অসম লাইভ ২৪ঃ মাটি আৰু মানুহৰ জয়গান গোৱা বিশিষ্ট কবি সনন্ত তাঁতিৰ দেহাৱসান৷ দীৰ্ঘদিনে কৰ্কট ৰোগত আক্ৰান্ত হৈ যোৱা নিশা মৃত্যুক আকোৱালি ল’লে সনন্ত তাঁতিয়ে৷ তেখেতৰ ‘কাইলৈ দিনটো আমাৰ হ’ব’ শীৰ্ষক কবিতা পুথিৰ বাবে ২০১৮ চনত লাভ কৰিছিল সাহিত্য অকাডেমী বঁটা৷ অসম উপত্যকা বঁটাৰেও সন্মানিত হৈছিল ২০১৭ চনত৷ ১৯৫২ চনৰ ৪ নবেম্বৰত কৰিমগঞ্জৰ কালিনগৰ চাহ বাগানত জন্ম হৈছিল সনন্ত তাঁতিৰ৷ শোষিত, নিষ্পেষিত জনতাৰ প্ৰতি থকা সামাজিক দায়বদ্ধতা শক্তিশালীৰূপত প্ৰকাশ পাইছিল তেখেতৰ কবিতাত৷ তেওঁৰ কবিতা পুথিসমূহ হৈছেঃ ‘উজ্জ্বল নক্ষত্ৰৰ সন্ধানত’, ‘মই মানুহৰ অমল উৎসৱ’, ‘নিজৰ বিৰুদ্ধে শেষ প্ৰস্তাৱ’, ‘শব্দত অথবা শব্দহীনতাত’, ‘মৃত্যুৰ আগৰ ষ্ট’পেজত’, ‘টোপনিতে কেতিয়াবা বাৰিষা আহে’, ‘ধোঁৱা ছাইৰ সপোন’, ‘দীৰ্ণ বসন্তৰ সৌৰভ’ আদি৷ তেখেতৰ আকস্মিক মৃত্যুত মৰ্মাহত প্ৰতিগৰাকী পাঠক, প্ৰতিগৰাকী অনুৰাগী৷ অশ্ৰুসিক্ত নয়নেৰে শেষ শ্ৰদ্ধা জ্ঞাপন প্ৰিয় কবিগৰাকীক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
