অসম লাইভ২৪ঃ মৃত্যু জীৱনৰ নিৰ্মম সত্য। অসমীয়া ছবিজগতৰ অন্য এক তাৰকা বিশিষ্ট অভিনেতা নিপন গোস্বামী আৰু নাই। বৃহস্পতিবাৰে পুৱা ৯ বাজি ১৫ মিনিটত গুৱাহাটীস্থিত নেমকেয়াৰ হাস্পতালত শেষ নিশ্বাস ত্যাগ কৰিছে অভিনেতাগৰাকীয়ে। মৃত্যুৰ সময়ত অভিনেতাগৰাকীৰ বয়স হৈছিল ৮০ বছৰ।
বিশিষ্ট অভিনেতাগৰাকীৰ শেষকৃত্য ৰাজ্যিক মৰ্যাদাৰে সম্পন্ন হ’ব। লগতে অভিনেতাগৰাকীৰ চিকিৎসাৰ সমূহ খৰচ চৰকাৰেই বহন কৰিব। নগৰ উন্নয়ন মন্ত্ৰী অশোক সিংঘালে ব্যক্ত কৰিছে এই কথা। বিগত কিছুদিন ধৰি নেমকেয়াৰ হাস্পতালত চিকিৎসাধীন হৈ আছিল ব্যক্তিগৰাকী। দুদিন পূৰ্বে স্বাস্থ্য কিছু সুস্থিৰ হৈছিল যদিও আজি পুৱাৰভাগতে শেষনিশ্বাস ত্যাগ কৰে শিল্পীগৰাকীয়ে।
ইপিনে অভিনেতাগৰাকীৰ মৃত্যুত ভাঙি পৰিছে মুখ্যমন্ত্ৰী হিমন্ত বিশ্ব শৰ্মাও। বিভিন্ন ছবিৰ মাজতে ককা দেউতা নাতি আৰু হাতী ছবিত মুখ্যমন্ত্ৰী হিমন্ত বিশ্ব শৰ্মাইয়ো এটি শিশু চৰিত্ৰত অভিনয় কৰিছিল। অভিনেতাগৰাকীৰ মৃত্যুত মুখ্যমন্ত্ৰীগৰাকীয়ে শোক প্ৰকাশ কৰি লিখিছে,’অসমীয়া ছবি জগতৰ চিৰসেউজ অভিনেতা নিপন গোস্বামীদেৱেৰ পৰলোক গমনৰ বাতৰি পাই মই ব্যথিত হৈ পৰিছোঁ৷ শৈশৱতে ‘ককাদেউতা নাতি আৰু হাতী’ নামৰ চলচ্চিত্ৰখনত অভিনয় কৰাৰ সময়তে অসমৰ অন্যতম শ্ৰেষ্ঠ অভিনেতাগৰাকীৰ মই সান্নিধ্য লাভ কৰি ধন্য হৈছিলোঁ৷ বহুকেইখন অসমীয়া চিনেমাত অতি হৃদয়স্পৰ্শী, মননশীল চৰিত্ৰত অভিনয় কৰা গোস্বামীদেৱৰ সাংস্কৃতিক জগতলৈ অৱদান অসমীয়া জাতিয়ে কোনোদিনে পাহৰিব নোৱাৰিব৷ এই দুখৰ মুহূৰ্তত বৰেণ্য অভিনেতাগৰাকীৰ বিদেহ আত্মাৰ মই চিৰশান্তি কামনাৰ অৰ্থে ঈশ্বৰৰ ওচৰত প্ৰাৰ্থনা জনালোঁ আৰু শোকসন্তপ্ত পৰিয়ালবৰ্গলৈ গভীৰ শ্ৰদ্ধাঞ্জলি জ্ঞাপন কৰিলোঁ৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
