অসম লাইভ২৪ঃ দেশৰ সংবিধান সলনি কৰাৰ লক্ষ্য আগত ৰাখি এইবা ৪০০ প্লাছ বুলি শ্লোগান আনিছে প্ৰধানমন্ত্ৰী নৰেন্দ্ৰ মোদীয়ে৷ লোকসভা নিৰ্বাচনৰ প্ৰচাৰত ধাৰাবাহিকভাৱে এই অভিযোগ তুলিছে কংগ্ৰেছ নেতা ৰাহুল গান্ধীসহ বিৰোধীয়ে৷ ৰাহুলৰ এই নিৰ্বাচনী ভাষণৰ জৱাব দিছে এইবাৰ নৰেন্দ্ৰ মোদীয়ে৷ উত্তৰ দিবলৈ গৈ মোদীয়ে টাৰ্গেট কৰি লৈছে গান্ধী আৰু নেহৰু পৰিয়ালক৷ বৃহস্পতিবাৰে মোদীয়ে মন্তব্যত কয়, ‘নেহৰু গান্ধী পৰিয়ালৰচাৰি প্ৰজন্মই মিলি সংবিধান ধ্বংস কৰি পেলাইছে৷’ ৰাহুলে শুকুৰবাৰে উত্তৰপ্ৰদেশৰ ঝাঁসিত ইণ্ডিয়াৰ এক সভাত কৈছিল, ‘বিজেপিয়ে এইবাৰ লোকসভা নিৰ্বাচনত জয়ী হ’লেই ভাৰতৰ সংবিধান ধ্বংস কৰি পেলাব৷’
অম্বেদকাৰৰ আদৰ্শক মোহাৰি পেলাবলৈকে সংবিধানত সাম্প্ৰদায়িকতা অনাৰ চেষ্টা চলাইছে মোদীয়ে৷ এই অভিযোগ বাৰে বাৰে তুলি আহিছে ৰাহুলে৷ ৰাহুলৰ এই মন্তব্যৰ কেইঘণ্টামান পাছতেই ইণ্ডিয়া টুডেক দিয়া এক সাক্ষাৎকাৰত মোদীয়ে কয়, ‘দেশত প্ৰথমবাৰ সংবিধান সলনি কোনে কৰিছিল? জৱাহললাল নেহৰুৱে৷ বাকস্বাধীনতাৰ ওপৰত কোনে প্রথমে হস্তক্ষেপ কৰিছিল? জৱাহৰলাল নেহৰুয়েই৷ ৰাহুল গান্ধীৰ আইতাক ইন্দিৰা গান্ধীয়ে আদালতৰ ৰায়ক আওকান কৰি দেশত জৰুৰীকালিন অৱস্থা ঘোষণা কৰিছিল৷’
ইয়াৰোপৰি মোদীয়ে কয়, ‘ৰাহুলৰ পিতৃ ৰাজীৱ গান্ধীয়ে কি কৰিছিল? শাহবানো গোচৰত ছুপ্ৰীম কৰ্টৰ ৰায় আওকান কৰি সংবিধান সংশোধনী বিল পাছ কৰিছিল৷ ২০১৩ চনত ৰাহুল গান্ধীয়ে যি কংগ্ৰেছ নেতৃত্বাধীন চৰকাৰৰ অৰ্ডিনেন্স ফালি পেলোৱাৰ কথা কৈছিল সেই কৰা পাহৰিছে নেকি?’
উল্লেখ্য যে ছুপ্ৰিম কৰ্টৰ নিৰ্দেশ অনুসৰি কোনো গোচৰত দুবছৰতকৈ বেছি শাস্তি পালে বিধায়ক বা সাংসদৰ সদস্যপদ খাৰিজ হৈ যায়৷ কেৱল সেয়াই নহয় শাস্তিৰ ম্যাদ শেষ হোৱাৰ পাছতেই আৰু ৬বছৰ নিৰ্বাচনতো অংশ ল’ব নোৱাৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
