অসম লাইভ২৪ঃ নোট আৰু খুচুৰা পইচাৰ বিকল্প হিচাপে ডিজিটেল টকা বা ই-ৰুপি প্ৰচলনৰ সিদ্ধান্ত লৈছে ৰিজাৰ্ভ বেংক অৱ ইণ্ডিয়াই। আৰবিআইয়ে মঙলবাৰে কৰিছে এই ঘোষণা। ১ ডিচেম্বৰ অৰ্থাৎ বৃহস্পতিবাৰৰ পৰা পৰীক্ষামূলকভাৱে ডিজিটেল মুদ্ৰাৰ প্ৰচাৰ আৰম্ভ কৰা হ’ব। ইয়াৰ পূৰ্বে দেশত ডিজিটেল মুদ্ৰাৰ লেনদেনৰ ব্যৱস্থা নাছিল।
‘ডিজিটেল মুদ্ৰা’ পৰিসেৱা আৰম্ভ কৰাৰ বাবে চাৰিটাকৈ বেংকক দায়িত্ব দিছে আৰবিআইয়ে। এই দায়িত্ব দিয়া বেংককেইটা হৈছে ষ্টেট বেংক অৱ ইণ্ডিয়া, ICICI বেংক, IDFC ফাৰ্ষ্ট বেংক আৰু ইয়েছ বেংকক। প্রাথমিকভাৱে আৰবিআইয়ে ঘোষণা কৰা অনুযায়ী কেৱল মাত্ৰ নিৰ্দিষ্ট কিছু গ্ৰাহক আৰু ব্যৱসায়ীয়েহে পোনতে এই সুবিধা লাভ কৰিব। পৰীক্ষামূলকভাৱেহে এই ই-মুদ্ৰাৰ লেনদেন চলাব। যদি এই ই-মুদ্ৰাৰ পৰীক্ষামূলক প্ৰচলন সফল হয় তেন্তে পৰবৰ্তী পদক্ষেপ অচিৰই ল’ব বুলি জনাইছে আৰবিআইয়ে।
ডিজিটেল মুদ্ৰা প্ৰকৃততে কি?
ডিজিটেল মুদ্ৰাৰ প্ৰসংগটোৱে চৰ্চা লাভ কৰি থকাৰ সময়তে বহুতৰে মনত প্ৰশ্ন ই-মুদ্ৰা বা ডিজিটেল মুদ্ৰা প্ৰকৃততে কি? ক্ৰিপ্টকাৰেন্সিৰ দৰেই নেকি এই ডিজিটেল মুদ্ৰা? এই ধাৰণা সঠিক। ই-মুদ্ৰাও ক্ৰিপ্টকাৰেন্সিৰ দৰেই এবিধ ডিজিটেল টোকেন। ভাৰতত এই ডিজিটেল মুদ্ৰাক আইনী স্বীকৃতিও অচিৰেই দিয়া হ’ব। কিন্তু ক্ৰিপ্টকাৰেন্সিৰ ধাৰণাৰে মিল থাকিলেও ডিজিটেল মুদ্ৰা ক্ৰিপ্টকাৰেন্সিৰ দৰে উঠা-নমা নকৰে। কাগজৰ নোট আৰু খুচুৰা পইচাৰ সমান দামতেই আৰম্ভ হ’ব এই ডিজিটেল মুদ্ৰা।
ডিজিটেল মুদ্ৰাই কেনেকৈ কাম কৰিব?
ডিজিটেল মুদ্ৰাই কেনেকৈ কাম কৰিব এই বিষয়টোলৈয়ো বহুতেই চিন্তিত হৈছে। বৰ্তমান সময়ত অনলাইন জালিয়াতি চলি থকাৰ সময়তে এই ডিজিটেল মুদ্ৰা কিমানদূৰ নিৰাপদ হ’ব এই বিষয়টোক লৈও একাংশ লোক সংকিত হৈছে। আৰবিআইয়ে প্ৰকাশ কৰা মতে এই ডিজিটেল মুদ্ৰা গ্ৰাহক আৰু ব্যৱসায়ীৰ মাজত বেংকৰ মাধ্যমেৰে আদান-প্ৰদান হ’ব। ব্যৱহাৰকাৰীয়ে নিৰ্দিষ্ট বেংকত থকা ডিজিটেল ৱালেটৰ মাধ্যমেৰে আৰু মোবাইল ফোন বা ডিভাইছত ৰখা ডিজিটেল মুদ্ৰাৰ মাধ্যমেৰে এই লেনদেন কৰিব পাৰিব। আৰবিআইয়ে নিশ্চিত কৰা অনুযায়ী ডিজিটেল মুদ্ৰাত লেনদেন কৰা দুজনেই সাধাৰণ গ্ৰাহক নতুবা এজন ব্যৱসায়ী আৰু এজন সাধাৰণ গ্ৰাহক হ’ব পাৰে। অনলাইন বিভিন্ন এপ যেনে গুগল পে, ফোন পে আদিৰ দৰেই এই লেনদেনো সম্ভৱ হ’ব। ব্যৱসায়ীৰ হাতত থকা কিউআৰ কোড স্কেন কৰি ডিজিটেল মুদ্ৰা দিব পাৰিব সাধাৰণ গ্ৰাহকে। ডিজিটেল মুদ্ৰাৰ ব্যৱহাৰ যথেষ্ট নিৰাপদ হ’ব বুলি দাবী কৰিছে আৰবিআইয়ে।
ৰিজাৰ্ভ বেংক অৱ ইণ্ডিয়াই প্ৰকাশ এক বিজ্ঞাপ্তিত প্ৰকাশ কৰা মতে নগদ টকাৰ যিসমূহ বৈশিষ্ট্য আছে ডিজিটেল মুদ্ৰাৰো একেই বৈশিষ্ট। নগদ টকাৰ ধৰণেৰেই ই-মুদ্ৰাই জনতাৰ মাজত টকাৰ লেনদেন সহজ কৰি তুলিব। বেংকত নগদ টকা ৰাখিলে যেনেদৰে সুদ পোৱা যায় তেনেদৰে ডিজিটেল মুদ্ৰাত সুদ পোৱা নাযাব। বেংকসমূহত এই ডিজিটেল মুদ্ৰা আমানত হিচাপেও জমা ৰাখিব পাৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
