অসম লাইভ২৪ঃ ৰাম মন্দিৰৰ পাছত এইবাৰ অযোধ্যাত গঢ়ি উঠিব শ্ৰীৰাম আন্তৰ্জাতিক বিশ্ববিদ্যালয়। ৰাম মন্দিৰ উদ্বোধনৰ পূৰ্বে সৰযূ নদীৰ পাৰত ৰৈ এই আশ্বাস দিছে উত্তৰ প্ৰদেশৰ উপ মুখ্যমন্ত্ৰী দীনেশ শৰ্মা। কেৱল সেয়াই নহয়, সেই বিশ্ববিদ্যালয়ত ৰামায়ণ আৰু শ্ৰীৰাম সাহিত্যক লৈ গৱেষণা কেন্দ্ৰ খোলাৰ কথাও ঘোষণা কৰিছে উপমুখ্যমন্ত্ৰী দীনেশ শৰ্মাই।
মঙলবাৰে ৰাম জন্মভূমিত ভৰি থৈছে উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ ডেপুটিয়েও। তেওঁ এই সন্দৰ্ভত কয়, ‘ঈশ্বৰৰ ওচৰত প্ৰাৰ্থনা কৰিছো, অযোধ্যাত যেন শ্ৰীৰাম আন্তৰ্জাতিক বিশ্ববিদ্যালয়ৰ প্ৰতিষ্ঠা হয়।’ ইয়াৰোপৰি বেচৰকাৰী সংস্থাৰ সৈতে বিজেপি শাসিত উত্তৰ প্ৰদেশ চৰকাৰে আলাপ আলোচনা কৰিছে। বেচৰকাৰী সংস্থাই শিক্ষাৰ ক্ষেত্ৰত বিনিয়োগ কৰিবলৈ ইচ্ছুক বুলিও জনাইছে উত্তৰ প্ৰদেশ চৰকাৰে। শ্ৰী ৰাম বিশ্ববিদ্যালয়ৰ পৰিকল্পনা চূড়ান্ত ৰূপ দিবলৈ অযোধ্যাত মাটিৰ অভাৱ নহয় বুলিও জনাইছে ইউ পি চৰকাৰে।
বিশ্ববিদ্যালয় নিৰ্মাণৰ ওপৰিও ৰামায়ণ আৰু ৰাম সাহিত্যক লৈ গৱেষণা কৰাৰ প্ৰয়োজনীয়তা আছে। এই সন্দৰ্ভত তেওঁ কয়, ‘এইদেশত ৰামায়ণ একাধিক ভাষাত লিখা হৈছে। সেই সাহিত্যৰ গুণ যেনেদৰে পৃথক তেনেকৈ আধ্যাত্মিক মাহাত্ম্যও আছে। তুলসীদাসৰ ৰচিত ৰামচৰিতমানসৰ দৰে প্ৰাচীন সাহিত্য সংৰক্ষণ কৰা খুবেই দৰকাৰ। গৱেষণা সংস্থাই সেই কাম কৰিব।’ আৰু মাত্ৰ ৫ দিন পাছত অযোধ্যাৰ নৱ নিৰ্মিত ৰাম মন্দিৰৰ উদ্বোধন হ’ব। সেই মেগা উদ্বোধন উপলক্ষ্যে ৰাম জন্মভূমিত এতিয়া উৎসৱসদৃশ পৰিবেশ।
উল্লেখ্য উত্তৰপ্ৰদেশ শিক্ষাৰ ক্ষেত্ৰত পূৰ্বতকৈ আগুৱাই যোৱা বুলি দাবী কৰিছে উপ মুখ্যমন্ত্ৰী দীনেশ শৰ্মাই। তেওঁ কয় যে, উত্তৰ প্ৰদেশত মাত্ৰ ৪ বছৰৰ ভিতৰত হাইস্কুল ২৪৭খন নিৰ্মাণ হৈ উঠিছে। ইয়াৰোপৰি ৭৯টা চৰকাৰী কলেজ আৰু মেডিকেল কলেজৰ সংখ্যা ১২ৰ পৰা বৃদ্ধি হৈ ৩০ হৈছেগৈ। আমেঠি আৰু গোৰখপুৰত AIIMS-ৰ কেম্পাছ তৈয়াৰ হৈছে। মুখ্যমন্ত্ৰী যোগী আদিত্যনাথৰ নেতৃত্বত উত্তৰ প্ৰদেশ ক্ৰমাগত উন্নয়ণৰ ৰাস্তাত দুৰন্ত গতিত দৌৰিবলৈ আৰম্ভ কৰিছে। ইয়াৰোপৰি ৰাম মন্দিৰ উদ্বোধনৰ পূৰ্বে অযোধ্যাবাসীক নতুন ৰে’ল ষ্টেচন আৰু আন্তৰ্জাতিক বিমানবন্দৰ উপহাৰ দিছে প্ৰধানমন্ত্ৰী মোদীয়ে। তাতেই এইবাৰ শ্ৰীৰাম বিশ্ববিদ্যালয় গঢ়ি উঠিব বুলিও ঘোষণা কৰিছে আদিত্যনাথ চৰকাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
