ৰেমালৰ তাণ্ডৱৰ মাজতে অতিকে শোকাৱহ ঘটনা, মাটি খহি প্ৰাণ গ’ল ১০ গৰাকী লোকৰ
কালিৰে পৰা উত্তৰপূৱৰ ৰাজ্যত খুন্দিয়াইছে ৰেমাল ঘূৰ্ণীয়ে। যাৰ ফলত বহু ঠাইত ধুমুহা, বতাহ, বৰষুণ। ইয়াৰ মাজতে মিজোৰামৰ ৰাজধানী আইজলৰ পৰা আহিছে এক অতিকে শোকাৱহ ঘটনাৰ খবৰ। মাটি খহি একেলগে প্ৰাণ হেৰুৱালে ১০ গৰাকীকৈ লোকে।
আইজলৰ উপকণ্ঠ অঞ্চলত হোৱা ধাৰাসাৰ বৰষুণৰ ফলত ভাঙি পৰে এটা খনি। এই দুৰ্ঘটনাত এতিয়ালৈকে দহজন লোকে প্ৰাণ হেৰুৱাইছে। উদ্ধাৰ কামত নিয়োজিত আৰক্ষী আৰু উদ্ধাৰকৰী দল। ধাৰাসাৰ বৰষুণৰ ফলত নদীৰ জলপৃষ্ঠও বৃদ্ধি পাইছে। নদীৰ পাৰত বসবাস কৰা লোকসকলে ঘৰ এৰি নিৰাপদ স্থানলৈ যাব লগা হৈছে। ৰাজ্যৰ পৰিস্থিতিৰ প্ৰতি লক্ষ্য ৰাখি মুখ্যমন্ত্ৰী লাল দুহোমাই এখন বৈঠকৰ আহ্বান কৰে।
ৰাজ্যখনৰ আৰক্ষী সঞ্চালক প্ৰধান অনিল শুক্লাই জনোৱা মতে, এতিয়ালৈকে ধ্বংসাৱশেষৰ পৰা দহটা মৃতদেহ উলিয়াই অনা হৈছে, আনহাতে বহু লোক এতিয়াও ইয়াৰ তলত পোত খাই আছে। বিষয়াসকলে জনোৱা মতে, নিহতসকলৰ ভিতৰত ৭ জন স্থানীয় লোক, আনহাতে তিনিজন অন্য ৰাজ্যৰ। লগতে ইয়াকো কয় যে, “এতিয়াও দহজনতকৈ অধিক লোক ধ্বংসাৱশেষৰ তলত আবদ্ধ হৈ থকাৰ সম্ভাৱনা আছে।”
ধাৰাসাৰ বৰষুণৰ বাবে বিভিন্ন অঞ্চলত ভূমিস্খলনৰ ঘটনা সংঘটিত হৈছে। হান্থাৰৰ ৰাষ্ট্ৰীয় ঘাইপথ-৬ত হোৱা ভূমিস্খলনৰ ফলত দেশৰ বাকী অংশৰ পৰা বিচ্ছিন্ন হৈ পৰে আইজল। বৰষুণৰ বাবে বৰ্তমান পৰিস্থিতিৰ প্ৰতি লক্ষ্য ৰাখি সকলো বিদ্যালয় বন্ধ কৰি দিয়া হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
