আজিৰ দিল্লীৰ ঘটনাৰ কি আছিল উদ্দেশ্যে, বগা পাউদাৰ উদ্ধাৰ হোৱাৰ পাছত অধিক চাঞ্চল্য
আজি দেওবাৰে ৰাজধানী দিল্লীৰ এখন বিদ্যালয়ৰ সমুখত সংঘটিত হোৱা বিস্ফোৰৰ পাছতে চাঞ্চল্যই বিৰাজ কৰি আছে। উত্তৰ-পশ্চিম দিল্লীৰ ৰোহিনী অঞ্চলৰ চি আৰ পি এফ স্কুলৰ সমীপত সংঘটিত বিস্ফোৰণৰ ঘটনাৰ তদন্ত আৰম্ভ হৈছে।
এই গোচৰৰ তদন্তৰ দায়িত্ব নিয়াৰ হাতত অৰ্পণ কৰা হৈছে। সূত্ৰ অনুসৰি বোমাটো স্থাপন কৰা ব্যক্তিজনে কেৱল এটা বাৰ্তা আৰু সংকেত দিব বিচাৰিছিল, সেয়েহে চি আৰ পি এফ বিদ্যালয়ৰ দেৱালখনক লক্ষ্য কৰি লোৱা হৈছিল।
আৰক্ষীৰ সূত্ৰই কয় যে, “যিদৰে দেৱালখনৰ সমীপত বিস্ফোৰণ ঘটিছিল আৰু পুৱা আক্ৰমণ সংঘটিত হৈছিল, ইয়াৰ পৰা দেখা গৈছে যে ইয়াৰ উদ্দেশ্য আছিল কেৱল বাৰ্তা প্ৰেৰণ কৰা। ইয়াৰ দ্বাৰা কোনো ডাঙৰ ক্ষতি কৰা লক্ষ্য নাছিল।” ৰিপৰ্টত এজন জ্যেষ্ঠ আৰক্ষী বিষয়াই কয়, “বিস্ফোৰণৰ পিছত এটা দুৰ্গন্ধ আহি আছিল।” স্থানীয় ৰাইজ আৰু আৰক্ষী বিষয়াসকলেও অনুভৱ কৰিছিল সেই দুৰ্গন্ধ।
আনফালে তদন্তকাৰী সংস্থাই বিস্ফোৰণ ঘটা ঠাইত পৰি সিঁচৰিত হৈ থকা অৱস্থাত উদ্ধাৰ কৰিছে কিছু বগা গুড়ি। বিশ্বাস কৰা হয় যে এই খাৰুৱা বোমাটো হয়তো এমোনিয়াম ফছফেট আৰু কিছুমান ৰাসায়নিক পদাৰ্থ মিহলাই তৈয়াৰ কৰা হৈছিল।
বিস্ফোৰণৰ পিছত সেই স্থানৰ পৰা এফ এছ এল, চি আৰ পি এফ আৰু এন এছ জিয়ে কণা সংগ্ৰহ কৰিছে। তদন্তৰ অন্ততহে গম পোৱা যাব কোনটো ৰাসায়নিক পদাৰ্থ ব্যৱহাৰ কৰি বোমাটো নিৰ্মাণ কৰা হৈছে। সেই স্থানৰ পৰা কিছু তাঁৰ উদ্ধাৰ হৈছে যদিও ইতিমধ্যে সেই স্থানত আছিল নে নাই তদন্ত চলি আছে। তদন্তৰ প্ৰতিবেদন কেন্দ্ৰীয় গৃহ মন্ত্ৰালয়লৈ প্ৰেৰণ কৰা হ’ব। ইয়াৰ পিছত আমি জানিব পাৰিম যে বিস্ফোৰণৰ আঁৰৰ উদ্দেশ্য কি আছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
