অঘটন, মেৰামতিৰ পাছত পুনৰ যাত্ৰা কৰা যাত্ৰীবাহী বিমান দুৰ্ঘটনাগ্ৰস্ত, পাইলট সহ সকলো ক্ৰু মেম্বাৰ নিহত
ৰাছিয়াৰ পৰা আহিছে এক অতিকে দুখজনক খবৰ। মেৰামতি কৰি পুনৰ যাত্ৰা কৰা এখন যাত্ৰীবাহী জেট বিমান দুৰ্ঘটনাগ্ৰস্ত । দুৰ্ঘটনাত পৰি বিমান খনত যাত্ৰা কৰি থকা কেউজনৰে মৃত্যু হয়। আজি ১২ জুলাই তাৰিখ শুকুৰবাৰে সংঘটিত হৈছে এই ঘটনা।
দুৰ্ঘটনাতটোত বিমানখনত থকা পাইলট সহ ক্ৰু মেম্বাৰ মুঠ ৩ গৰাকী লোকে প্ৰাণ হেৰুৱাই। সৌভাগ্যৰ কথা যে, যাত্ৰাৰ সময়ত এই বিমানত কোনো যাত্ৰী নাছিল। ৰাছিয়াৰ জৰুৰীকালীন বিষয়াসকলে জনোৱা মতে, বিমানখন চুখয় ছুপাৰজেট ১০০ আৰু মস্কো অঞ্চলত সংঘটিত হয় এই দুৰ্ঘটনা।
খবৰ অনুসৰি এই বিমানখন গেজপ্ৰম এভিয়া বিমান সংস্থাৰ আছিল। কোৱা হৈছে যে এই বিমানখন ৰাছিয়াৰ ৰাজধানী মস্কোৰ পৰা প্ৰায় ১১০ কিলোমিটাৰ দূৰত্বত থকা লুখোভিট্চিত বিমান নিৰ্মাণ কাৰখানাৰ পৰা উৰা মাৰিছিল। এই বিমানখন নিৰ্মাণ কাৰখানাটোত মেৰামতি কৰা হৈছিল। ইয়াৰ পৰা উৰা মৰাৰ পিছত মস্কোৰ ভনুকুৱ বিমানবন্দৰলৈ গৈ আছিল যদিও দুৰ্ঘটনাৰ সন্মুখীন হ’বলগীয়া হয়।
https://x.com/Osint613/status/1811755749057413518
এতিয়ালৈকে পোৱা তথ্য অনুসৰি কলমনা চহৰৰ ওচৰৰ বনাঞ্চলত এই দুৰ্ঘটনা সংঘটিত হৈছে। বিমানখন দুৰ্ঘটনাৰ কাৰণ এতিয়াও স্পষ্ট হোৱা নাই। সূত্ৰৰ পৰা পোৱা তথ্য অনুসৰি বিমানখনৰ মেৰামতিৰ অন্তত পৰীক্ষামূলক ভাৱে চলাই আছিল। কিন্তু এই পৰীক্ষামূলক বিমানখন বিফল হয় য’ত ৩ জন লোকৰ মৃত্যু হয়। বিষয়টোৰ তদন্ত আৰম্ভ কৰা হৈছে।
এই ঘটনাৰ তদন্ত আৰম্ভ কৰিছে ৰাছিয়াৰ সৰ্ববৃহৎ অপৰাধ অনুসন্ধান সংস্থা ‘দ্য ইনভেষ্টিগেচন কমিটীয়ে। উল্লেখ্য যে ২০১৯ চনৰ মে’ মাহতো এখন চুখয় ছুপাৰজেট দুৰ্ঘটনাগ্ৰস্ত হৈছিল। এই ঘটনাত ৪১ জন লোকে প্ৰাণ হেৰুৱাইছিল। এই বিষয়ৰ তদন্তত পাইলটৰ ভুল পোহৰলৈ আহিছিল। পাইলটে তীব্ৰ বেগত ইন্ধন ভৰ্তি বিমানখন অৱতৰণ কৰিবলৈ চেষ্টা কৰিছিল। যাৰ বাবেই সংঘটিত হৈছিল ২০১৯ৰ দুৰ্ঘটনা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
