এক দেশ এক নিৰ্বাচন- কাইলৈ লোকসভাত দাখিল কৰা হ’ব বিধেয়ক
কেন্দ্ৰীয় চৰকাৰে মঙলবাৰে সংসদত ‘এক দেশ, এক নিৰ্বাচন’ নিৰ্বাচনী বিধেয়ক দাখিল কৰিবলৈ ওলাইছে। এই বিধেয়কখন মঙলবাৰে ১৭ ডিচেম্বৰৰ দিনৰ ১২ বজাত লোকসভাত দাখিল কৰা হ’ব। এই বিধেয়কখন সদনত দাখিল কৰিব কেন্দ্ৰীয় আইন মন্ত্ৰী অৰ্জুন ৰাম মেঘৱালে।
আনহাতে দিল্লী, জম্মু কাশ্মীৰ আৰু পুডুচেৰীৰ বাবে সুকীয়া বিধেয়ক দাখিল কৰা হ’ব। এই বিধেয়কখনৰ প্ৰতিলিপি সাংসদসকলৰ মাজত প্ৰচাৰ কৰা হৈছে। অৱশ্যে বিৰোধীয়ে ধাৰাবাহিকভাৱে এই বিধেয়কৰ বিৰোধিতা কৰি আহিছে। এনে পৰিস্থিতিত মঙলবাৰৰ লোকসভাৰ কাৰ্য্যবিধি হুলস্থুলীয়া হোৱাৰ সম্ভাৱনা আছে।
এই বিধেয়কখন দাখিল কৰাৰ পিছত চৰকাৰে ইয়াক যুটীয়া সংসদীয় সমিতিলৈ প্ৰেৰণ কৰিব। যদি যুটীয়া সংসদীয় সমিতিয়ে ক্লিয়াৰেন্স দিয়ে আৰু সংসদৰ দুয়োটা সদনে বিধেয়কখন গৃহীত কৰে, তেন্তে ৰাষ্ট্ৰপতি দ্ৰৌপদী মুৰ্মুলৈ অনুমোদনৰ বাবে প্ৰেৰণ কৰা হ’ব।
এই বিধেয়কখন ৰাষ্ট্ৰপতিয়ে স্বাক্ষৰ কৰাৰ লগে লগে আইনত পৰিণত হ’ব। যদি এনেকুৱা হয় তেন্তে ২০২৯ চনৰ ভিতৰত সমগ্ৰ দেশতে একেলগে নিৰ্বাচন অনুষ্ঠিত হ’ব।
পাছে সকলো দল এই বিধেয়কৰ বাবে সাজু নহয়। এই বিধেয়কত বিজেপি, নীতিশ কুমাৰৰ জেডিইউ, তেলেগু দেশম পাৰ্টি, চিৰাগ পাছৱানৰ এলজেপি, অসম গণ পৰিষদ, বহুজন সমাজ পাৰ্টি আৰু শিৱসেনাই সমৰ্থন আগবঢ়াইছে।
আনহাতে ইয়াৰ বিৰোধিতা কৰিছে- কংগ্ৰেছ, সমাজবাদী পাৰ্টি (এছ পি), আম আদমী পাৰ্টি (আপ), চি পি এমকে ধৰি ১৫টা দল। আনহাতে ঝাৰখণ্ড মুক্তি মৰ্চা (জে এম এম), ইণ্ডিয়ান ইউনিয়ন মুছলিম লীগ (আই ইউ এম এল)কে ধৰি ১৫টা দলে এই বিধেয়কক লৈ কোনো উত্তৰ নিদিলে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
