ঘনে ঘনে মুড ছুইং হৈছে? মনোযোগ দিব পৰা নাই কোনো কামত? বহু কথাই পাহৰিও পেলাইছে? কোনোবাই কিবা কথা কওতে মনোযোগ দিব পৰা নাই? কোনো কাৰণ অবিহনেই ক্লান্ত বোধ কৰিছে? ধীৰে ধীৰে পৰিবৰ্তন হৈছে মানসিক অৱস্থাৰ? তেন্তে সাৱধান হোৱাটো প্ৰয়োজন৷ কাৰণ এই উপসৰ্গসমূহ হৈছে ছাইলেণ্ট ষ্ট্ৰোকৰ মূল লক্ষণ! এই ৰোগ সহজে চিনিব নোৱাৰি৷ ব্ৰেইন ষ্ট্ৰোকৰ দৰে কোনো উপসৰ্গ নাই৷ সেই কাৰণেই সহজে এই ৰোগ ধৰা নপৰে৷ সম্প্ৰতি অক্সফোৰ্ড ইউনিভাৰ্ছিটিৰ এক গৱেষণাত এই তথ্য প্ৰকাশ পাইছে৷ গৱেষকে কৈছে চাইলেণ্ট ষ্ট্ৰোক আগতে লক্ষণ দেখুৱাই নাহে৷ ই উপসৰ্গ অবিহনেই আহে৷ মস্তিষ্কৰ কোনো অংশত তেজৰ চলাচল সাময়িকভাৱে ব্যাহত হলেও ইয়াৰ উপসৰ্গ লগে লগে প্ৰকাশ নাপায়৷ ব্ৰেইন ষ্ট্ৰোকৰ দৰে হাত ভৰি অৱশো হৈ নাযায়৷ এয়া কেৱল এম আৰ আই স্কেনতহে ধৰা পৰে৷ ঘনে ঘনে চাইলেণ্ট ষ্ট্ৰোক হলে মস্তিষ্কৰ কোষৰ ক্ষতি হয় আৰু ডিমেনছিয়া বা ডাঙৰ ষ্ট্ৰোক হব পাৰে৷
চাইলেণ্ট ষ্ট্ৰোক কিয় হয়?
মস্তিষ্কৰ সৰু ৰক্তনলীসমূহ ব্লক হৈ গলে এয়া ঘটে৷ উচ্চ ৰক্তচাপ, উচ্চ কলষ্টেৰল, ডায়বেটিছ, ধূমপান আৰু বাৰ্ধক্যজনিত কাৰণত ৰক্তনলী সৰু হৈ গৈ মস্তিষ্কৰ ৰক্তপ্ৰবাহ কমি যায়৷ ৰক্তনলীসমূহত কোনো কাৰণত তেজ গোট মাৰিলেও মস্তিষ্কৰ কোষসমূহ নিস্তেজ হৈ পৰে৷ সেইসমূহে সংকেত বহন কৰিব নোৱাৰে৷ ফলত বাৰে বাৰে পাহৰি যোৱা বিভ্ৰান্তি প্ৰভৃতি সমস্যা তৈয়াৰ হয়৷
কেনেকৈ সতৰ্ক হ’ব?
১. নিয়মিত ৰক্তচাপ পৰীক্ষা কৰক৷
২. কম নিমখ, কম চৰ্বিযুক্ত আৰু উচ্চ আঁহযুক্ত খাদ্য খাওক৷ ট্ৰেন্স ফেট আৰু অতিৰিক্ত চেনী এৰাই চলক৷
৩. প্ৰতিদিনে কমেও ৩০ মিনিট হলেও শাৰীৰিক পৰিশ্ৰম কৰক৷
৪. সম্পূৰ্ণভাৱে ধূমপান ত্যাগ কৰক আৰু মদ্যপানৰ অভ্যাস থাকিলে সেয়া এৰক৷
৫. অতিৰিক্ত ওজন বা স্থূলতাই ষ্ট্ৰোকৰ আশংকা বঢ়ায়৷ দেহৰ ওজন নিয়ন্ত্রণত ৰাখক৷
৬. তেজত শৰ্কৰাৰ মাত্ৰা নিয়মিত পৰীক্ষা কৰক৷
৭. নিয়মিত কলষ্টেৰল পৰীক্ষা কৰক৷
৮. ডিঙিৰ কেৰোটিড ধমনীত চৰ্বি জমা হৈছে নেকি সেয়াও মাজে মাজে পৰীক্ষা কৰক৷
৯. চিকিৎসকৰ পৰামৰ্শ অনুসৰি এম আৰ আই বা চিটিস্কেন কৰি মস্তিষ্কৰ অৱস্থা নিৰ্ণয় কৰক৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
