত আগন্তুক শ্ৰীলংকা ভ্ৰমণে গৌতম গম্ভীৰৰ ভৱিষ্যত নিৰ্ণয় কৰিব পাৰে। যদিহে এই শৃংখলাত টীম ইণ্ডিয়াৰ প্ৰদৰ্শন আশা কৰা ধৰণে নহয়, তেন্তে গম্ভীৰে টীম ইণ্ডিয়াৰ পৰা আকস্মিক বিদায় লব পাৰে। আগন্তুক এদিনীয়া বিশ্বকাপৰ বাবে মাত্ৰ এবছৰ বাকী থকা অৱস্থাত BCCI-এ সাধাৰণতে খৰখেদাকৈ প্ৰশিক্ষকৰ দৰে গুৰুত্বপূৰ্ণ পদৰ ক্ষেত্ৰত সিদান্ত নলয়। অৱশ্যে গৌতম গম্ভীৰক নিজৰ পদৰ পৰা অপসাৰণ কৰাটো BCCIৰ বাবে সহজ সিদ্ধান্ত নহ’ব, কিয়নো ভাৰতীয় দলৰ প্ৰশিক্ষকৰ পদত তীব্ৰ কামৰ হেঁচা, অহৰহ ভ্ৰমণ আৰু সংবাদ মাধ্যম আৰু অনুৰাগীৰ তীব্ৰ নিৰীক্ষণ জড়িত হৈ থাকে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
