অসম লাইভ২৪ঃ সন্ন্যাস মানেই ত্যাগ! সংসাৰ, মোহ, লোভ এইসমূহ ত্যাগ কৰি পৰমাত্মাৰ আৰাধনা বা পৰমাত্মাৰ সৈতে একাত্ম হোৱাৰ পথ বিচৰা৷ এই পথ সহজ নহয়৷ এইবাৰ সন্ন্যাসী হোৱাৰ বাবে জনতাক সুযোগ দিছে যোগপীঠ পতঞ্জলীয়ে৷ সম্প্ৰতি পতঞ্জলিৰ তৰফৰ পৰা দিয়া হৈছে এক বিজ্ঞাপনো৷ বিজ্ঞাপনটোত সন্ন্যাসী হ’বলৈ কি কি যোগ্যতা লাগে সেই কথাও উল্লেখ কৰিছে৷
কম বয়সীয়া শিক্ষিত যুৱক-যুৱতীক এই সুযোগ দিছে পতঞ্জলীয়ে৷ সন্ন্যাসী হোৱাৰ বাবে পোনতেই নিজৰ নাম নথীভুক্ত কৰিব লাগিব৷ সন্ন্যাসী হ’বলৈ কিমান শিক্ষিত হ’ব লাগিব সেই কথাও উল্লেখ আছে বিজ্ঞাপনটোত৷ নাম নথিভুক্ত কৰিবলৈ এজন যুৱক কমেও হাইছেকেণ্ডাৰী উত্তীৰ্ণ হ’ব লাগিব৷ স্নাতক বা স্নাতকোত্তৰ হ’লে বিশেষ গুৰুত্ব পাব৷ যিসকলে যোগচৰ্চা বিষয়ত পঢ়াশুনা কৰিছে, দৰ্শন, বেদশাস্ত্ৰ, সংস্কৃত ব্যাকৰণ আৰু সংস্কৃত সাহিত্যত পঢ়াশুনা কৰিছে সেইসকলেও বিশেষ গুৰুত্ব লাভ কৰিব৷ এই যোগদান কাৰ্যসূচীত প্ৰায় ১০০ গৰাকী যুৱক-যুৱতীয়ে সন্ন্যাস গ্ৰহণ কৰাৰ সুবিধা লাভ কৰিব৷
২২ মাৰ্চৰ পৰা ৩০ মাৰ্চ পৰ্যন্ত ৯ দিন ধৰি এই অনুষ্ঠান চলিব৷ সংস্থাৰ দাবী, যিসকলে যোগদান কৰিব তেওঁলোকৰ ঋষিৰ দৰে এক ব্যক্তিত্ব গঢ়ি তোলাত প্ৰথম গুৰুত্ব দিয়া হ’ব৷ কিন্তু ইয়াৰ আঁৰত মূল উদ্দেশ্য কি? হিন্দু সনাতন ধৰ্মক ভাৰতৰ তথা বিশ্বৰ ধৰ্ম হিচাপে তুলি ধৰাৰ লগতে ভাৰতক বিশ্বৰ সকলোতকৈ ক্ষমতাশালী দেশলৈ পৰিণত কৰাই মূল উদ্দেশ্য৷ যিসকলে পৰীক্ষা বা অন্য কোনো কাৰণত এই সমাৰোহত ভাগ ল’ব নোৱাৰে তেওঁলোকৰ বাবেও বিকল্প ব্যৱস্থা থকাৰ কথা উল্লেখ আছে বিজ্ঞাপনত৷ দেশত বহুসংখ্যক সন্ন্যাসী আৰু সংঘই ধৰ্মপ্ৰচাৰৰ কাম কৰি আহিছে যদিও শিক্ষাগত যোগ্যতা চাই বিজ্ঞাপন প্ৰচাৰ কৰি সন্ন্যাস ল’বলৈ আহ্বান জনোৱাটো এইখন দেশত নজৰবিহীন এক ঘটনা৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ