কৰ্ণাটকৰ মাণ্ড্যাৰ গুথলু অঞ্চলত এগৰাকী ৬৮ বছৰীয়া বৃদ্ধাৰ মৃ*ত্যুৰ পিছত তেওঁৰ ঘৰত উদ্ধাৰ হোৱা বিপুল পৰিমাণৰ নগদ ধনে চাঞ্চল্যৰ সৃষ্টি কৰিছে। মৃত বৃদ্ধাগৰাকীৰ নাম হূৰ বুলি জানিব পৰা গৈছে। বৃদ্ধাগৰাকীয়ে গোটেই জীৱন ভিক্ষা কৰি জীৱিকা নিৰ্বাহ কৰিছিল। বাৰ্ধক্যজনিত কাৰণতে বৃদ্ধাগৰাকীৰ মৃত্যু হয়। বৃদ্ধাগৰাকীৰ মৃত্যুৰ খবৰ বিয়পি পৰাৰ পিছত আত্মীয়-স্বজন আৰু স্থানীয় লোক তেওঁৰ ঘৰলৈ আহে। অন্ত্যেষ্টিক্ৰিয়া সম্পন্ন হোৱাৰ পিছত স্থানীয় লোক আৰু আত্মীয়ই তেওঁৰ ঘৰত থকা সামগ্ৰীসমূহ পৰীক্ষা কৰিবলৈ লয়। তেতিয়াই ঘৰৰ ভিতৰত থকা কেইবাটাও প্লাষ্টিকৰ বেগ আৰু বস্তাত আত্মীয়সকলৰ চকু পৰে। বস্তাকেইটা খোলাৰ পিছত তাত উপস্থিত সকলোৰে চকু কপালত উঠে।
জানিব পৰা মতে, ৩০টাতকৈও অধিক প্লাষ্টিকৰ বেগ আৰু বস্তাত হাজাৰ হাজাৰ মুদ্ৰাৰ লগতে ১০, ২০ আৰু ৫০ টকীয়া নোট উদ্ধাৰ কৰা হয়। উদ্ধাৰ হোৱা ধনৰ পৰিমাণ ইমানেই আছিল যে আটাইকেইটা বস্তাৰ ধন গণনাৰ বাবে স্থানীয় লোক আৰু আত্মীয়সকলে ৰাতিপুৱাৰ পৰা সন্ধিয়া হয়গৈ। খবৰ অনুসৰি, হূৰ নামৰ বৃদ্ধাগৰাকী নিজৰ ভগ্নীৰ সৈতে এটা ভাড়াঘৰত বাস কৰিছিল। দুবছৰ পূৰ্বেই বৃদ্ধাগৰাকীৰ ভগ্নীৰ মৃত্যু হৈছিল। দুয়োগৰাকী ভগ্নীয়েই অবিবাহিত আছিল আৰু ভিক্ষা কৰি লাভ কৰা ধন সঞ্চয় কৰি ৰাখিছিল বুলি জানিব পৰা গৈছে। দীৰ্ঘ সময় ধৰি গণনা কৰাৰ পিছত বৃদ্ধাগৰাকীৰ ঘৰৰ পৰা মুঠ ৮ লাখ ৪০ হাজাৰ টকা উদ্ধাৰ হোৱা বুলি জানিব পৰা গৈছে।
পিছত উদ্ধাৰ হোৱা ধনখিনি বৃদ্ধাগৰাকীৰ দুই ভায়েকৰ মাজত ভাগ কৰি দিয়া হয়। অৱশ্যে দুয়োগৰাকী ভাতৃয়ে জ্যেষ্ঠ ভগ্নীৰ সমগ্ৰ সাচতীয়া ধন পৰৱৰ্তী সময়ত এটা মছজিদলৈ দান কৰে। বৃদ্ধাগৰাকীৰ ঘৰত উদ্ধাৰ হোৱা ধনৰ লগতে বিভিন্ন বহু পুৰণি সামগ্ৰীও প্লাষ্টিকৰ বেগত সযতনে ৰখা অৱস্থাত উদ্ধাৰ কৰা হয়। এগৰাকী বৃদ্ধাই ভিক্ষা কৰি বছৰ বছৰ ধৰি ইমান বৃহৎ পৰিমাণৰ ধন সঞ্চয় কৰি ৰাখিছিল বুলি জানিব পৰাৰ পিছত স্থানীয় লোকসকল আচৰিত হৈ পৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
