অসম লাইভ২৪ঃ বক্স অফিচত পাঠানৰ খলকনি এতিয়াও আছে। ৪ বছৰৰ অন্তত শ্বাহৰুখে এখন চিনেমা উপহাৰ দিছে অনুৰাগীক। ছবিখনৰ সফলতাৰ লগে লগেই লক্ষ্মীৰ আগমন ঘটিছে পাঠানৰ সমগ্ৰ টীমটোৰ হাতলৈকে। পাঠানৰ সফলতাৰ মাজতেই শ্বাহৰুখৰ মেনেজাৰ পূজা দাদলানিয়ে নতুন ঘৰ ক্ৰয় কৰাৰ খবৰ এতিয়া ভাইৰেল হৈ পৰিছে।
মুম্বাইৰ বান্দ্ৰাৰ অভিজাত এলেকাত ঘৰ ক্ৰয় কৰিছে পূজাই। ইনষ্টাগ্ৰামত নতুন ঘৰৰ ফটো শ্বেয়াৰ কৰিছে পূজাই। বৃহস্পতিবাৰে পূজাৰ নতুন ঘৰত উপস্থিত হৈছিল শ্বাহৰুখ গৌৰীকে ধৰি তেওঁলোকৰ পূত্ৰ আৰিয়ানো। পূজা কেৱল শ্বাহৰুখৰ মেনেজাৰেই নহয়। বহুদিন শ্বাহৰুখৰ সৈতে একেলগে কাম কৰা হেতুকে পূজাৰ সৈতে শ্বাহৰুখৰ পৰিয়ালৰ আছে এক ঘনিষ্ঠ সম্পৰ্কও। খান পৰিয়ালৰ সৈতে প্ৰায় প্ৰতিসময়তে একেলগে থাকে পূজা।
২০১২ চনৰ পৰাই শ্বাহৰুখৰ মেনেজাৰ হিচাপে কাম কৰি আহিছে পূজাই। বহুতেই শ্বাহৰুখৰ মেনেজাৰক চিনি পোৱা নাছিল যদিও ২০২১ চনত বিশেষভাৱে চৰ্চাত আহে পূজা। শ্বাহৰুখৰ পুত্ৰ আৰিয়ান খানে ড্ৰাগছৰ গোচৰত কাৰাগাৰলৈ যোৱাৰ সময়ত খান পৰিয়ালৰ সৈতে ছাঁৰ দৰে আছিল পূজা। পূজাক যথেষ্ট ভৰষাও কৰে শ্বাহৰুখে। আৰিয়ানক কাৰাগাৰৰ পৰা উলিওৱাৰ বাবে সকলো দায়িত্ব পূজাৰ ওপৰতেই এৰি দিছিল শ্বাহৰুখে। কৰ্টৰ আটাইকেইটা শুনানিৰ সময়তে পূজাই উপস্থিত হৈছিল কৰ্টত।
উল্লেখ্য যে পূজাই নতুন ঘৰ ক্ৰয় কৰাৰ পাছতেই শ্বাহৰুখৰ পৰিয়ালে তেওঁৰ সুখৰ মুহূৰ্তখিনি ভগাই ল’বলৈকে তেওঁৰ ঘৰত উপস্থিত হৈছে। বান্দ্ৰাত পূজাই ক্ৰয় কৰা নতুন ঘৰৰ ভিতৰৰ সাজ-সজ্জাও চকুত লগা। শ্বাহৰুখৰ পত্নী গৌৰীয়েই ডিজাইন কৰিছে পূজাৰ ঘৰৰ ভিতৰভাগ। গৌৰীয়ে সজাই তোলা ঘৰৰ ভিতৰভাগৰ ফটো শ্বেয়াৰ কৰি পূজাইয়ো ইনষ্টাগ্ৰাম পষ্টত লিখিছে, ‘মোৰ এই ইটা-শিলৰ এই ঘৰটোক সপোনপুৰীলৈ ৰূপান্তৰ কৰিছে গৌৰীয়ে।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
