অসমৰ শিৱসাগৰ আৰু চৰাইদেউত শেহতীয়া সংহাৰী বানে মানুহৰ জীৱন বিপন্ন কৰি তুলিছে। অসমৰ বানত ক্ষতিগ্ৰস্ত লোকলৈ বলীউডৰ ভাইজান ছলমান খানে সহায়ৰ হাত আগবঢ়াইছে। ছলমান খান বলীউডত আনক সহায় কৰা গুণৰ বাবে পৰিচিত। বলীউডৰ ছুপাৰষ্টাৰ ছলমান খানে নিজৰ এন জি অ’ৰ সৈতে সহযোগিতা কৰি অসমৰ বন্যাৰ্ত ৰাইজৰ সহায়ৰ বাবে পদক্ষেপ লোৱাৰ খবৰ ৰাষ্ট্ৰীয় সংবাদ মাধ্যম TV9 ভাৰতবৰ্ষত প্ৰকাশ পাইছে।
শেহতীয়া বানত লাখ লাখ মানুহে ঘৰ হেৰুৱাইছে, হাজাৰ হাজাৰ হেক্টৰ কৃষিভূমি নষ্ট হৈছে। চৰকাৰী তথ্য অনুসৰি অকালতে প্ৰাণ হেৰুৱাইছে ৬১গৰাকীকৈ লোকে। অসমৰ বিভিন্ন প্ৰান্তৰ লোকে বন্যাৰ্তৰ বাবে সহায়ৰ হাত আগবঢ়াইছে যদিও এতিয়াও অতি দুৰ্গম অঞ্চলৰ অধিকাংশ লোকে খাদ্য আৰু খোৱাপানীৰ অভাৱত ভোগা দেখা গৈছে। এই সংকটৰ সময়ত বলীউডৰ ভাইজান ছলমান খানে সহায়ৰ হাত আগবঢ়োৱাৰ খবৰটো যথেষ্ট আশাব্যঞ্জক।
ৰাষ্ট্ৰীয় সংবাদমাধ্যমৰ প্ৰকাশিত প্রতিবেদন অনুসৰি, এক ঘনিষ্ঠ সূত্রই প্রকাশ কৰিছে যে ছলমান খানে অসমত থকা তেওঁৰ এটা ফেন ক্লাবৰ সৈতে বানাক্রান্তক সাহায্য প্রদানৰ বাবে কাম কৰি আছে৷ ছলমান খানৰ এন জি অ’ বিং হিউমেনৰ জৰিয়তে এই সাহায্য প্ৰদান কৰা হৈছে বুলি TV9 ভাৰতবৰ্ষই প্ৰকাশ কৰিছে। প্ৰথম অৱস্থাত বিস্কুট, ৰুটি, গুড়, পাফ ৰাইচকে ধৰি বিভিন্ন সামগ্ৰী বিতৰণ কৰা হৈছে বুলি বাতৰিটোত প্ৰকাশ কৰিছে। শীঘ্ৰেই বানাক্ৰান্তৰ মাজত ৰেচন কিট বিতৰণৰ পৰিকল্পনাও চলি আছে, লগতে আৰ্তজনৰ বাবে বিশুদ্ধ খোৱাপানী, চেনিটেৰী পেড, অসুস্থ লোকৰ বাবে ঔষধ ইত্যাদি অত্যাৱশ্যকীয় সামগ্ৰীও যোগান ধৰা হ’ব।
ছলমান খানৰ এই পদক্ষেপৰ খবৰ প্ৰায়কেইটা আগশাৰীৰ ৰাষ্ট্ৰীয় সংবাদমাধ্যমতে প্ৰকাশিত হৈছে। অৱশ্যে এই মুহূৰ্তলৈ বান সাহায্য বিতৰণক লৈ অভিনেতাজনৰ তৰফৰ পৰা কোনো ধৰণৰ স্পষ্টীকৰণ অহা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
