অসম লাইভ২৪ঃ প্ৰতিবছৰে আঘোণ মাহৰ পূৰ্ণিমা তিথিত পালন কৰা ৰাস পূৰ্ণিমা। এই বছৰ ২৭ নৱেম্বৰ ২০২৩ সোমবাৰে পালিত হ’ব ৰাস পূৰ্ণিমা। হেমন্ত ঋতুৰ অন্যতম গুৰুত্বপূৰ্ণ উৎসৱ হৈছে ৰাস। ভগৱান শ্ৰী কৃষ্ণ আৰু ৰাধাক এই দিনটোত আৰাধনা কৰা হয়। বৈষ্ণৱ তীৰ্থক্ষেত্ৰত আৰু বিভিন্ন কৃষ্ণ মন্দিৰসমূহত এই উৎসৱৰ আয়োজন কৰা হয়।
ৰাস পূৰ্ণিমাৰ তাৰিখ আৰু সময়
এই বছৰ ৰাস পূৰ্ণিমা আৰম্ভ হ’ব ২৬ নৱেম্বৰ ২০২৩ৰ দেওবাৰৰ পুৱা ১১.২৩ মিনিট।
পূৰ্ণিমা শেষ হ’ব ২৭ নৱেম্বৰৰ ২০২৩ সোমবাৰে পুৱা ১০.১৫ মিনিটত।
উদয়া তিথি অনুসৰি ৰাস পালন কৰা হ’ব ২৭ নৱেম্বৰ সোমবাৰে।
ৰাসৰ উৎপত্তি ক’ত?
বৈষ্ণৰ সম্প্ৰদায়ৰ প্রধান উৎসৱ হৈছে ৰাস। পুৰাণ অনুসৰি বৃন্দাবনত থকাৰ সময়ত শ্ৰী কৃষ্ণই গোপিনীসকলৰ সন্মুখত প্ৰতিজ্ঞা কৰিছিল যে তেওঁলোকৰ মনৰ সকলো ইচ্ছা পূৰণ কৰিব আৰু তেওঁলোকৰ সৈতে প্ৰত্যেকবছৰেই তেওঁ ৰাসলীলা কৰিব। এই প্ৰতিজ্ঞা অনুসৰি পূৰ্ণিমা তিথিত ৰাধা আৰু অন্যান্য গোপিনীসকলৰ সৈতে ৰাসলীলা কৰিছিল কৃষ্ণই। তেতিয়াৰে পৰাই প্ৰত্যেকবছৰে প্ৰেমৰ উৎসৱ ৰাস পালন কৰা হয়।
ৰাস উৎসৱৰ ইতিহাস
প্ৰচলিত বিশ্বাস অনুসৰি ৰস শব্দৰ পৰাই ৰাসৰ উৎপত্তি। প্ৰেমৰ ৰস থকা এই উৎসৱক ৰাস বুলি কোৱা হয়। শ্ৰী চৈতন্যদেৱে নৱদ্বীপত এই উৎসৱৰ সূচনা কৰিছিল। বহুতৰে মতে ঈশ্বৰৰ সৈতে আত্মাৰ মহামিলনেই ৰাস। পুৰাণত শাৰদ ৰাস আৰু বসন্ত ৰাসৰ কথা উল্লেখ আছে। সনাতন ধৰ্মাৱলম্বীৰ এয়া বিশেষ উৎসৱ। শ্ৰী কৃষ্ণৰ ব্ৰজলীলাৰ অনুকৰণতেই বৈষ্ণৱীয় ভাৱধাৰাৰে এই উৎসৱ পালন কৰা হয়। নদিয়াৰ শান্তিপুৰ আৰু নৱদ্বীপত চাৰিদিন ধৰি এই মহাসমাৰোহ পোনতে পালন কৰা হৈছিল। বৰ্তমান সমগ্ৰ দেশতেই ৰাস পালন কৰা হয়। বিশেষকৈ উত্তৰপ্ৰদেশ, মথুৰা, বৃন্দাবন, ওড়িশা, অসম আৰু মনিপুৰত বিশেষভাৱে ৰাস পালন কৰা হয়।
ৰাস পুৰ্ণিমাক বহুতে কাৰ্তিক পূৰ্ণিমা বুলিও কয়। এই পূৰ্ণিমাত উপবাসে থাকিলে অশ্বমেধ যজ্ঞৰ সমান পূণ্যফল লাভ কৰিব পাৰি বুলি লোকবিশ্বাস। এই দিনটোত সূৰ্যোদয়ৰ পূৰ্বে অৰ্থাৎ ব্ৰাহ্ম মুহূৰ্তত গা ধুলে শুভ বুলি ধৰ্মীয় বিশ্বাস। হিন্দুধৰ্মত এই পূৰ্ণিমাৰ মাহাত্ম্য বিশেষ। পৌৰাণিক কাহিনী অনুসৰি এই দিনটোত ভগৱান শিৱই ত্ৰিপুৰাছুৰ নামত এজন ৰাক্ষসক বধ কৰিছিল। এই পূৰ্ণিমাক ত্ৰিপুৰী বা ত্ৰিপুৰাৰী পূৰ্ণিমা নামেৰেও জনা যায়। আৰু এক কিংবদন্তীৰ কাহিনী অনুসৰি এই দিনটোতেই শ্ৰী বিষ্ণুয়ে মৎস্য অৱতাৰ গ্ৰহণ কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
