বিগত কেইবাদিনৰ জল্পনাৰ অৱসান ঘটাই কৰ্ণাটকৰ মুখ্যমন্ত্ৰী পদত্যাগ কৰাৰ কথা ঘোষণা কৰিলে ছিদ্দাৰামাইয়াই৷ বৃহস্পতিবাৰে নিজৰ বাসভৱনত মন্ত্ৰিসভাৰ সদস্যসকলৰ সৈতে বিশেষ বৈঠক অনুষ্ঠিত কৰি এই সিদ্ধান্তৰ কথা জনাইছে প্ৰবীণ কংগ্ৰেছ নেতাই৷ ছিদ্দাৰামাইয়াৰ স্থানত মুখ্যমন্ত্ৰী হ’ব বৰ্তমানৰ উপমুখ্যমন্ত্ৰী ডি কে শিৱকুমাৰ৷ পৰবৰ্তী মুখ্যমন্ত্ৰী হিচাপে শপতগ্ৰহণ কৰাৰ পূৰ্বে ছিদ্দাৰামাইয়াৰ ভৰি চুই সেৱা লোৱা দেখা গৈছে ডি কে শিৱকুমাৰক৷
কৰ্ণাটকৰ মুখ্যমন্ত্ৰী দপ্তৰৰ সূত্ৰৰ খবৰ অনুসৰি বৃহস্পতিবাৰে ৰাজ্যপালৰ সৈতে দেখা কৰিবলৈ সময় বিচাৰিছিল ছিদ্দাৰামাইয়াই৷ কিন্তু ৰাজ্যপাল থাবৰচান্দ গেহলৌট এতিয়া বাংগালুৰুত নাই৷ পাৰিবাৰিক কাৰণত বুধবাৰে নিশা মধ্যপ্ৰদেশৰ ইন্দোৰলৈ গৈছে ৰাজ্যপাল থাবৰচান্দ৷ সেয়ে মুখ্যমন্ত্ৰী দপ্তৰৰ সূত্ৰৰ খবৰ যে এয়া কোনো জটিল সমস্যাও নহয়৷ কাৰণ ৰাজ্যপাল উপস্থিত থাকক বা নাথাকক তেওঁৰ দপ্তৰলৈ গৈ পদত্যাগপত্ৰ জমা দি অহা হ’ব৷
ইফালে সূত্ৰৰ খবৰ যে মুখ্যমন্ত্ৰীয়ে ৰাজ্যপালৰ সৈতে সাক্ষাতৰ বাবে কোনো সময় বিচৰা নাই৷ ৰাজ্যপাল চহৰত নাই৷ মুখ্যমন্ত্ৰীয়ে যে তেওঁৰ সৈতে সাক্ষাৎ কৰিব খোজে সেই বাৰ্তা ৰাজ্যপাললৈ পঠিওৱা নাই৷ ৰাজ্যপালৰ অনুপস্থিতিত মুখ্যমন্ত্ৰীয়ে তেওঁৰ পদত্যাগপত্ৰ হয়তো সচিবৰ হাতত দিব পাৰে৷ যদি মুখ্যমন্ত্ৰীয়ে ৰাজ্যপালৰ সচিবৰ হাতত পদত্যাগপত্ৰ দিব খোজে তেন্তে তাত কোনো আপত্তি নাই বা অপৰাধো নহয়৷ অৱশ্যে ৰাজ্যপাল সোঁশৰীৰে উপস্থিত হোৱাৰ পাছত সেই পদত্যাগপত্ৰ আকৌ ৰাজ্যপালৰ হাতত তুলি দিব লাগিব৷
ছিদ্দাৰামাইয়াৰ পদত্যাগৰ দিনক্ষণক লৈ কিঞ্চিত জটিলতা তৈয়াৰ হলেও বুধবাৰে নিশা হোৱা বৈঠকত স্পষ্ট হৈ পৰিছে যে তেওঁ মুখ্যমন্ত্ৰী পদত্যাগ কৰিবই৷ ২০২৩ চনত কৰ্ণাটকত কংগ্ৰেছ ক্ষমতালৈ অহাৰ পাছত ছিদ্দাৰামাইয়া আৰু ডি কে শিৱকুমাৰৰ মাজত মুখ্যমন্ত্ৰী পদক লৈ টনাআঁজোৰা হৈছিল৷ সেই সময়ত কংগ্ৰেছ হাইকমাণ্ডে দলিত নেতা ছিদ্দাৰামাইয়াক মুখ্যমন্ত্ৰী হিচাপে বাচি লয়৷ শিৱকুমাৰ শিৱিৰে দাবী কৰিছিল আঢ়ৈবছৰ পাছত মুখ্যমন্ত্ৰী সলনি কৰাৰ চৰ্ততেই গাদী এৰিব বুলি দিয়া চৰ্ততহে শান্ত হৈছিল ডি কে শিৱকুমাৰ৷ ফলত বিগত বছৰৰ মাজভাগত চৰকাৰৰ ম্যাদ আঢ়ৈ বছৰ পাৰ হোৱাৰ পাছতেই শিৱকুমাৰক মুখ্যমন্ত্ৰী কৰাৰ দাবীত সৰৱ হয় তেওঁৰ ঘনিষ্ঠ মহল৷ কিন্তু ছিদ্দাৰামাইয়াৰ শিৱিৰৰ উত্তৰ, এনে কোনো মৌখিক চুক্তি হোৱা নাই৷ ছিদ্দাৰামাইয়াই পাঁচ বছৰ ক্ষমতাত থাকিব৷ ৰাজ্যৰ দুই প্ৰভাৱশালী নেতাৰ মাজত এই টনাআঁজোৰাৰ সময়ত পৰিস্থিতি চম্ভালিবলৈ অৱশেষত ছিদ্দাৰামাইয়াক মুখ্যমন্ত্ৰী পদৰ পৰা পদত্যাগ কৰিবলৈ নিৰ্দেশ দিছে হাইকমাণ্ডে বুলিও চৰ্চা চলিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
