অসম লাইভ ২৪ঃ দেশত শীঘ্ৰেই কাৰ্যকৰী হ’ব ‘এক দেশ, এক ৰেচন কাৰ্ড’ আঁচনি। দেশৰ সমূহ ৰাজ্য তথা স্বায়ত্বশাসিত অঞ্চলত ৩১ জুলাইৰ ভিতৰত ‘এক দেশ, এক ৰেচন কাৰ্ড’ কাৰ্যকৰীকৰণৰ নিৰ্দেশ দিয়ে উচ্চতম ন্যায়ালয়ে। সমান্তৰালভাৱে শ্ৰমিকৰ নথিভুক্তকৰণৰ বাবে প’ৰ্টেল মুকলি কৰিবলৈ ৰাজ্যসমূহক নিৰ্দেশ প্ৰদান কৰে দেশৰ শীৰ্ষ আদালতে। এই আঁচনিৰ অধীনত দেশৰ সকলো প্ৰান্তৰ প্ৰতিগৰাকী শ্ৰমিকে লাভ কৰিব ৰেচন। এজনো শ্ৰমিক যাতে আঁচনিৰ পৰা বঞ্চিত নহয় সেই উদ্দেশ্যেই কেন্দ্ৰৰ এই পদক্ষেপত হস্তক্ষেপ কৰি ৰাজ্য তথা কেন্দ্ৰীয়শাসিত অঞ্চলসমূহলৈ নিৰ্দেশ প্ৰেৰণ কৰিছে উচ্চতম ন্যায়ালয়ে।
সমাজকৰ্মী হৰ্ষ মান্দৰ, অঞ্জলি ভৰদ্বাজ আৰু জগদীপ ছোকৰেই এই সন্দৰ্ভত আৱেদন দাখিল কৰিছিল ন্যায়ালয়ত। মঙলবাৰে উচ্চতম ন্যায়ালয়ত বিষয়টো উত্থাপন কৰা হয়। ন্যায়াধীশ অশোক ভূষণৰ বিচাৰপীঠে বিষয় সন্দৰ্ভত শীঘ্ৰেই ‘এক দেশ, এক ৰেচন কাৰ্ড’ আঁচনি কাৰ্যকৰীকৰণৰ নিৰ্দেশ দিয়ে ৰাজ্যসমূহক। শ্ৰমিকসকল যাতে ৰেচন তথা খাদ্য সুৰক্ষা আঁচনিৰ পৰা বঞ্চিত নহয় সেই বিষয়ত উচ্চতম ন্যায়ালয়ে নজৰ দিয়া উচিত বুলি উল্লেখ কৰিছে আৱেদনত। সেই আৱেদনৰ ভিত্তিতেই উচ্চতম ন্যায়ালয়ে ৰায় প্ৰদান কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
