বিমান দুৰ্ঘটনাত মৃত মহাৰাষ্ট্ৰৰ উপমুখ্যমন্ত্ৰী অজিত পাৱাৰ৷ চাৰ্টাৰ্ড বিমানখনে মুম্বাইৰ পৰা বাৰামতীলৈ গৈছিল অজিত পাৱাৰ৷ বাৰামতী বিমানবন্দৰত অৱতৰণৰ সময়তেই ভাঙি পৰে বিমানখন৷ প্ৰাথমিকভাৱে জনা গৈছে যে সেই বিমানখন আছিল লিয়াৰজেট ৪৫ মডেলৰ ভিটি এছ এছ কে বিমান৷ বম্বাৰ্ডিয়াৰ এৰোস্পেছ সংস্থাৰে তৈয়াৰী এই বিমানখন বুধবাৰে পুৱা ভাঙি পৰে বাৰামতীত৷ এই দুৰ্ঘটনাৰ পাছতেই ভাইৰেল হৈছে পুৰণি এক খবৰ৷ লিয়াৰজেট ৪৫ মডেলৰ বিমান পূৰ্বেও দুৰ্ঘটনাত পৰিছিল৷
ইয়াৰ পূৰ্বে ২০২৩ চনৰ ছেপ্টেম্বৰত বিশাখাপত্তনমৰ পৰা মুম্বাইৰ উদ্দেশ্যে উৰাৰ সময়ত দুৰ্ঘটনাৰ কৱলত পৰিছিল এখন লিয়াৰজেট ৪৫ বিমান৷ সেইখনে অৱতৰণৰ সময়তেই দুৰ্ঘটনাৰ কৱলত পৰিছিল৷ তদন্তৰ পাছতেই জনা গৈছিল বিশাখাপত্তনমৰ পৰা উৰাণ স্বাভাৱিকেই আছিল বিমানখন৷ যাত্ৰাপথতো কোনো সমস্যা হোৱা নাছিল৷ বিপত্তি ঘটে অৱতৰণৰ সময়তেই৷ মুম্বাই বিমানবন্দৰত তেতিয়া বৃষ্টিপাত হৈ আছিল৷ দৃশ্যমানতাও কিছু কমি গৈছিল৷ বিমানখনে ২৭ নম্বৰ ৰানৱেত অৱতৰণৰ অনুমতি পাইছিল৷ সেই অৱতৰণৰ চেষ্টাৰ সময়তেই ভাঙি পৰে বিমানখন৷
এই মডেলৰ বিমানসমূহত দুটাকৈ ইঞ্জিন থাকে৷ সাধাৰণতে এই বিজনেছ জেট বিভিন্ন কৰ্পৰেট আৰু ভি আই পিসকলৰ যাত্ৰাৰ বাবে ব্যৱহাৰ হয়৷ এই বিমানখন কম দূৰত্বৰ ভ্ৰমণৰ বাবে উপযুক্ত৷ মুম্বাইৰ পৰা বাৰামতী যোৱাৰ পথত ভাঙি পৰা এই লিয়াৰজেট ৪৫ বিমানখন পৰিচালনা কৰিছিল ভি এছ আৰ ভেঞ্চাৰ্ছ নামৰ এক সংস্থাই৷ এই ভি এছ আৰ ভেঞ্চাৰ্ছৰ বিমান দুৰ্ঘটনাতেই প্ৰাণ হেৰুৱাইছে অজিত পাৱাৰে৷
কি কাৰণে এই বিমান দুৰ্ঘটনা ঘটিল সেয়া এতিয়াও স্পষ্ট নহয়৷ দুৰ্ঘটনাৰ সময়ত সেই চাৰ্টাৰ্ড বিমানখনত আছিল অজিত পাৱাৰসহ ৬জন ব্যক্তি৷ তেওঁলোকৰ মাজত দুজন আছিল উপমুখ্যমন্ত্ৰীৰ নিৰাপত্তাৰক্ষী আৰু দুজন আছিল বিমানকৰ্মী৷ অসামৰিক বিমান পৰিবহন নিয়ামক সংস্থা ডিজিচিএ জনাইছে যে দুৰ্ঘটনাত ৬জনৰেই মৃত্যু হৈছে৷ দুৰ্ঘটনাৰ কাৰণ বিচাৰি তদন্ত কৰিবলৈ এটা দল বাৰামতী বিমানবন্দৰলৈ পঠিয়াইছে ডিজিচিএ৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
