আকৌ পাকিস্তান ক্ৰিকেট বৰ্ডৰ মুড ছুইং৷ টি-২০ বিশ্বকাপত ভাৰতৰ সৈতে মেচ বয়কট প্ৰসংগত আকৌ ইউ-টাৰ্ন মাৰিছে পাকিস্তানে৷ খবৰ অনুসৰি ভাৰতৰ সৈতে মেচ খেলাত সহমত হৈছে পাকিস্তান৷ এই মেচ খেলাৰ বাবে আই চিচিৰ ওচৰত ৩টা চৰ্ত ৰাখিছে পাক ক্ৰিকেট বৰ্ডে৷
উল্লেখ কৰা প্ৰয়োজন যে দেওবাৰে লাহোৰত উচ্চ পৰ্যায়ৰ বৈঠকত বহিছিল আই চিচি আৰু পিচিবি৷ এই বৈঠকৰ মূল বিষয় আছিল ভাৰত মেচ বয়কটৰ সিদ্ধান্ত প্ৰত্যাহাৰ৷ আই চিচিয়ে পাকিস্তানক বুজাবলৈ চেষ্টা কৰিছে যে এই মেচ নেখেলিলে বৃহৎ আৰ্থিক ক্ষতি হব পাৰে৷ আৰু এই পৰিস্থিতিত পি চি বিৰ তৰফৰ পৰা আই চি চি ৰ সন্মুখত ৰখা হৈছে ৩টা দাবী৷ এই কথা প্ৰকাশ কৰিছে ক্ৰিকবাজে৷
কি এই ৩টা দাবী?
ক্ৰিকবাজৰ পক্ষৰ পৰা দিয়া তথ্য অনুসৰি
১. আই চি চিৰ লাভাংশ পাকিস্তানক বেছিকৈ দিব লাগিব৷
২. ভাৰত আৰু পাকিস্তান দ্বিপাক্ষিক চিৰিজ আৰম্ভ কৰিব লাগিব৷
৩. হেণ্ডচেক প্ৰটকল লাঘু কৰিব লাগিব৷
অৱশ্যে আই চি চি আৰু বি চি চিআইয়ে পাক ক্ৰিকেট বৰ্ডৰ এই দাবী মানি ল’বনে সেয়া এতিয়াও জানিব পৰা হোৱা নাই৷
কি ঘটিছে?
টি-২০ বিশ্বকাপ আৰম্ভ হোৱাৰ পূৰ্বেই বিভিন্ন বাহানা আৰম্ভ কৰিছে পাকিস্তানে৷ সমস্যাৰ সূত্ৰপাত বাংলাদেশক লৈয়েই৷ এই বিশ্বকাপত ভাৰতৰ সৈতে নেখেলো বুলি আই চি চিৰ ওচৰত আবেদন জনাইছিল পিচিবিয়ে৷ বাংলাদেশৰ কাষত থিয় হ’বলৈ গৈ ভাৰতৰ বিৰুদ্ধে ১৫ ফেব্ৰুৱাৰীত মেচ নেখেলো বুলিও জনাইছিল পিচিবিয়ে৷ আৰু তাতেই আৰম্ভ হয় সমস্যাৰ৷ তাৰপিছতেই পৰিস্থিতি স্বাভাৱিক কৰাৰ বাবে নামি পৰে আই চি চি৷ এখন হাই লেভেল মিটিঙৰো আয়োজন কৰা হয়৷ এই মিটিঙত উপস্থিত আছিল আই চি চিৰ চি ই অ সংযোগ গুপ্তও৷ তেওঁ জুম অৰ্থাৎ অনলাইনত থাকি এই মিটিঙত নিজৰ বক্তব্যও ৰাখিছে৷ লাহোৰত অনুষ্ঠিত এই বৈঠকত উপস্থিত থাকে পি চি বিৰ চেয়াৰমেন মহচিন নকভি, আই চিচি ডেপুটি চেয়াৰমেন ইমৰান খোয়াজা আৰু বাংলাদেশৰ ক্ৰিকেট বৰ্ডৰ প্ৰেচিডেণ্ট আমিনুল ইছলাম বুলবুল৷ তাতেই নিজৰ দাবীৰ কথা জনায় পাকিস্তানে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
