অসম লাইভ২৪ঃ ডঃ বেজবৰুৱা-২ নোচোৱাকৈয়ে গ’লগৈ অভিনেতা নিপন গোস্বামী। ১৯৬৫ চনৰ পৰা জীৱনৰ প্ৰায় শেষৰ দিনকেইটালৈকে অভিনয়কেই সামৰি গ’লগৈ শিল্পীগৰাকী। অভিনয়ক কিমান ভালপালে শাৰীৰিক অসুস্থাকো নেওচা দি অভিনয়ত নিজকে সঁপি দিব পাৰে! ৫৭ বছৰে অসমীয়া ছবি জগতত অভিনয় কৰি যোৱা নিপন গোস্বামীয়ে অসমৰ অন্য এক জনপ্ৰিয় উপন্যাস ‘অসীমত যাৰ হেৰাল সীমা’ক দিয়া নাট্যৰূপত চন্দনৰ চৰিত্ৰটোত অভিনয় কৰি গৈছে।
১৯৪৭ চনত সাংস্কৃতিক নগৰী তেজপুৰৰ কলিবাৰীত জন্ম হৈছিল নিপন গোস্বামী। প্ৰথমে মঞ্চত অভিনয় কৰি তেখেতে পাছলৈ বোলছবিত নায়কৰ অভিনয় কৰে। অসমীয়া বোলছবিৰ ‘তাৰকা অভিনেতা’ৰ শাৰীৰ থকা মুষ্টিমেয় কেইজনমান অভিনেতাৰ ভিতৰত তেৱো অন্যতম। তেখেতে টেলি-ফিল্ম, ভিচিডি ছবি আদিত অভিনয় কৰাৰ উপৰিও নাট্য পৰিচালনাও কৰিছিল। ১০০-ৰো অধিক ছবিত কাম কৰিছিল নিপন গোস্বামীয়ে।
২০২১ বৰ্ষত নিপন গোস্বামীক ড০ ভবেন্দ্ৰ নাথ শইকীয়া বঁটাৰে সন্মানিত কৰা হয়৷ পিতৃ চন্দ্ৰধৰ গোস্বামী আছিল বিখ্যাত অভিনেতা, আৰু মাতৃ নিৰুপমা গোস্বামীয়েও সংগীত চৰ্চাত জড়িত আছিল। নিপন গোস্বামীয়ে শিক্ষাৰম্ভ কৰিছিল কলিবাৰী নিম্ন বুনিয়াদী প্ৰাথমিক বিদ্যালয়ত কৰিছিল। তাৰপাছত ‘তেজপুৰ চৰকাৰী উচ্চতৰ মাধ্যমিক বিদ্যালয়’ত শিক্ষা গ্ৰহণ কৰে। সাংস্কৃতিক পৰিবেশ নিপন গোস্বামীয়ে ঘৰতেই পাইছিল। পিতৃ চন্দ্ৰধৰ গোস্বামীকে ধৰি পাঁচো জন খুৰাকেই আছিল অভিনয়ৰ লগত জড়িত। তদুপৰি বিষ্ণুপ্ৰসাদ ৰাভা, ফণী শৰ্মা আছিল তেখেতৰ চুবুৰীয়া। বাণ ৰঙ্গমঞ্চত নিয়মিতভাৱে চলি থকা নাটক চায়েই তেখেত অভিনয়ৰ প্ৰতি আগ্ৰহী হৈছিল।
স্কুলত পঢ়ি থকা দিনতেই নিপন গোস্বামীয়ে অভিনয় আৰম্ভ কৰিছিল। প্ৰায় ৯ বছৰ বয়সত তেখেতে প্ৰথমে ‘লাচিত বৰফুকন’ নাটকত বিদ্যালয়ৰ লগৰীয়া কেইজনমানক লগত লৈ নাটকখন ৰূপায়ন কৰিছিল। হাইস্কুলত পঢ়া কালতো বহুকেইখন নাটক প্ৰতিযোগিতাত অংশগ্ৰহণ কৰিছিল। বি এ ফাইনেল পৰীক্ষা দিয়াৰ পাছত তেখেতে কলিকতালৈ গৈ পুণেৰ ভাৰতীয় চলচ্চিত্ৰ আৰু দূৰদৰ্শন প্ৰতিষ্ঠানত (FTII) নামভৰ্তিৰ বাবে বাছনি পৰীক্ষাত বহে। ১৯৬৫ চনত তেওঁ পুনেলৈ অভিনয়ৰ প্ৰশিক্ষণৰ বাবে যাত্ৰা কৰে।
সুভাষ ঘাই, শত্ৰুঘ্ন সিন্হা, নবীন নিশ্চল, জালাল আগা, ৰেহেনা চুলতানা, ৰাকেশ পাণ্ডে আদি তেখেতৰ সহপাঠী আছিল। বলিউদৰ অভিনেতা আচৰাণী আছিল অগ্ৰজ আৰু বলিউদৰ ডেনী আৰু জয়া ভাদুৰী তেখেতৰ কনিষ্ঠ আছিল। ২ বছৰীয়া শিক্ষা সাং কৰি তেওঁ পোনপ্ৰথমে ছবিৰ জগতত ভুমুকি মাৰে। পুনে ফিল্ম ইনষ্টিটিউট’ৰ শিক্ষা গ্ৰহণ কৰি থাকোঁতেই নিপন গোস্বামীয়ে অমৰ পাঠকৰ ‘সংগ্ৰাম’ বোলছবিত অভিনয়ৰ বাবে আমন্ত্ৰণ পায়। সেই আমন্ত্ৰণমৰ্মেই নিপন গোস্বামীয়ে ‘সংগ্ৰাম’ বোলছবিত প্ৰথমে নায়কৰ চৰিত্ৰত অভিনয় কৰে।
নিপন গোস্বামীৰ অভিনীত প্ৰথম ছবি আছিল ১৯৫৭ চনত মুক্তিপ্ৰাপ্ত ফণী শৰ্মাৰ দ্বাৰা পৰিচালিত ‘পিয়লি ফুকন’। তেখেতৰ পিতৃয়ে অভিনয় কৰা এই ছবিখনত কেইটামান সৰু-সুৰা দৃশ্যত তেওঁ প্ৰথমে কেমেৰাত ভূমুকি মাৰিছিল। সংগ্ৰাম’ৰ পাছতে নায়ক হিচাপে তেখেতে ১৯৬৯ চনত মুক্তিপ্ৰাপ্ত ‘ডক্তৰ বেজবৰুৱা’ ছবিত অভিনয় কৰে। তাৰ পাছৰে পৰা তেখেতে ১০০-ৰো অধিক ছবিত অভিনয় কৰিছে।
১৯৮১ চনৰ আজলী নবৌৰ পাছৰেপৰা নিপন গোস্বামীয়ে নায়কৰ লগতে চৰিত্ৰাভিনয়ো কৰিবলৈ লয়। নিপন গোস্বামীয়ে নিজেই কোৱামতে মঞ্চহে তেখেতে বেছিকৈ ভালপায়। সেয়ে তেখেতে চলচ্চিত্ৰৰ লগতে মঞ্চাভিনয়ো অব্যাহত ৰাখিছিল। তেখেতে ‘ভ্ৰাম্যমাণ থিয়েটাৰ’টো অভিনয় কৰিছিল। নিপন গোস্বামীয়ে বিভিন্ন সময়ত কহিনুৰ, আৱাহন, হেঙুল আৰু শকুন্তলা থিয়েটাৰত অভিনয় কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ