৩১ বছৰ বয়সীয়া স্নাতকোত্তৰ প্ৰশিক্ষণাৰ্থী মহিলা চিকিৎসকৰ ধৰ্ষণ আৰু হত্যাৰ অভিযোগক কেন্দ্ৰ কৰি দেশব্যাপী বিক্ষোভ চলি আছে৷ এই ঘটনাৰ ন্যায়বিচাৰ বিচাৰি সৰৱ সমগ্ৰ দেশৰ চিকিৎসক মহল, শুভবুদ্ধ সম্পন্ন সাধাৰণ মানুহেও কৰি আছে প্ৰতিবাদ৷ উদ্দেশ্য সকলোৰে এটাই ন্যায় লাগে৷ দেশত আৰু দ্বিতীয় এনে কোনো ঘটনা হ’ব নালাগে৷ প্ৰতিবাদৰ মাজতেই এই ঘটনাক কেন্দ্ৰ কৰি তৈয়াৰ হৈছে কিছু ৰহস্যৰো৷
সঞ্জয় ৰায় নামৰ এজন ছিভিক ভলণ্টিয়াৰক এই ঘটনাৰ সাম্ভাৱ্য আছামী হিচাপে গ্ৰেপ্তাৰ কৰা হৈছে৷ মৃতকৰ পৰিয়ালবৰ্গসহ বহু মানুহৰেই ধাৰণা যে ইয়াৰ পাছত অন্য কেইবাটাও কাহিনী আছে৷ আৰ জি কৰ মেডিকেল কলেজত এই ধৰণৰ ৰহস্যজনক মৃত্যুৰ ঘটনা প্ৰথম নহয়৷ এই মেডিকেল কলেজত বাৰংবাৰ একে ধৰণৰ ঘটনা ঘটি আছে৷ কেতিয়াবা যদি ছাত্ৰ আৰু কেতিয়াবা অধ্যাপক, কেতিয়াবা হাউছ ষ্টাফে ৰহস্যজনক মৃত্যুৰ সাবটি লৈছে৷
হাস্পতালত মাজে মাজে পৰ্ণগ্ৰাফী চক্ৰ চলাৰ অভিযোগো উঠিছে৷ কেতিয়াবা উঠিছে মাদক চক্ৰ, কেতিয়াবা উঠিছে পতিতাবৃত্তি চলাৰ দৰে গুৰুতৰ অভিযোগো৷ শেহতীয়া মহিলা চিকিৎসকৰ ঘটনাই আকৌ এবাৰ ইতিহাস খুচৰি চাবলৈ বাধ্য কৰাইছে৷
২০০১, সৌমিত্র বিশ্বাস
২০০১ চনৰ ২৫ আগষ্ট, আৰ জি কৰ মেডিকেল কলেজ হোষ্টেলৰ ৰুমত ঝুলন্ত অৱস্থাত পোৱা গৈছিল সৌমিত্ৰ বিশ্বাস নামৰ এগৰাকী চতুৰ্থ বৰ্ষৰ ছাত্ৰ৷ তৰুণী চিকিৎসকগৰাকীৰ দৰেই কৰ্তৃপক্ষই দ্ৰুততৰভাৱে ঘটনাক আত্মহত্যা বুলি ঘোষণা কৰিছিল৷ কিন্তু নিহতৰ পৰিয়াল আৰু নিহত শিক্ষাৰ্থীৰ বহুকেইজনে এই ঘটনাত সন্দেহ প্ৰকাশ কৰিছিল৷ সৌমিত্ৰৰ মাতৃ আৰু কেইবাগৰাকী সহপাঠীয়ে অভিযোগ কৰিছিল, কলেজ হোষ্টেলৰ ভিতৰত পৰ্ণগ্ৰাফী চক্ৰ চলি আছে৷ হোষ্টেলৰ ৰুমে ৰুমে অশ্লীল ছবিৰ শ্বুটিং চলে৷ ইয়াৰ সৈতে জড়িত হৈ আছে ছেক্স ৰেকেটো৷ আনকি মৃতদেহৰ সৈতে যৌন সম্পৰ্ক স্থাপনৰ দৰে জঘন্য কাণ্ডও সংঘটিত হৈ থাকে৷ বেছ কেইবাগৰাকী ছাত্ৰ ছাত্ৰীয়ে দাবী কৰিছিল যে সৌমিত্ৰই এই অন্ধকাৰ কাজকৰ্ম ফাঁচ কৰিব বিচাৰিছিল৷ সেয়ে তেওঁক হত্যা কৰা হ’ল৷ কলকাতা হাইকোৰ্টে CIDৰ তদন্তৰ নিৰ্দেশ দিছিল৷ অৰোমিতা দাস আৰু অমিত বালা নামৰ সৌমিত্ৰৰ সহপাঠীকো এই ঘটনাৰ সন্দেহত গ্ৰেপ্তাৰ কৰা হৈছিল৷ কিন্তু এই গোচৰ এই তদন্ত আধৰুৱাই হৈ থাকিল৷ সৌমিত্ৰৰ মৃত্যু আজিও ৰহস্যৰে আবৃত হৈ আছে৷
২০০৩, অৰিজিৎ দত্ত
২০০৩ৰ ৫ফেব্ৰুৱাৰীত আত্মঘাতী হৈছিল আৰ জি কৰ মেডিকেল কলেজ আৰু হাস্পতালৰ এগৰাকী হাউছষ্টাফ অৰিজিৎ দত্ত৷ আৰক্ষীয়ে জনাইছে যে প্ৰথমে অৰিজিতে তেওঁৰ হাতত এনাস্থেছিয়াৰ ইনজেকছন দিছিল৷ তেওঁৰ হাত অৱশ হৈ পৰিছিল৷ তাৰপাছতেই তেওঁৰ হাতৰ শিৰ ব্লেডেৰে কাটি ছিঙি দিয়া হৈছিল৷ তাৰপাছতেই এখন ছাৰ্জিকেল কেচিৰে তেওঁৰ হাতৰ শিৰসমূহ কটা হৈছিল৷ সৰ্বশেষত মেইন হোষ্টেলৰ ছাদৰ তললৈ জাপ মাৰিছিল৷ তলত পৰি থকাৰ সময়তো হাতত আছিল ছাৰ্জিকেল কেচি৷ সেই দিনটো আছিল সৰস্বতী পুজাৰ ঠিক এদিন আগত৷ বীৰভূমৰ শিউড়িৰ ২৪ বছৰীয়া এই যুৱকজনৰ মৃত্যুক লৈ সৃষ্টি হৈছিল ৰহস্যৰ৷ কাৰণ আৰক্ষীয়ে কোনো ছুইচাইড নোট বা কিয় ছুইচাইড কৰিলে তাৰ কাৰণ বিচাৰি পোৱা নাছিল৷ অৰিজিতে সদায়ে কম কথা কৈছিল৷ আৰক্ষীয়ে শেষ পৰ্যন্ত কৈছিল ইয়াৰ আঁৰত ব্যৰ্থ প্ৰেমৰ কোনো ঘটন সংপৃক্ত হৈ আছে৷ কিন্তু নিশ্চিতভাৱে তেওঁলোকেও কোনো তথ্য দিব পৰা নাছিল৷ কেইদিনমান পাছতেই এই ঘটনা একেবাৰেই গাপ পৰে৷
২০০৩, প্রবীণ গুপ্তা
অৰিজিতৰ মাত্ৰ কেইদিনমান পাছত ১৬ ফেব্ৰুৱাৰীত আৰু এগৰাকীয়ে নিজকে শেষ কৰাৰ চেষ্টা চলাইছিল৷ তেওঁ প্ৰবীণ গুপ্তা৷ গভীৰ নিশা তেওঁ দুই হাতেৰে হাতৰ কব্জাৰ শিৰা ছিঙি আত্মহত্যাৰ চেষ্টা চলাইছিল৷ কিন্তু সৌভাগ্যক্ৰমে তেওঁ বাচি যায়৷ আমহাৰ্ষ্ট ষ্ট্ৰিট থানাৰ তদন্তকাৰী বিষয়াসকলে জনোৱা মতে এগৰাকী বান্ধবীক উদ্দেশ্য কৰি তেওঁ এখন ছুইচাইড নোট লিখিছিল৷ প্ৰেমত ব্যৰ্থ হোৱাৰ পাছত তেওঁ অৱসাদৰ স্বীকাৰ হৈছিল৷ তাৰপাছতেই তেওঁ আত্মহত্যাৰ চেষ্টা কৰে৷ তেওঁৰ সহপাঠী আৰু ৰুমমেটে জনোৱামতে প্ৰবীণ মুঠেও বিষন্নতাত ভূগা নাছিল৷ তেওঁ আত্মহত্যাৰো চেষ্টা কৰা নাছিল৷ অন্য কোনো বিষয়েহে প্ৰবীণক উদ্বিগ্ন কৰিছিল৷ প্ৰবীণৰ উদ্বেগ কি আছিল কোনোদিনে তেওঁ প্ৰকাশ নকৰিলে৷ লাহে লাহে সময়ৰ সোঁতত এই ঘটনা সকলোৱে পাহৰি পেলায়৷
২০১৬, ডাঃ গৌতম পাল
আৰ জি কৰ মেডিকেল কলেজ আৰু হাস্পতালৰ মেডিছিন বিভাগৰ অধ্যাপত আছিল ডাঃ গৌতম পাল৷ ২০১৬ চনৰ ২৪ অক্টোবৰত দক্ষিণ দমদমৰ ভাৰাঘৰৰ পৰা উদ্ধাৰ কৰা হৈছিল ৫২ বছৰ বয়সীয়া এইগৰাকী চিকিৎসকৰ পচা গেলা দেহ৷ দুৰ্গন্ধ পাই আৰক্ষীক খবৰ দিছিল প্ৰতিবেশীয়ে৷ দৰ্জা ভাঙি ভিতৰত সোমাই, প্ৰথম তলাৰ এটা ঘৰৰ বিচনাত মৃত অৱস্থাত আৰক্ষীয়ে উদ্ধাৰ কৰিছিল চিকিৎসকগৰাকীক৷ আৰক্ষীয়ে অনুমান কৰিছিল যে হৃদৰোগত আক্ৰান্ত হৈ তেওঁৰ মৃত্যু হয়৷ কিন্তু ঘৰৰ মেজত তেজৰ দাগ আৰু তেওঁৰ মুখত থকা কিছু আঘাতৰ চিহ্নও পোৱা গৈছিল৷
২০২০, পৌলমী সাহা
সেই সময়ত কভিড-১৯ মহামাৰী চলি আছিল৷ মৰ্মান্তিক মৃত্যু হৈছিল দ্বিতীয় বৰ্ষৰ স্নাতকোত্তৰ প্ৰশিক্ষণাৰ্থী মহিলা চিকিৎসক পৌলমী সাহাৰ৷ আৰক্ষীয়ে জনাইছিল আৰ জি কৰ হাস্পতালত ষষ্ঠ মহলাৰ পৰা জাপ মাৰি আত্মহত্যা কৰিছিল পৌলমীয়ে৷ বন্ধু আৰু সহকৰ্মীয়ে কৈছিল সম্ভৱত বিষণ্ণতাই গ্ৰাস কৰিছিল তেওঁক৷ দীৰ্ঘদিন ধৰি তেওঁ কভিড-১৯ ক্লিনিকত কাম কৰিছিল৷ ১ মে, শিফট আৰম্ভ হোৱাৰ ঠিক পূৰ্বে পুৱা ১১ বজাত তেওঁ ষষ্ঠ মহলাৰ পৰা জাপ মাৰি দিছিল বুলি জনাই আৰক্ষীয়ে৷ যদিও এই ক্ষেত্ৰত কোনো ছুইচাইড নোট পোৱা নাছিল৷ পৌলমীৰ মৃত্যুক লৈ তৈয়াৰ হৈছিল বহু প্ৰশ্নৰো৷ যিসমূহৰ উত্তৰ আজিও পোৱা নগ’ল৷ বিষয়টোক লৈ তদন্ত কৰি কোনো তথ্য দিব নোৱাৰিলে কলকাতা আৰক্ষীয়ে৷
২০২৩, শুভ্রজ্যোতি দাস
২০২৩ত ড্ৰাগ অভাৰডোজৰ বাবে মৃত্যু হৈছিল আৰ জি কৰ মেডিকেল কলেজৰ ইণ্টাৰ্ণ শুভ্ৰজ্যোতি দাসৰ৷ আৰ জি কৰৰ পৰা এম বিবিএছ কৰাৰ পাছত তাৰপৰাই তেওঁ ইণ্টাৰ্ণচিপো কৰিছিল৷ ঘৰত থকা অৱস্থাতেই তেওঁ সংজ্ঞাহীন হৈ পৰা বুলি জনাইছিল পৰিয়ালৰ লোকে৷ দ্ৰুতভাৱে তেওঁক আৰ জি কৰ কলেজৰ আইছিইউত ভৰ্তি কৰা হৈছিল৷ কিন্তু তেওঁৰ জীৱন ৰক্ষা নহ’ল৷ চিকিৎসকে জনাইছিল যে এণ্টিডিপ্ৰেছনড অভাৰডোজত তেওঁৰ মৃত্যু হৈছিল৷ কিন্তু তেওঁ নিজেই এইসমূহ এণ্টিডিপ্ৰেছনড খাইছিলনে? নে কোনোৱে তেওঁক জোৰকৈ খোৱাইছিল৷ আৰক্ষীয়ে তেওঁক বাহিৰ কৰিব নোৱাৰিলে৷ এই ক্ষেত্ৰত ছুইছাইড নোট লাভ নকৰিলে আৰক্ষীয়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
