বিমান দুৰ্ঘটনাত মৃত্যু হৈছে মহাৰাষ্ট্ৰৰ উপমুখ্যমন্ত্ৰী অজিত পাৱাৰৰ৷ বুধবাৰে পুৱা বাৰামতী বিমানবন্দৰত অৱতৰণ কৰাৰ সময়ত ভাঙি পৰে অজিতৰ বিমান৷ ভাঙি পৰাৰ পাছতেই জুই লাগে বিমানখনত৷ মৃত্যু হয় অজিতসহ বিমানত থকা মুঠ ৫জন ব্যক্তিৰ৷ পুৰি যোৱা দেহসমূহ কাৰ প্ৰথমে চিনাক্ত কৰাও সহজ নাছিল৷ শেষত হাত ঘড়ী আৰু পোছাক দেখি অজিত পাৱাৰৰ দেহ চিনাক্ত কৰা হয়৷
বুধবাৰে মুম্বাইৰ পৰা বাৰামতীলৈ গৈছিল অজিত৷ লিয়াৰজেট ৪৫ মডেলৰ ভিটি এছ এছ কে বিমান যাত্ৰা কৰিছিল তেওঁ৷ বাৰামতী বিমানবন্দৰত অৱতৰণ কৰাৰ সময়ত বিমানখন ভাঙি পৰে৷ তাৰপিছতেই জুই লাগে বিমানখনত৷ বিমানখনৰ যাত্ৰাপথ পৰ্যবেক্ষণকাৰী ৱেবচাইট ফ্লাইটৰেডাৰ ২৪য়ে জনাইছে যে ভাঙি পৰাৰ লগে লগে আৰু এবাৰ অৱতৰণৰ চেষ্টা কৰিছিল মহাৰাষ্ট্ৰৰ উপমুখ্যমন্ত্ৰী অজিত পাৱাৰৰ বিমান৷ দ্বিতীয় বাৰ চেষ্টা কৰাৰ সময়ত ভাঙি পৰে লিয়াৰজেট ৪৫৷ বাৰামতী বিমানবন্দৰৰ মেনেজাৰ শিৱাজীয়ে জনাই যে অৱতৰণৰ সময়ত ৰানৱেৰ এটা ধাৰত ভাঙি পৰে লিয়াৰজেট ৪৫৷ মাটি পৰাৰ লগে লগে জুই লাগে বিমানখনত৷
কি কাৰণত এই দুৰ্ঘটনা ঘটিল সেয়া এতিয়াও স্পষ্ট নহয়৷ প্ৰাথমিকভাৱে ধাৰণা কৰা হৈছে যে এই সময়ত বাৰামতী বিমানবন্দৰ আৰু সংলগ্ন এলেকাত ঘন কুঁৱলী আছিল৷ ফলত দৃশ্যমানতাও কম আছিল৷ সেই কাৰণেই দুৰ্ঘটনা ঘটিব পাৰে বুলি ধাৰণা কৰিছে বহুজনে৷ দৃশ্যমানতা কম থকাৰ কথা জনাইছে কেন্দ্ৰীয় অসামৰিক বিমান পৰিবহনমন্ত্ৰী কে ৰামমোহন নায়ডুৱেও৷ তেওঁ জনাইছে যে ডিজিচিএ আৰু এ এ আই বি দুৰ্ঘটনাৰ তদন্ত আৰম্ভ হৈছে৷ প্ৰাথমিক তদন্তত জনা গৈছে যে বিমানখন অৱতৰণ কৰাৰ সময়ত দৃশ্যমানতা কম আছিল৷
বিমানমন্ত্ৰীয়ে জনাইছে যে প্ৰথমবাৰ অৱতৰণ কৰাৰ সময়ত এয়াৰ ট্ৰাফিক কন্ট্ৰোলৰ তৰফৰ পৰা বিমানৰ পাইলটক প্ৰশ্ন কৰা হৈছিল যে ৰানৱে দেখা পাইছেনে? উত্তৰত নাই বুলি জনাইছিল পাইলটে৷ বিমানখনে আৰু এটা চক্কৰ মাৰি দ্বিতীয়বাৰ অৱতৰণ কৰাৰ চেষ্টা কৰে৷ দ্বিতীয়বাৰ একে প্ৰশ্নৰেই উত্তৰ ৰানৱে দেখা বুলি কৈছিল পাইলটে৷ তাৰপিছতেই বিমানখন অৱতৰণৰ অনুমতি দিয়া হয়৷ দ্বিতীয়বাৰ অৱতৰণৰ চেষ্টা কৰাৰ সময়তে ভাঙি পৰে বিমানখন৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
